Read Termanu YESAYA 15 Bible Online

YESAYA 15 - Termanu bible

YESAYA 15

¹ MANETUALAIN hala hehelun ia, la'eneu Moab. Kota Ar ma kota Kir-ra, nanatao namate-namopok, nai le'odaek esa dalen-na, de nusa Moab-pa, da'di nee-nee lino-linok.

²Laun Dibon-nala, ala nda'e pupukuk, soaneu ala kii nai mamanak fo, sene-do'ok neu lamatua daebafak-kala. Laun Moab-pala, no dale he'dik, ala kii-makaleleu kota Nebo ma kota Medeba. Ala nggeuheni langadoon-nala, ma nggolomein-nala, da'di leo ta'du-tana manasusak.

³Hataholi manai enok-kala, ala pake si'di kalong, da'di leo ta'du-tana manasusak; hataholi-a, ana kii-makaleleu, ma ana kii nai masadokek-ka, ma nai uma punin-na.

⁴Hataholi Hesybon ma Eleale-la, ala nggasi beau, de halan-nala nananamanenek losa nai Yahas. Nakalenak, basa solda'du-la dele bee-too; mopo palanin-nala so.

⁵Au daleng-nga he'dis neu Moab! Laun-nala lalai leo kota Zoar-ra ma leo kota Eglat-Selisia leu. Nggelok nda'e leo enok manaleo Luhit neu, boema ala kii; nggelok lalai leo Horonaim leu, boema lakadii-lakau, nanahu soe-a tuni-ndenis.

⁶Lee Nimrim-ma oen-na, ma na'u manamoli manai su'un-na, lamatuu-tongo so, de ta hapu na'u-aiana fo, doon-na momo'dok so'on.

⁷Hataholi-la lena lee anak Haarabim-ma, ma ala sanga enok, fo ala soi-tefa-la, sila hata-heton-nala.

⁸Nai mamanak lala'en-na, nai dae too Moab-pa, hala ngganggasik-ka nananamanenek. Kikii-makaleleuk ndia, nananamanenek nai Eglaim ma Beer-Elim.

⁹Nai Dibon, lee oen-na pilas, nanahu nanasese'dok no daak. Ma neukose Manetualain fe dede'a matuaina-la leni bibii-namatauk mai seluk, neu hataholi manai naa-la. Dodo'do-napauk fo Ana haituan mai-a, neukose taonisa basa hataholi Moab fo bei elak-kala.