Read Termanu YESAYA 41 Bible Online

YESAYA 41 - Termanu bible

YESAYA 41

¹Manetualain nae, “Bedenge leon fo mamanene Au, hai laun manai nusa dook-kala lemin. Maheheleaom, fo meu leo manakee-manafula meu tutulumatak fo, kalaak emi dede'am-ma. Mai fo, ata takabubua tala halak esa, soaneu taketu-tala'di, see ndoos ma see sala.

²See kande, nadenuk manakoasa neme dulu mai, de ana fen sengi, nakandondoo henin? See kande, fen sengi leoinak-kala, ma mane-manek-kala, lakatele neun? Tafainan-na, taon-nalas ala lapu sama leo afu-a, kokou isin-na, tao tapasasalas sama leo anin-na fuu neni ha'deaik-ka.

³Ana usi nakandoo, ma ana tutulumatak, de ta hapu manamapangge-ngge fa; ei hahain-na lai-laik, hihii nae, ta deta la'e enok-ka fa.

⁴See kande, tao basa sila-la? See kande, naketu tutuik-ka eno-ma'an? Au, MANETUALAIN, Au nde makasososak-ka, ma ahele losa mate'en-na.

⁵Laun nusa dook-kala lita hata fo Au tao basan so Ala nggenge, ma ala dele betoo, nanahu bibii-namata'uk-ka, boema, lakabubua sama-sama, de ala mai.

⁶Basa hataholi-la, latulu-lafaliao, ma esa natetea-nahehele esa dalen-na.

⁷Tuka ai, natetea-nahehele tuka lilopilas-sa dalen-na, hataholi manatutu liti nenik besi tututuk-ka, koa-kio hataholi manatutuk manai besi tututuk lain-na. ‘O ue-le'dim malole nan seli’; boema, ana paku nahelen nenik pakuk, fo ela boso nalengo.

⁸ Tehu o, Israel, Au atang, fo Au ana heheleng-nga, o tititi-nonosik neme Au tia-laing Abraham mai.

⁹Au ho'i basa o, neme daebafak-ka bu'u-bu'un-nala mai so, Au aloo o, neme mamanak fo, doon-na seli. Au afa'da ae, ‘O nde Au atang-nga; Au ta tipa Au ana heheleng-nga fa.’

¹⁰Boso bii, nana Au sama-sama o o, boso bii, nana o Manetualaim-ma nde Au. Neukose, Au tao atea-ahele o, ma Au tulu-fali o, Au hela-nole o, nenik Au lima ua-nale maloleng-nga.

¹¹Mete leona, te basa hataholi fo lamanasa o-a, neukose ala mae, ma na'den-nala langgenggeo. Hataholi manala'ban o-a, neukose mate-mopon, fo mopon.

¹²Neukose, o sanga hataholi manala'ban o-a, tehu o ta hapu fas. Hataholi fo latee-latati lo o-a, besak ia, mate-mopos, ma mopos so.

¹³Nana Au Amak, fo o MANETUALAIM-ma, ho'u o lima konam-ma; Au afa'da ae, ‘Boso bii, te neukose Au tulu-fali o.’ ”

¹⁴MANETUALAIN nafa'da nae, “Israel, boso bii, leomae o anak-ka, ma tapandoes. Au nde MANETUALAIN, fo manatulu-fali o, Fo Israel Manetualain Malalao-malalafun nanseli-a, nde been-na, o manasoi-manatefam.

¹⁵Mete leona, te Au tao o da'di papa kee-keek, fo beuk, matane ma nisin dua, lakadadalak. Neukose o kee-kee letek-kala, ma o tao makalulutuk-kasa; o tao pupukuk-kala da'di sama leo ha'deuk-ka.

¹⁶Neukose o da'is, boema anin-na fuu nenis ma sangu-a, tao nalas tonggela. Neukose o mamahoko-setelee, nanahu Au, fo MANETUALAIN, ma nanakoa-nanakiok, nanahu Au, fo Israel Manetualain-na.

¹⁷Metema, Au leoinang fo, ua-nale poke-pakek ndia sanga oe, ma botolii koko'don-na namatuu, nanahu maa ma'dak-ka, soona Au, fo MANETUALAIN, neukose ataa sila huhule-haladoin; Israel Manetualain-na, neukose Ana ta la'oela anan-nala fa.

¹⁸Au tao-a lee-la, ala faa lai pupukuk fo, na'u tak-kala; ma neukose oemata, nasapula mai, nai masadokek-ka tala'da. Neukose Au tao moo solokaek-ka, da'di dano; neukose oe-a faa neme dae tuuk-ka mai.

¹⁹Neukose Au sele ai kaiou, ai setun, ma ai murad-ta, ma ai akasia lai moo solokaek-ka. Neukose Au tao moo maloa, da'di nula, nula eru, berangan ma kaiou.

²⁰Soona basa hataholi-la litan, ma ala bubuluk lae Au, MANETUALAIN nde manataok-ka. Neukose ala taoafik, ma lamahele Israel Manetualain malalao-malalafun-na, nde manamakadada'ik-kana.”

²¹MANETUALAIN, fo Israel manen-na, nafa'da lamatua daebafak-kala nae, “Kalaak emi dede'am-ma, ma mafa'da emi buti-butim-mala!

²²Mai leona, fo mafa'da ela, hata fo neukose ana da'di, fo ela ami bubuluk, mate'en-na leo beek Mafa'da manada'di makahuluk-kala leona, mafa'da mangalele'do sosoa-ndandaan, fo ela ami taoafik neun.

²³Mafa'da hata fo, neukose ana da'di, fo ela ami bubuluk, te'e-te'e emi lamatua daebafak. Tao hata fo, masosoa-ndandaak, do neni tutu'dak, fo ela ami meten soona, ami dodoo doak-kana.

²⁴Memak, emi ma emi tatao-nono'im ta, ma basa hataholi manasene-do'ok neu emi-a, ka'da nanamaluak mesan.

²⁵Au adenu basa hataholi esa neme dulu mai so: Au aloon, fo ana sapu neme kii mai. Neukose, ana heheta-aa'i basa manakoasa-la, sama leo tane-a, sama leo manatao ulek-ka, heheta-aa'i dae ulek-ka.

²⁶Nai emi dalek, see kande, nafa'dan neme makasososan mai nalosa ami bubuluk-kana? Tehu nai emi dalek, ta hapu esa nafa'dan boen, emi kokolak soona, ta hapu hataholi namanene fa

²⁷Au, fo MANETUALAIN nde manatui-benga makasososa neu Sion-na; Au haitua hataholi maneni hala malole, leo Yerusalem neu.

²⁸Lelek Au sanga nai lamatua daebafak-kala dalek, ta hapu esa boen, fo ana hapu fe natutu'duk ta hapu esa boen, fo ana hapu fe natataak fa.

²⁹Tete'ek-ka, lamatua daebafak-kala, sosoa-ndandaan ta, sila ka'da dodoki-dudulak, fo tapandoes, ma ala ta bisa tao-lala hata esa boen.”