Read Termanu YESAYA 28 Bible Online

YESAYA 28 - Termanu bible

YESAYA 28

¹Soe ba'eneu kota fo, basa manamafuk Israel-la dalen-nala lamatua neun! Lole-napun hii-hii nae mopon, sama leo bunga fo, ana male nai sila langan lain. Soe ba'eneu kota mademaina, nai pupukuk lain, nai bafak malolek-ka tala'da, henuk no maninu angol fo, langan-nala he'dis-sa so

²Neukose MANETUALAIN nadenu hataholi balakaik, ma ao makadelek esa. Mamain-na sama leo sangu-a sama-sama no u'da eis-sa, sama leo u'da ina ma faa manenik-ka.

³Mauli-malangan fo, manamafuk sila-la, ti'ilanga mandela-masa'an-na, neukose nanaheheta-aa'ik.

⁴Sila kota nananita-nalelak fo, sanga nae mulai mopon ndia, neukose mopok-kana. Ua-nalen, sama leo ai kaa boak, fo beita losa fai namalatun-na, ua-nalen; hataholi nitan tutik-ka, ana seu-nan, fo na'an.

⁵MANETUALAIN Fo Manakoasa, neukose Ana da'di bunga mana'ahiik, ba'eneu Anan fo, bei elak-kala.

⁶Neukose MANETUALAIN fe ndoos ma matetuk-ka neu basa manakee-manafula-la, ma napalanik neu hataholi fo, manahapu bela-ba'uk fo lanea kota neme musu mamain-na.

⁷Boeo nabi-nabi ma imam-imam fo ala mafuk, nanahu linu ala-lalu ba'uk-ka naseli. Ala la'ok laleu-lilok, ma lakatunu bee poko nanahu dudu'a-aafin-nala sese'do-babalik so. Nabi-la, ta lalelak ninitak fo, Manetualain fen neu sila, sosoa-ndandaan so'on. Imam-mala ta hapu laketu-lala'di dede'a-dede'ak fo, nanakalaak neu sila so'on.

⁸Sila mein-na, henuk no mutas-sa, nalosa ta hapu mamana balisi so'on.

⁹Ala haladoi la'eneu au lae, “Naedaenga, ndia nanoli see? Boeo, see kande, paluu ndia nanolin-na? Dale dodoon-na, ita ia, ni'iana kalafina beuk do?

¹⁰Nana muse ia, muse ndia, muse leoiak, muse leondiak, popo-tama ia, popo-tama ndia.”

¹¹ Metema, emi ta nau mamanene au fa, soona neukose MANETUALAIN nadenu hataholi nusa dea esa mai, fo nanoli emi dede'a nusa dea.

¹²MANETUALAIN fe emi basa-basam-mala, mamana hahaeaok, tehu emi ta nau mamanene fan.

¹³Hu ndia de, neukose emi mamanene MANETUALAIN hala-kokolan-na, nae leo ia: “Muse ia, muse ndia, muse leoiak, muse leondiak, muse popo-tama ia, muse popo-tama ndia!” Ma nai lelek emi la'ok, emi tu'u malelenga la'da, nalosa emi makahina, mala hihi'ik dale ma nanafook.

¹⁴Mamanene hata fo, MANETUALAIN nafa'dan, hai manahakinonolik, fo manapaleta laun manai Yerusalem-ma lemin!

¹⁵Emi mafa'da basa, mae emi tao hehelu-balatak mo mamates-sa, ma emi mala halak mo hataholi manamatek-kala, daebafan-na. Emi mame'da mae tao leo bee-o, soe fo manamaik ndia, neukose ana ta tuni la'e emi fa, nanahu emi pake eno tipu-daik, soaneu masulu-mahapa emi aoinam-ma.

¹⁶ Hu ndia de, MANETUALAIN Fo Mademainan-nafa'da nae leo ia, “Neukose, Au tao uma latek fo, matea ma mahelek nai Sion; batu bu'uk kabelik esa, fo nanasulak nai batu ndia nae, ‘See fo namahehelena matea-mahelek soona, neukose ana ta nau kala fa.’

¹⁷Au tao ndoos ma matetuk-ka, da'di tali uukuk, ma Au tao dale ndoos-sa da'di tali sipak.” Neukose u'da batu-a, ana sasapu balisi basa masapepeko-masandandalik fo, emi dalem-ma natea neun ndia. Neukose faa, ana ba'u neni emi mamana keke'kem-ma.

¹⁸Emi hehelu-balataam mo mamates-sa, ma emi mala halak mo hataholi manamatek-kala daebafan-na, neukose ta da'di fa, nalosa, metema soe-a ana mai soona, emi lutu-lutu, nanahu nanaheheta-aa'ik.

¹⁹Neukose soe-a, tuni-ndeni emi tataas esa, de emi muse lu'a-lepan tunga faik, fafaik, le'dohanak ma le'odaek. Metema emi malelak Manetualain hala hehelun-na soona, neukose emi bii-namata'u.

²⁰Emi sama leo hataholi fo, ana nau nangape'uk nai pepe'uk keke'uanak, fo nakandoo ein-na. Emi lafa nalu'en-na, ta maloa fa.

²¹ Neukose MANETUALAIN fo'a, sama leo nai Letek Perazim-ma. Neukose Ana ulepo'de, sama leo nai Bafak Gibeon-na, soaneu nakalala'ok dale tutu'un-na, dale tutu'un fo, hataholi daebafak-ka, dodoo doak-kana! Neukose, Ana nakalala'ok tatao-nono'in fo hataholi daebafak-ka, dodoo doak-kana ndia.

²²Au amanene basa Manetualain Fo Mademaina ma Manakoasa, nakeketun-na, soaneu Ana tao namate-namopo nusak-ka lala'en-na. Boso makamuu-makadau hala-kokola nasanene'dak fo, au anduku-alosak-kana ia. Mahani te, neukose ta mu'dak ba'eneu emi, fo maladeak fa.

²³Mamanene au hala-kokolang, ma taoafik neu au hala hehelung-nga.

²⁴Ade tunga faik, hataholi-a nakauuk, foi dae, ma ana saa-saa natetu daen-na, fo ana sele-nggali do?

²⁵Metema ana tao natetetu basa daen ndia soona, besak-ka ana sele-nggali bini-ngges neu, fo nde: Jintan nggeok, ma jintan fulak. Ana sele nakadadalak gandum matak dua, boema ana sele bubu'u-palusa fe'ek neu su'un-nala.

²⁶Ana foi-fala nalelak-kana, nana ndia Manetualain-na, nanoli basan so.

²⁷Ana ta fepa jintan nggeok-ka nenik sapi-la ai lukun-na fa, do po'de jintan fulak-ka nenik gelobak-ka ein-na fa. Hu ndia de, ana pake aitete'ek da'uanak.

²⁸Ade lelek hataholi fepa gandum na, ana fepan losa nakalulutuk do? Ta! Hataholi ta fepa nakandondoo henin losa nakalulutuk fa. Ma leomae hataholi fe gelobak-ka ein-na no ndala manahela gelobak-ka, la'ok tunga gandum ndia lain, tehu neukose, hataholi ta loli gandum ndia, losa de'en-na nakalulutuk fa.

²⁹Manatee-tenok ndia, ana mai neme MANETUALAIN Fo Manakoasa mai. Basa MANETUALAIN dale tutu'un-na, manatee-tenok, de neni buna-boak tataas esa.