Read Termanu YESAYA 24 Bible Online

YESAYA 24 - Termanu bible

YESAYA 24

¹Neukose MANETUALAIN tao nakalulutuk daebafak-ka, nalosa ana da'di dae tuuk ma nee-nee lino-linok. Neukose nasafali poin-na, ma Ana tao tapasasala laun-na.

²Neukose basa hataholi-la, ua-nalen-nala sama: Imam-imam ma laun, ata nanaasak ma tuan-na, manamase'ok ma manaasak, manafe totonak ma manatonak, kamasu'ik ma nuu taa-hata taak.

³Neukose daebafak-ka nggela-nggali, ma nanatao nakalulutuk. MANETUALAIN kokolak basa so, de tao leo bee-o, dede'ak ndia ana da'di.

⁴Daebafak-ka, ana da'di tuuk, ma ana male, basa daebafak-ka lala'en-na ta napena fa. Lalai ma daebafak-ka, sama-sama ta lapena fa.

⁵Daebafak-ka, da'di nanggenggeo, nanahu laun-na la'olena Manetualain paletan-nala, ala nggati nakeketun-na, ma lalelesi hehelu-balataak fo Ana taon no sila, losa dodoon-na.

⁶Hu ndia de, MANETUALAIN supa-soo basa daebafak-ka so, ma Ana huku laun-na, nanahu sila tatao-nono'in. Sila nanatao naputuk, de ka'da sila lumanak laso'da.

⁷Ai angol-la ta nalole fa, ma susa nanseli soaneu hapu angol oek. Hataholi fo makahulun-na, lamahoko-setelee, tehu besak ia, ala dale he'di.

⁸Kecapi liik fo maneni namahokok, ma rebana liik-ka, ta namanenen so'on. Hataholi manamamahoko-seteleek-kala, makalupu-makaseen nate'e so.

⁹Ta hapu hataholi ninu angol, boema nakamee so'on, ala-lalu da'di nininu makahe'duk ba'eneu hataholi maninuk-ka.

¹⁰Tasi'bu-a da'di nai basa kota lala'en-na; basa uma-la lelesun-nala nananggoek, nanahu uma isi-la bii-lamata'u.

¹¹Hataholi-la nggasi lai enok-kala, nanahu basa angol-la. Ta hapu namahoko-seteleek nai nusak ndia so'on, losa dodoon-na.

¹²Kota lutu-lutu so, ma lelesuina-nala, hea leu de, lalefu-le'ak.

¹³Manada'dik ndia nde, neukose ana da'di neu leoina esa-esak, nai basa daebafak-ka lala'en-na. Fo nde, sama leo nai faik fo ketu-seuk-ka, fo lelek, seu basa la'iesak ai setun-na boan-na, ma seu angol-la boa mate'en-nala neme huun-na mai.

¹⁴Hataholi maso'dak-kala, neukose lakamee no namahoko-seteleek. Hataholi manai muli-la, neukose ala tui-benga MANETUALAIN matua-mademan,

¹⁵ma hataholi manai dulu-la, neukose ala koa-kio MANETUALAIN. Laun manai tasi su'uk-ka, neukose namatutua-namadedema Israel Aman Manetualain.

¹⁶Nakamee kokoa-kikiok soaneu Israel fo, leoina manatunga paleta, nananamanenek neme daebafak-ka bu'un-na mai. Tehu soe ba'eneu au! Au aong-nga ta napena fa. Malelesik-ka, bei nalelesi nakandoo, nakalenak ala boetai lalelesik-ka.

¹⁷Mamanene leon, hai basa daebafak-ka laun-nala lemin! Tasi'bu, meo besik, hihi'ik, lahani emi.

¹⁸Hataholi fo, nalai neme tasibu-a mai, neukose ana tu'da leo meo besik dale neu, ma hataholi fo nala meo besik-ka deak, neukose hihi'ik-ka nalan. Neukose u'daina, ana po'a neme lalai mai, ma daebafak-ka buin-na nanggengo.

¹⁹Daebafak-ka natandala, nakalulutuk ma nanggengo,

²⁰Daebafak-ka naleu-lilok, sama leo hataholi manamafuk-ka, ma naleuk sama leo moa nai sangu dale. Daebafak-ka hea neu, nanahu sala-singon belan-na. Ana nakalulutuk, de neukose, ana ta fo'a falik so'on.

²¹Nai lelek ndia, neukose MANETUALAIN huku basa manakoasa lalai maloa, ma mane-manek manai daebafak-kala.

²²Neukose sila basa-basas nanatao nakabubuak sama leo hataholi bui-la lai bolok dale, ma nanataok leo bui dale leu, losa fain-na losa, soaneu nanahukuk.

²³Neukose bulak-ka makahatuk, ma le'do-a, ta nasalaa so'on, nana MANETUALAIN Fo Manakoasa, neukose Ana paleta da'di leo manek. Neukose Ana paleta nai Yerusalem, nai Pupuku Sion-na lain, ma natu'du matua-mademan neu basa anan-nala mauli-malangan-nala.