Read Termanu YESAYA 17 Bible Online

YESAYA 17 - Termanu bible

YESAYA 17

¹ MANETUALAIN nafa'da nae, “Damsyik ta nalupa kota so'on, te ka'da ai-batu madodouk-kala.

²Kota-kota manai Siria-la, neukose nanala'o elak losa dodoon-na, fo ana da'di bana-manu mamana nakabubuan; Ta hapu hataholi esa boen, fo ana bisa usiheni fas.

³Neukose mopo Israel manamasulu-mahapan, ma mopo Damsyik koasan-na. Hataholi Siria fo bei elak-kala, neukose laso'da lai nakamumulu-nakamamaek-ka dalek, sama leo hataholi Israel-la. MANETUALAIN Fo Manakoasa nde manakokolak-ka.”

⁴MANETUALAIN nafa'da nae, “Neukose fain-na losa, fo Israel mandela-masa'an nate'e, ma tetu-teman mopok-kana.

⁵Neukose Israel sama leo tinan-nai Refaim, fo gandum-ma nanaketu-kolu basak, de ela ka'da lumanak so.

⁶Sama leo ai setun-na, boan-na nanaseu basak, de ela ka'da boak de'ubee lai ndana pe'dan-nala, leondiak boe, nai Israel, neukose hataholi maso'dak ka'da lumanak. Au, Amak fo Israel MANETUALAIN-na, nde manakokolak-ka.”

⁷Nai faik ndia, neukose hataholi fali, fo noke tutulu-fafalik neu Manamakadada'dik-kana, fo Israel Manetualain malalao-malalafun-na.

⁸Neukose ala ta lamahena sila ue-osan buna-boan so'on, fo nde mei tunu-hotuk fo mamana tutunu boomenik-ka, ma lamatua daebafa Inak Asyera dodoki-dudulan.

⁹Nai faik ndia, kota-kota Israel fo, nanananeak no mahelek, neukose ala da'di batu manandefak fo nee-nee lino-linok, sama leo kota-kota fo hataholi Hewi ma hataholi Amori-la la'oelan, nai lelek lalai leme hataholi Israel-la mai.

¹⁰Israel, o mafandele heni Manetualain fo manasoi-tefa, ma manamasulu-mahapa o, sama leo lete batu matea-mahelek-ka so. Nasafalin-na, o sele o osi angol-mala soaneu lamatua daebafak-kala.

¹¹Tehu leomae bubu'u-palusa sila-la, lanupu tutik, ma labuna nai faik fo o selen-nana, tehu neukose ta hapu buna-boan fa. Fo hapuk-ka nde ka'da, toto'a-tataak-ka ma name'da he'dis fo, ta hapu mopo fan.

¹²Leoina mabe'i-balakaik-kala lakalupu; halan-nala ladodolo sama leo lii tasi matuaina nggun-na.

¹³Ala tutulumatak sama leo faa matuaina mai. Tehu Manetualain fes nasanene'da mahelek, boema ala lalai losa dook-ka. Sila nanausik, sama leo anin-na fuu neni ha'deuk-ka nai pupukuk-ka huun-na, do sangu fuu neni afu-a.

¹⁴Nai lelek le'donoso, ala leni bibii-namata'u matuaina, tehu nasafali lolebalahaak te, mopos so. Basa hataholi fo ala kalo ita, ua-nalen leondiak.