Read Termanu YESAYA 36 Bible Online

YESAYA 36 - Termanu bible

YESAYA 36

¹Hizkia, mane Yehuda paleta neu teuk-ka sanahulu haan-na boema, Sanherib, fo mane Asyur-ra, sapu-na kota-kota Yehuda fo, makota musuk-kala, de ana sengis.

²Basa ndia boema, nadenu malanga solda'du matuainan-na, no solda'du makadotok nanseli, leme Lakhis leo Yerusalem leu, fo lakaseti Hizkia, fo ela nakatele neu ndia. Ala losa kota ndia boema, ala ho'i mamanak nai tina fo, loken lae, Tina Penatu, deka no oelolok fo oen-na ana faa neme lifu manai lain-na mai.

³Boema Hizkia hataholi mana'a ngga'din telu, ala mai latongo lo malanga solda'du matuaina ndia. Hataholi mana'a ngga'di ka teluk sila-la nde, Hilkia anan Elyakim, fo uma manek-ka malanga uma loon-na, Sebna, fo nusaina hataholi manasulak susulan-na, ma Asaf anan Yoah, fo uma manek-ka, hataholi manasulak susulan-na.

⁴Asyur malanga solda'du matuainan ndia, nafa'das nae, “Manduku-malosak mane Asyur-ra halan ia neu Hizkia mae, ‘Tao le'e de, o dodoo mae, o mabe'i-balakaik?

⁵O maedaenga, ka'da no hala-kokolak-ka mesak-kana, fo o hapu nggati ke'di-ndiu-ka nenik solda'du-la be'i-balakain do? O masalai o deam-ma neu seek-ka, nalosa o mapalani la'ban Asyur?

⁶ Memak, o mamahena Masir tutulu-fafalin, tehu ndia sama-na leo o pake fii doon-na, da'di aitete'ek; — mahani te, neukose aitete'ek ndia la'din, fo ana pau o limam-ma. Leondiak boe, ba'eneu basa hataholi fo, lamahena neu manek Masir-ra.’ ”

⁷Basa boema, Asyur malanga solda'du matuainan ndia, nafa'da nae, “Do fafa'kama emi mafa'da, mae emi mamahena neu emi Amam MANETUALAIM-ma do? Nai lelek fo, Hizkia fe paleta, fo ela hataholi Yehuda-la ma hataholi Yerusalem-mala, ka'da ala sene-do'ok nai mei tunu-hotuk manai Yerusalem-ma matan-na. Ade nanatao nakalulutuk ndia, ta nde mei tunu-hotuk-ka, ma mamana sene-do'ok neu MANETUALAIN mesak-kana, hetu do?

⁸Besak ia, no mane Asyur-ra na'den-na, au apalani ape'dak, ae metema fe emi ndala lifun dua soona, tao leo bee-o emi hataholim-mala, ta de'u basa ndia, fo ala sa'e basa ndala sila-la fa.

⁹Soaneu la'ban Asyur malanga solda'du manai dae-la boeo, emi ta mapalani fa. Tehu emi boeo mamahena Masir tulu-fali emi nenik kaleta musu, ma solda'du manasa'e ndala!

¹⁰Emi maedaenga, ami sapu-ma emi nusam-ma, de ami sengin ndia, ta no MANETUALAIN tutulu-fafalin fa do? MANETUALAIN nde nadenu ami meu sapu-man fo tao makalulutuk-kana.”

¹¹Boema Elyakim, Sebna, ma Yoah lafa'da Asyur malanga solda'du matuainan ndia lae, “Tuan, kokolak dede'a Aram moo ami, te ami malak-kana. Boso kokolak menik dede'a Ibrani, te neukose laun manai kota ndia papala nanadaman lain-na, lalelak-kana.”

¹²Boema Asyur malanga solda'du matuainan ndia nataa nae, “Ade au tuang-nga nadenu au mai fo, au kokolak dede'a-kokolak ia-la, ka'da neu emi tuam-ma, ma neu emi do? Au kokolak o laun fo, langatuuk lai papala nanadamak lain ndia, fo sama-sama lo emi, neukose mi'a seluk emi teim-mala, ma minu seluk emi moem-mala.”

¹³Basa boema, malanga solda'du matuaina ndia fo'a napadeik, de ana eki nenik dede'a Ibrani nae, “Mamanene hata fo, mane Asyur-ra nafa'dan,

¹⁴‘Boso sipok Hizkia ke'di-ndiu emi! Ana ta hapu soi-tefa nala emi fa!

¹⁵Boso mamanene fufu'di-oo'don, soaneu mamahena neu MANETUALAIN. Boso maedaenga, neukose MANETUALAIN soi-tefa emi, do napanggee solda'du Asyur-rala, fo ala boso loso-la emi kotam-ma.

¹⁶Boso mamanene Hizkia! Au, fo mane Asyur-ra adenu, fo ela emi kalua meme kota dale mai, fo makatele neu au. Mahani te, neukose emi bole mi'a angol boak, neme emi osi mesam-ma mai, ma emi mi'a mita kaa boak, neme emi ai kaa mesam-ma mai, boema emi minu oe, neme emi oedolu mesam-ma mai,

¹⁷losa emi lali leo nusak esa meu, fo hihii nae sama leo emi nusa mesam-ma. Nai naa, hapu osi angol, fo nabuna-naboa fe emi angol, ma tina gandum, fo nabuna-naboa fe emi, ha'desopuk, fo da'di emi nana'am-ma.

¹⁸Boso mamanene Hizkia! Te ka'da ana ke'di-ndiu emi, nenik nafa'da nae MANETUALAIN neukose soi-tefa-nala emi. Ade, leoina fe'ek, lamatua daebafa-na, ana soi-tefa hai nusan-na, neme au koasang-nga mai so do beik?

¹⁹Nusa Hamat ma Arpad-ta, lamatua daebafan-na nai bee? Lamatua daebafak Sefarwaim-ma, nai bee? Ade ana mai soi-tefa Samaria do?

²⁰Lamatua daebafak beek-ka nde, ana soi-po'i hai nusan-na, neme au koasang-nga mai so do? Masa bole MANETUALAIN soi-tefa-na Yerusalem!’ ”

²¹Laun Yerusalem-mala lamanene dede'ak ndia, te ta lataa fa, nana Manek Hizkia paleta basa, fo ela ka'da ala bedenge.

²²Boema Elyakim, Sebna, ma Yoah sii-sii lulu'i bua papaken-nala, fo da'di ta'du-tana dale he'dik, boema leu lafa'da manek-ka, hata fo Asyur malanga solda'du matuainan ndia, kokolak basan so.