Read Termanu YESAYA 25 Bible Online

YESAYA 25 - Termanu bible

YESAYA 25

¹MANETUALAIN, O nde au Manetualaing-nga, au amatutua-amadedema O, ma au koa-kio O na'dem-ma nana O tatao-nono'im, dodoo doak-kana nanseli; O tutu'u basan, neme makahulun-na mai so, ma O tao matetun no lilinekak.

²Au tao akalulutuk kota ndia so; kota makota musuk ndia, ana da'di ai-batu nananaunuk, uma manek fo, hataholi nusa dea-la lafofo'ak-ka, mopok-kana so, ma ta nananafofo'a falik so'on, losa dodoon-na.

³Neukose leoina mabe'i-balakaik-kala, koa-kio O, ma nanabii-namata'uk nai leoina fo, ha'da hataholi tak-kala, kotan-nala.

⁴Nana, O da'di mamana nalaik ba'eneu hataholi tapandoes-sa, mamanak fo, nee-nee lino-linok ba'eneu hataholi nuu taa-hata taak-ka O nde been-na nasulu-nahapak neu ani sangu, nasulu-nahapak neu le'do mahaak-ka. Nanahu hataholi ba'u nasa-la sapu-la sama leo ani sangu nai fai oe faan-na

⁵sama leo ani mato'bik-ka, nai dae tuuk-ka. Tehu O taom-ma, ami musum-ma ta buka bafan-na fa, O tao mate'e hataholi, ha'da hataholi tak-ka eekin-na, sama leo ko'a bubuak-ka, tao namopo le'do haan-na.

⁶MANETUALAIN Fo Manakoasa, neukose Ana sadia feta soaneu basa leoina manai daebafak-ka, nai Pupuku Sion-na. Neukose Ana sadia nana'ak fo, mala'da hiik nanseli, ma angol nanahehelek.

⁷Nai pupukuk ndia lain, neukose Ana siluheni ko'a dale he'dik fo, manapotin-na leoina-kala.

⁸ MANETUALAIN Fo Manakoasa, neukose tao namate-namopo mamates-sa, losa dodoon-na! Neukose Ana loseheni luuoe-a neme basa mata-panak lala'en-na mai, ma nadook nakamumulu-nakamamaek fo, anan manai daebafak-ka lala'en-na, lu'a-lepak-ka. MANETUALAIN kokolak basa so, de tao leo bee-o, dede'ak ndia ana da'di.

⁹Nai lelek ndia, neukose hataholi-a nafa'da nae, “Te'e-te'e, Ndia nde, ita MANETUALAIN-na; Ndia nde, ita tahanik-ka fo ela ita nanasoi-tefak. Te'e-te'e, Ia nde MANETUALAIN-na; Ndia nde, ita tahanik-ka. Besak ia, ata eeki-tatadale, nana Ana soi-tefa basa ita so.”

¹⁰ Neukose MANETUALAIN nasulu-nahapa Pupuku Sion-na, tehu Moab, neukose nanaheheta-aa'ik, sama leo ha'deaik-ka nai mamana kadafuk-ka.

¹¹Neukose laun-na look liman-na, sama leo hataholi fo, ana sanga suik. Tehu neukose, MANETUALAIN nakadadaek sila fo, manakoao-ndaeaok-kala, nalosa mopo be'i-balakain.

¹²Neukose Ana tao natu'u Moab kota musun-nala, ma papala nanadama mademainan-nala, fo Ana tapas leo dae lain neu, losa lakalulutuk sama leo afu-a.