Read Termanu YESAYA 44 Bible Online

YESAYA 44 - Termanu bible

YESAYA 44

¹MANETUALAIN nafa'da nae, “Mamanene leona, hai Au atang Yakob, hai Israel, fo Au hataholi heheleng-nga!

²Au nde MANETUALAIN fo manamakadada'dik o-a, fo manafe o lupak, mulai neme o inam nailu o, ma manatulu-fali o. Boso bii, te Au atang-nga nde o, Au ana heheleng fo, Au sue-laik-ka.

³Nana, neukose Au fe oe leo dae tuuk-ka neu, ma Au fe lee-la, ala faa lai dae tokotik-kala. Neukose, Au fe Au koasang-nga, neu o tititi-nonosim, ma Au fe o upu-anam, baba'e-papalak.

⁴Neukose ala moli no malole, sama leo na'u moli deka no oe-a, sama leo ai gandarusa nai lee su'un-na.

⁵Neukose hataholi-la, esa-esak manaku nae, ndia aoinan-na, Au nuung ndia, ma ana mai nakabubua no Yakob tititi-nonosin. Esa-esak sulak nai liman-na nae, MANETUALAIN Nuun, ma noke aoinan-na soona nae, Manetualain anan-nala lima-ein.”

⁶ MANETUALAIN Fo Manakoasa, Manek, ma Israel manamasalu-mahapan-na, halan-na nde ia nae, “Au MANETUALAIN, Fo Ka'da Kisak esa, fo makasososak ma mate'ek.

⁷See kande, sama leo Au? Madenun leona, fo ana manaku! Nemen-na fo, ana nafa'da, ma ana fe Au buti! See nafa'da ela so, la'eneu tepo lelek manamaik-ka, neme tepo lelek makasososak-ka, losa tepo lelek mate'ek-ka?

⁸Au leoinang-ngo nei, boso bii, do nggenge; ade neme makahulun-na, losa besak ia Au ta afa'da ela, hata fo ana da'di fa do? Au sakasiing-ngala nde emi. Ta hapu manamasulu-mahapa fe'ek fo Au ta alelak-kasa fa.”

⁹Hataholi manatao dodoki-dudula sosongo-tatangok ndia, sosoa-ndandaan ta, ma lamatua daebafak fo ala sene-do'ok sila-la, sosoa-ndandaan ta. Hataholi manasene-do'ok neu dodoki-dudulak sila-la, pokek ma ala ta bubuluk hata esa boen, hu ndia de, neukose ala hapu mamaek.

¹⁰Sosoa-ndandaan ta, soaneu tao dodoki-dudulak fo sene-do'ok neun, da'di leo lamatua daebafak!

¹¹Tete'ek-ka, basa hataholi fo manasene-do'ok neu dodoki-dudulak-ka, ala hapu mamaek. Hataholi fo, manatao dodoki-dudulak ndia nde been-na, hataholi daebafak biasa. Madenus leona, fo ala tutulumatak sama-sama; tao leo bee-o, neukose ala bii, ma ala mae.

¹²Tuka besi esa, ana ho'in-na liti bibiak esa, fo ana taon leo ha'i lain neu, fo ana tutun nenik tututuk. Ana tutun nenik basa be'i-balakain lala'en-na. Lelek ana tutu boema, namala'a, maan-na ma'dak-ka, ma ana sota-mangu.

¹³Tuka ai-a, ana uku ai. Ana dulak dodoki-dudulak lupan-na nenik ha'o, basa boema, ana doki-dulak-kana nenik ndia fela-dopen, de ana taon da'di hataholi daebafak mata-makeek-ka, dodoki-dudulan, boema ana pe'dan neu uman dale.

¹⁴Fafa'kama, ai fo ana paken ndia, neme ai kaiou, ai eru, do ai terpentin, fo ana lo'on nai nula dale. Boeo, fafa'kama ana sele ai salam, boema nahani losa u'dan-na mai, fo ana moli.

¹⁵Ana pake ai sila-la nggelok da'di ai ha'i, fo namanelu, ma ana tunu loti ma ana dala paa, boema dalen-na loak. Ana namanelu ma nafa'da nae, “Wah, mala'da hiik ma to'bi-to'bi! Te'e-te'e, ha'i ia, nandaa no au daleng-nga.” Bei ela ai sila-la, ana paken soaneu tao dodoki-dudulak Boema, nakatele de ana sene-do'ok neun, ma ana hule-haladoi nae, “Au lamatua daebafang-nga nde o, de soi-tefa mala au leona!”

¹⁸Te'e-te'e, hataholi leo sila-kala, nggoan-na seli! Ala potiketu matan-nala, ma dalen-nala, nalosa ta lalelak hata esa boen.

¹⁹Manatao dodoki-dudulak ndia, ana ta dodoo losa, “Au hotu ai sila-la seli, de au pake kaan-nala soaneu tunu loti, ma dala paa, fo au u'a. Boema, bei ela ai sila-la, au taon da'di dodoki-dudulak. Da'di besak ia, au sene-do'ok neu ai bibiak esa.!”

²⁰Tatao-nono'ik ndia, sama-na leo na'a afu. Hataholi ndia, dudu'a-aafi nggoan-na, ana taon-nan natofa-natalak, nalosa ana ta hapu tutulu-fafalik so'on. Ana ta hapu manaku, nae dodoki-dudulak fo manai liman dale ndia, ka'da tipu-daik mesan.

²¹MANETUALAIN nafa'da nae, “Hai Israel, mafandendelek basa ia-la, nana, o nde Au atang-nga. Au tao-ala o, manu lupak, de Au atang o, Israel, neukose Au ta afandele heni o fa!

²²Au usiheni o salam-ma, sama leo ko'as-sa, Au usi heni o sala-singom, sama leo ko'dendenuk-ka. Fali ma'im-ma, leo Au mai leona, nana Au soi-po'i o so!”

²³Hai lalai, mamahoko-setelee leona, hai dabafak-ka buin-na, mamahoko-setelee leona! Hai letek-kala lemin, mamahoko-setelee leona! Ma basa ai manai dalek-kala! Nana MANETUALAIN natu'du basa matua-mademan nenik Ana soi-tefa-na anan Israel so.

²⁴MANETUALAIN fo o manasoi-manatefam, ma Ana taon-na manu lupak, nai lelek o inam nailu o-a, “Au nde MANETUALAIN fo manamakadada'dik basa hata lala'en-na, fo Au mesang-nga nde akapepela lalai-a, ma Au akadada'dik daebafak-ka, ta no tutulu-fafalik neme su'di see mai boen.

²⁵ Au nde tao-ala manasiula-tongonok-kala, hala nafa'dan-na, ta da'di fa, ma Au tao akamiminak manasiula-tongonok-kala Au se'i hataholi manatee-tenok-kala, hala-kokolan, Au tao sila manatee-tenon-na, da'di nggoak.

²⁶Au nde atetea-ahehele Au atang-nga, dede'a-kokolan, ma Au tao-no'i dale tutu'uk fo, Au atang-nga nafa'dan. Au afa'da, ae neukose Yerusalem-ma, nanaleok seluk, ma kota-kota manai Yehuda-la, neukose Au afofo'a falik-kasa; ai-batu manatapasasalan-nala, neukose nanatao matalololek.

²⁷Au nde afa'da tasi buin-na ae: Ma'da leona! Au nau tao ama'da, o leem-mala.

²⁸ Au nde afa'da neu Kores ae, ‘Neukose o nde paleta soaneu Au, ma tao-no'i basa Au hihii-nanaung lala'en-na. Fe paleta leona, fo ela nafofo'a seluk Yerusalem, ma tao MANETUALAIN Uman-na neten-na.’ ”