Read Termanu YESAYA 37 Bible Online

YESAYA 37 - Termanu bible

YESAYA 37

¹Nai lelek Manek Hizkia namanene hataholi ka teluk sila-la, hala nafa'dan-na boema, ana sii heni bua papaken-na, de ana pake si'di lafa lapik, da'di neu ta'du-tana dale he'dik, boema neu leo MANETUALAIN Uman neu.

²Basa boema, nadenu Elyakim, fo uma manek-ka malangan-na, Seba, fo nusaina hataholi manasulak susulan-na, ma basa imam fo, lanuu nangatutuuk nai manapaleta dalek, fo leu latongo lo Nabi Yesaya, fo Amos anan-na. Sila boeo pake si'di lafa lapik.

³Ala landuku-lalosak Hizkia hala hehelun-na nde ia, neu Yesaya, “Faik ia, fai susa; ita nanahukuk ma nananakamumulu-nakamamaek. Ita sama leo inak fo, ana sanga bongi, tehu balakain ta so.

⁴Manek Asyur-ra, nadenu basa malanga solda'du matuainan-na so, fo nakamumulu-nakamamaek MANETUALAIN fo maso'dak-ka. See bubuluk, fafa'kama Manetualain namanene basa nakamumulu-nakamamaek ndia so, de neukose Ana huku hataholi manakokolak-ka! Hu ndia de, hule-haladoi leon neu Manetualain, soaneu ita hataholin fo bei maso'dak-kala.”

⁵Lelek Yesaya sipo-na Manek Hizkia hala hehelun ndia boema,

⁶nadenu basa hataholi nadedenuk sila-la, landuku-lalosak hala heheluk ia, nae, “MANETUALAIN nafa'da nae, ama manek boso bii mamanene, mane Asyur ndia atan-nala hala nafafa'dan fo, nae MANETUALAIN ta hapu soi-po'i ita fa.

⁷Neukose, MANETUALAIN taon-na mane Asyur-ra taoafik neu hala anin esa, nalosa ana fali leo nusan-na neu, fo neukose nanataonisak nai naa.”

⁸Asyur malanga solda'du matuainan ndia, hapu halak lae ndia manen-na, ana la'oela Lakhis so, de natee-natati la'ban kota Libna, fo ta dook-ka neme ndia mai fa. Boema neu leo naa neu, fo natongon-no manen ndia.

⁹Manek Asyur-ra, ana sipo basa halak lae Tirhaka neme Sudan mai, nauli-nalanga solda'du Masir-rala de ala mai fo, ala sapu-la sila. Hu ndia de, manek Asyur-ra, haitua fe Hizkia fo manek Yehuda susulak.

¹⁰Susulak ndia liin-na, nae leo ia, “Boso nau Manetualain fo o mamahelek ndia, Ana ke'di-ndiu o, nae neukose o ta tu'da leo au limang dale mai fa.

¹¹O mamanene basa, lae nusak bee fo mane Asyur-rala, sapu-lalas soona, ala tao lakalulutuk la'iesak-kasa. Boso mamahena mae, o bisa mala deak.

¹²Nai lelek, au bei-ba'i kaing-ngala, ala tao lakalulutuk kota Gozan, Haran, ma Rezef-pa, boema ala taolisa hataholi Eden fo, manaleo lai Telasar-ra, sila lamatua daebafan-nala ta esa boen, soi-tefa fas.

¹³Manek kota Hamat, manek kota Arpad, manek kota Sefarwaim, manek kota Hena, ma manek kota Iwa, lai bee?”

¹⁴Hizkia sipo-na susulak ndia, neme hataholi nadedenuk-kala mai boema, ana lees-sana. Basa boema, neu leo MANETUALAIN Uman neu, de nakapepela susulak ndia neu MANETUALAIN matan-na,

¹⁵boema, ana hule-haladoi nae,

¹⁶ “MANETUALAIN Fo Manakoasa, fo Israel Manetualain-na, fo nangatuuk nai kerub lain, Ka'da O mesa-mesam-ma nde Manetualain, fo koasa basa nusak manai daebafak-ka lala'en-na. O nde makadada'dik lalai ma daebafak-ka.

¹⁷MANETUALAIN, sa'di leo been-na, taoafik neu hata fo, ana da'di neu ami. Mamanene basa Sanherib nakamumulu-nakamamaen neu O, Manetualain fo maso'dak-ka.

¹⁸Ami basa-basam-mala bubuluk MANETUALAIN, mae manek Asyur-rala tao lamate-lamopo leoina makadotok, ma ala tao lakalulutuk nusan-nala.

¹⁹Ala hotuheni, ma ala tao lakalulutuk lamatua daebafan-nala boe, nana lamatua daebafak sila-la, ta lanuu koasa makandondook fa. Sila ka'da ai-batu nanadoki-dulak, fo hataholi daebafak-ka nde taon-nana.

²⁰Ou, ami MANETUALAIN po'i ami neme hataholi Asyur sila-la mai, fo ela basa leoina manai daebafak-ka lala'en-na, ala bubuluk lae ka'da O mesa-mesam-ma nde MANETUALAIN-na.”

²¹Basa boema, Yesaya haitua fe Manek Hizkia hala heheluk, nae fo da'di leo natataak neu manek-ka huhule-haladoin,

²²de MANETUALAIN nafa'da nae, “Kota Yerusalem-ma hika, ma hakinonoli o, Sanherib!

²³Ade, o bubuluk see kande o dodoki-aalin, ma o makamumulu-makamamaek-kana ndia do ta? Au, fo Israel Manetualain-na, Manetualain fo malalao-malalafuk-ka.

²⁴O madenu hataholi neu fo ana kokolak bafa louk, nae no o kaleta musu makadotom-mala, o sengi letek fo, deman-nala seli, nai Libanon. O koao-ndaeao, mae o lo'oheni, basa ai kaiou fo madema nanseli, ma mana'ahiik nanseli, boema o tola tunga nula manggiok-kala tala'da.

²⁵O boeo, koao mae o kali oedolu, ma o minu nusa dea-la oen-na, ma o mae o solda'dum-mala, ala heheta-aa'i Lee Nil-la losa ma'dan.

²⁶Ade o beita mamanene hai, lae basa sila-la, Au tutu'u basan neme makahulun eli mai so do? De besak ia, Au tao atetun. Au nde fe o koasa, soaneu tao makalulutuk kota-kota fo lanuu kota musu, de ala da'di ai-batu manatapasasalak.

²⁷Hataholi manaleo manai naa-la, ta so'uk langan-nala fa; ala nggenge ma ala bii-lamata'u. Sila sama leo, na'u manai mook-ka, do na'u manamolik manai uma kalan-na, fo metema ani timu mato'bik-ka, ana fuun soona, namatuu.

²⁸Tehu Au bubuluk basa hata lala'en-na, la'eneu o aoinam-ma. Au bubuluk o tao beek, ma o leo bee muu. Au bubuluk, ae o mamanasa Au ba'un-na seli,

²⁹ma Au amanene basa, la'eneu o nasa-melum, ma o koao-ndaeaom ndia so. Besak ia, Au tao ai kakaik neu o panam-ma, ma lapa neu o bafam-ma, fo ela Au hela falik o, tunga lelek o mai fo, o tunga enok-ka.”

³⁰Yesaya haitua fe Hizkia, hala heheluk ia boe nae, “Neukose manada'di ta'du-tana neu o-a, nde ia. Teuk ia, ma teuk manamaik-ka, neukose hataholi-a, na'a gandum manamoli aok-ka. Tehu basa ndia soona, ala hapu sele gandum, ma angol, fo la'a lita buna-boan.

³¹Hataholi Yehuda bei maso'dak-kala, neukose so'dan-nala tetu-temak, sama leo bubu'u-palusa fo okan-na tola losa demak-ka de ana fe buna-boak.

³²Neukose hapu hataholi maso'dak nai Yerusalem, ma nai Lete Sion-na lain, nana MANETUALAIN Fo Manakoasa naketu basa, nae dede'ak ndia, neukose ana da'di.

³³MANETUALAIN nafa'da la'eneu manek Asyur-ra, nde ia: ‘Neukose ana ta masok Yerusalem, do ana kou kokou isin-na leo kota ndia neu fa. Ta hapu solda'du manapake babaa fanak esa boen, neu deka no kota ndia fa, ma ala ta tao mamana nafunik, okofeo fan.

³⁴Neukose manek Asyur-ra fali tunga enok fo, lelek ana mai fo, ana tunga enok-ka, de ana ta masok kota ndia fa. Au, fo MANETUALAIN, nde manakokolak-ka.

³⁵Neukose Au asala'e, ma asulu-ahapa kota Yerusalem-ma, hu kande Au na'deng-nga mesak-kana, ma hu kande Au hehelu-balataang o Au atang Dauk.’ ”

³⁶Le'odaek ndia boe, MANETUALAIN ata nusa so'dan-na, ana mai leo hataholi Asyur-rala ofun-na neu, de ana taonisa solda'du lifun natun esa faluhulu lima. Balahaa fafaianak te, popolan-nala lalefu-le'ak.

³⁷Boema, Sanherib, fo manek Asyur-ra, nakadedeak, de ana fali leo Niniwe neu.

³⁸Nai faik esa, fo nai lelek ana bei sene-do'ok nai Lamatua Daebafak Nisrokh-ka uma sosongon dale, te anamanen Adramelekh ma Sarezer, tatilisan nenik tafaina. Basa ndia boema, lalai leo Ararat leu. Anamanen fe'en esa, na'de Esarhadon, nggatin da'di manek.