Read Termanu YESAYA 38 Bible Online

YESAYA 38 - Termanu bible

YESAYA 38

¹Bei nai lelek ndia boe, Hizkia tu'u he'dis, de isabain-na maten. Boema, Nabi Yesaya, fo Amos anan-na neu dongen de nafa'da nae, “MANETUALAIN helu nae, Ama Manek tao makababasak basa ito-atok lala'en-na, nana neukose Ama Manek ta lea-hai fa. Ta dook-ka so'on te, neukose mate Ama Manek so.”

²Hizkia lepos, de nasale leo papala nanadamak-ka neu, de ana hule-haladoi nae,

³“MANETUALAIN, mafandendelek te, au ia, alalau-aoono basa O no lilinekak ma no dale ndoos so. Au sanga enok tataas esa, fo tunga O hihii-nanaum.” Boema, Hizkia kii no dale he'dik.

⁴Yesaya la'o boema, MANETUALAIN nadenun

⁵fo ana fali ne'un leo Hizkia neu, fo nanduku-nalosak hala heheluk-ka nde ia nae, “Au, MANETUALAIN fo, o ba'i kaim Dauk sene-do'ok-ka, amanene basa o huhule-haladoim, ma Au ita o luuoem-ma so. Neukose, Au bei fe o maso'da seluk, teuk sanahulu lima bai.

⁶Neukose, Au soi-po'i o, ma kota Yerusalem-ma, neme Asyur-ra mai. Neukose, Au asulu-ahapa ahele kota ndia.” Boema, Yesaya nadenu hataholi kekenok kaa boak, de ana losen neu Hizkia bisungguman-na, fo ela ana lea-hai. Boema Manek Hizkia natane nae, “Ade, ta'du-tanan nde bee, fo nae neukose MANETUALAIN nakahahaik au, ma nae au hapu u leo MANETUALAIN Uman u?”

⁷Boema, Yesaya nataa nae, “MANETUALAIN fe Ama Manek ta'du-tana nde ia, nae Ana tao natetu hehelu-balataan.

⁸Neukose MANETUALAIN taon-na, Manek Ahas-sa tao li'u, fo ana pake le'do-a salaon-na ndia, nakadedeak nggani eik sanahulu.” Boema salaok manai li'u ndia, nakadedeak nggani eik sanahulu.

⁹Hizkia lea-hai boema, ana sulak nakamee kokoa-kikiok ia:

¹⁰“Au afa'da ae, Au teunga besak-ka ba'e duak te, au muse la'o, fo au akababasak au maso'dang fo bei elak-ka, nai hataholi manamatek-kala daebafan-na.

¹¹Au afa'da ae, au ta akanae MANETUALAIN nai daebafak-ka so'on, do au ita hataholi daebafak-ka, nai daebafak ia fa.

¹²Ketu au ani hahaeng-nga, au fai mamateng-nga losa, sama leo manafoo-a, ana ofe heni lalaa teman-na; sama leo temak-ka nanake'di henik, neme tetenuk lain mai; au aedaenga, neukose Manetualain tao nate'e au so'dang-nga.

¹³Le'odae katemak esa, au akadii-akau, nanahu ame'da he'dis, nono'kabai singa esa, ana hengu nakalulutuk au duing-ngala; au aedaenga, neukose Manetualain tao nate'e au so'dang-nga.

¹⁴Au halang-nga, boetai namaanak-ka, ma ta balakaik-ka fa, au hoo-nggu'u, sama leo manupui kalua. Au matang-nga namakai, nanahu au anganalo leo lalai u, MANETUALAIN, soi-po'i au eme toto'a-tataak ia mai

¹⁵Au bisa afa'da ae le'e? MANETUALAIN tatao-nono'in ia; Au ta hapu sungu fa, nanahu au daleng-nga he'dis-sa.

¹⁶Ou MANETUALAIN, fe au aso'da inik O dede'a-kokolam, ma O tatao-nono'i ma, nemen-na fo, au aso'da ka'da soaneu O.

¹⁷Neukose au dale he'ding-nga, nasafali da'di dale manatesa-tamak, O soi-tefa mala au eme soe-a mai; O fe do'o do ampon, neu basa au sala-singong-ngala mai.

¹⁸Ta hapu hataholi koa-kio O, nai hataholi manamatek-kala daebafan-na fa, hataholi manamatek-ka, ta hapu namahena O lilinekam fa

¹⁹Ka'da hataholi maso'dak-ka, ana koa-kio O, sama leo au tao-no'in nai faik ia. Ina-amak tui anan-na O lilinekam ba'un-na seli, ou MANETUALAIN.

²⁰MANETUALAIN, O taom-ma au lea-hai so, de ami makamee nakamee kokoa-kikiok nai O umam, nenik kecapi liik, nai ami fai maso'dam-ma dalek.”