Read Termanu YESAYA 21 Bible Online

YESAYA 21 - Termanu bible

YESAYA 21

¹Hala heheluk la'eneu Babel nde ia: Sama leo kutus-sa nakamiu tunga moo maloa, leondiak boe, soe mamain-na neme nusak fo maneni bibii-namata'uk-ka mai.

²Au hapu ninitak la'eneu manada'dik-kala leni bibii-namata'uk; la'eneu nalelesik ma mamate-momopok. Tutulumatak, solda'du Elam-mala lemin, fo sapu leona! Hai solda'du Madai-la lemin, makahapi-man leona! Neukose Manetualain tao nate'e basa Babel tao doidosok-kala.

³Ninitak ndia, ana taon-na au apangamak, nalosa au ta hapu ita, do amanene so'on. Au bii-amata'u ma ame'da he'dis, sama leo inak manabongik-ka.

⁴Au daleng-nga ta tesa-tama fa; au ame'da bibii-namata'uk, de ana taon-na au dele. Le'odaek fo au ahiik-kana, ka'da neni dedele nuku-nukuk.

⁵Boeo au ita feta fo, nanasadia basak so; hataholi nanaka'ik-kala mamana tutuun-na, nanasadiak. Ala la'a ma linu. No kaiboik, paleta nananamanenek nae, “Hai malanga solda'du matuaina-la lemin! Mafafa'u emi babaa fanam-mala!”

⁶Boema MANETUALAIN nafa'da au nae, “Muu leona, fo pe'da manamanea esa, fo madenun nafa'da hata fo ana nitan.

⁷Metema ana nita solda'du manasa'e ndala-la, ala mai lakadadalak dua-duak, solda'du manasa'e keledei-la ma onta-la soona, muse ana mete matalololes.”

⁸Basa boema, manamanea ndia naloo bou-bou nae, “Tuan, au anea tunga faik, lele'dok ma le'odaek so.”

⁹ Mitak, ala mai so! Solda'du manasa'e ndala-la, ala mai dua-dua. Basa boema, manamanea ndia, ana fe halak-ka mai nae, “Babel tu'da so! Ala sene-do'ok dodoki-dudulak-kala, lakalulutuk de besenggela-besenggali lai dae lain.”

¹⁰Au leoinang fo Israel! O nanalulumu-eesek ma nanaheheta-aa'ik basak, sama leo gandum de'ek-kala. Besak ia, au tui-benga fe o, hala malole, fo au amanenen neme MANETUALAIN Fo Manakoasa, fo Israel Manetualain-na.

¹¹Hala heheluk la'eneu Esom nde ia. Hapu hataholi esa, naloo bou-bou neu au, neme Edom mai nae, “Hai manamanea nei, le'odaek ia, bei dook-ka hetu do? Bei ela li'u de'ubee seluk, fo besak-ka fafaik?”

¹²Boema au ataa ae, “Neukose fafaik-ka, ana losa, tehu le'odae boe. Metema o matane soona, mai leona, fo matane seluk.”

¹³Hala heheluk la'eneu Arab nde ia. Hai hataholi Dedan-nala lemin, o hataholi bubuam fo manasa'e onta-la, ala ofu lai dae Arab-pa, makatema dila-nggaun dale.

¹⁴Hai dae Tema, laun-nala lemin, fe nininuk neu hataholi manamaa ma'dak, fo ana mai neu o-a, fe nana'ak neu hataholi fo nalai la'oela nusan-na.

¹⁵Nana, ala lalai leme tafaina isin-na, leme kokouk fo nanahela nakapiik-ka mai so, ma leme natee-natatik dale mai.

¹⁶Boema MANETUALAIN nafa'da au nae, “Nai teuk esa seluk soona, leo Kedar-rala ua-nale malolen-nala, neukose nate'e.

¹⁷Kedar hataholi manakoun-nala nde been-na, hataholi fo balakaik ma makadelek. Tehu neukose, ka'da sila lumanak laso'da. Au, fo Israel MANETUALAIN, nde manakokolak-ka.”