Read Termanu YESAYA 43 Bible Online

YESAYA 43 - Termanu bible

YESAYA 43

¹Israel, MANETUALAIN nafa'da nae leo ia, “Au nde akadada'dik, ma Au tao-ala o manuu lupak, boso bii, te tao leo bee-o, Au soi-tefa ala o! Au aloo basa o, nenik o na'dem-ma so, o nde been-na, Au nuung.

²Metema, o lena tunga oe dale soona, neukose Au sama-sama o o, neukose, o ta bolo nai, o toto'a-tataam dale fa. Metema, o la'ok tunga ha'i dale soona, neukose ha'i-a, ta na'a naputu o fa, Soso'ba-susu'di mabelaina-la, neukose ta tao soe o fa.

³Nana Au nde Amak, fo o Manetualaim-ma, Israel MANETUALAIN malalao-malalafun, fo o manasoi-manatefam. Au soi-ala o, nenik Masir Sudan ma Seba, da'di leo o ngganggatim-ma.

⁴O mabelik nai Au matang, Au fe o ha'da-holomata, ma Au sue-lai o; boema, Au fe hataholi daebafak-ka, da'di leo o ngganggatim-ma, leoinak-kala, da'di leo ngganggatik neu o samanem-ma.

⁵Boso bii, nana Au asulu-ahapa o. Neme dulu ma neme muli mai, Au adenu o upu-anam, mai lakabubua.

⁶Au paleta kii ma kona, fo ela po'is no lai-laik. Nemen-na fo, o ana toum-mala fali ma'is leme dook-ka mai, ma o ana inam-mala, fali leme daebafak-ka bu'u-bu'un-nala mai.

⁷Nana sila basa-basas, nananaloo basak, nenik Au na'deng-nga so, Au akadada'dik-kasa, soaneu lamatutua-lamadedema Au.”

⁸Manetualain nafa'da nae, “Madenu Au leoinang, fo leomae lanuu matak, tehu pokek-kala fo leu leo mata leu; fo pakek-kala, leomae lanuu di'idook.

⁹Madenu basa leoinak-kala lakabubua ma basa leo-leo-la, lakabubua. Nai sila lamatua daebafan-nala dalek, see kande nafa'da basa hata fo, ana da'di nai besak ia? Nai sila dalek, see kande ana hapu nafa'da nalak, tepo-lelek manamaik-ka? Nemen-na, fo sila sakasiin-nala tutulumatak, fo ala fe buti, lae sila ndoos, fo ela basa manalamanene sila lafa'da, lae memak leondiak!

¹⁰Hai Au anang-ngala lemi, Au sakasiing-ngala nde emi, Au hele emi, da'di Au atang-ngala, fo ela malelak Au, ma mamahele neu Au, ma bubuluk, mae Au nde Manetualain. Au Manetualain, fo ka'da kisak, ta hapu fe'ek, nai lelek Au beita, ma nai lelek Au nai ia.

¹¹Au mesang-nga nde, MANETUALAIN, fe'ek neme Au mai, ta hapu manasoi-manatefa fa.

¹²Au afa'da basan neu o ae, Au nde soi-tefa o-a, te ta lamatua daebafak nusa dea, manai emi tala'da fa; Emi nde da'di Au sakasiing-nga. Ma Au, Au ia Manetualain.

¹³Au Manetualain ahele, losa dodoon-na. Ta hapu esa boen, fo ana hapu naladeak neme Au koasang-nga mai fa, do napanggengge Au dale tutu'ung-nga.”

¹⁴MANETUALAIN nde o manasoi-manatefam, Fo Israel Malalao-malalafun-na, nafa'da nae, “Hu kande emi, de Au haitua solda'du leo Babel neu, ma Au hona akalulutuk lelesu bui-a, ai betubalan-nala; Au tao asafali, hataholi Kasdim-mala eeki-natadalen, da'di kikii-makaleleuk.

¹⁵Hai Israel, Au nde MANETUALAIN, o Manetualaim fo malalao-malalafuk, o Manem, fo manamakadada'dik o-a!”

¹⁶MANETUALAIN tao basa enok esa, tunga tasi-a so, tunga oe manalua ponu-ponuk-ka.

¹⁷Ana nadenu solda'du-la, ma malanga solda'du matuaina-la latee-latati, de ala tutulumatak lenik ndala manahela kaleta. Tehu ala tu'da, de ala ta hapu fo'a so'on, mates, sama leo banu tetelu manamatek-ka.

¹⁸MANETUALAIN nafa'da nae, “Sosoa-ndandaan ta, soaneu mafandele tepo-lelek maneuk-ka, palsuma la'iesak-kana, mafandele manabasak-kala

¹⁹Taoafik leona, te Au tao hata beuk esa; besak ia, ana mulai so, ade o ta mita fan do? Neukose, Au tao enok nai moo solokaek-ka, ma lee-la, lai moo maloa.

²⁰Bana fuik-kala, neukose lamatutua-lamadedema Au; busa fuik ma manupui onta, neukose ala koa-kio Au nana Au fe oe-a, ana faa nai moo solokaek-ka, ma lee-la, lai moo maloa soaneu Au fe Au ana heheleng-ngala linu.

²¹Sila nde leoina fo, Au akadada'dik-kasa ba'eneu Au, fo ela, ala hapu tui-benga kokoa-kikiok ba'eneu Au.”

²²MANETUALAIN nafa'da nae, “Tehu o, fo Israel, o ta sene-do'ok neu Au fa, ma ta makatele neu Au so'on.

²³O ta meni bi'ilopo, soaneu o tutunu-hohotu nanatunum-ma fa, o ta fe ha'da-holomata neu Au, nenik o tunu-hotum fa. Te se'kona, Au ta fe o lelepa mabela, nenik o tutunu-hohotum fa, do ta tao akatoto'ak o, nenik Au akaseti o, fe Au boomenik fa.

²⁴O ta asa boomenik kaboomenik, soaneu Au fa, o ta tao mamahoko Au daleng-nga, nenik o tutunu-hohotum minan-na fa. Nasafalin-na, o fe Au lelepa mabela, nenik o sala-singom-mala, o tao susa Au, nenik o salam-mala.

²⁵Tehu Au, Manetualain, fo manalose heni o sala-singom, manafe do'o do ampon neu o, nanahu Au ha'da-paliing leondiak; Au ta afandele o sala-singom fa.

²⁶Fe Au nasanene'dak, fo mai fo ata teu leo manakee-manafula teu, fo kalaak o dede'am-ma, fo ela nananitak, nae o ndoos.

²⁷O bei-ba'i kai makasososam-ma lasala-lasingo basa so, basa o mauli-malangam mala, ala la'ban Au so,

²⁸o imam-mala, ala tao langgenggeo Au Umang-nga. Hu ndia de, Au fe heni Israel, fo nananakadadaek, Au po'ilotak Yakob tititi-nonosin, nanatao namate-namopok.”