Read Termanu YESAYA 18 Bible Online

YESAYA 18 - Termanu bible

YESAYA 18

¹ Lama-bobo'i halan-nala nananamanenek, neme lee manai Sudan-nala selik mai.

²Nusaina hataholi nadedenun-nala, ala mai leme nusak ndia mai, lai ofa henak-kala dalek de ala tunga Lee Nil-la. Hai, hataholi nadedenuk dodole da'uk-kala lemin, fali lai-lai leo emi nusam fo, lee sila-la tunga tala'da ndia. Meni hala heheluk esa, soaneu o leoinam fo mabei-balakaik ma makadelek, o hataholim fo mademaina ma lou mangana'uk, ma basa daebafak-ka lala'en-na bii-lamata'us.

³Hai, emi fo manaleo daebafak-ka lemin! Taoafik leona, metema dedeo-la nananasa'ek lai letek-kala poin-na! Mamanene leona, metema pupuk-kala nanapuuk!

⁴MANETUALAIN nafa'da au nae, “Neme Au mamana leleong manai poin-na, neukose Au mete leo dae neu no nee-nee lino-linok ma neuanak, fo neuanan-na sama leo dinis fo ana da'di nai le'odae mato'bik-ka nai fai ketu-kolun-na, ma neun-na sama leo le'do-a haan-na nai fai lele'don-na.

⁵Beita losa fai aiboak-ka fa, lelek bunan-na kono so, ma angol-la boan-na beita namalatu nai huun-na fa, neukose musu tao nakalulutuk Sudan, mu'dak la'iesak-kana sama leo dope ke'diheni angol ndanak-kala, leme angol-la huun-na mai.

⁶Neukose basa solda'dun-nala popolan-nala nanala'o elak, fo ala da'di manupui fai hanas-sala nana'an, ma bana makaak-kala nai fai makalinin-na.”

⁷Neukose fain-na losa, tunu-hotuk-kala nanananduku-nalosak neu MANETUALAIN Fo Manakoasa, neme nusak ndia, fo lee-la tunga tala'da, neme leoinan fo mabe'i-balakaik ma makadelek, neme hataholin fo mademaina-la, ma lou mangana'uk, ma basa daebafak-ka lala'en-na bii-lamata'us. Neukose ala mai leo Pupukuk Sion-na, leo mamanak fo MANETUALAIN Fo Manakoasan nanasene-do'ok.