Read Termanu YESAYA 45 Bible Online

YESAYA 45 - Termanu bible

YESAYA 45

¹MANETUALAIN hele basa Kores da'di manek so; Kores nananatu'duk, soaneu ana sengi leoinak-kala ma soaneu, helu la'di manek-kala koasan-na. Neukose MANETUALAIN soiheni kota lelesuinan-nala ba'eneun, ta ela esa boen, fo nanakenak fa. MANETUALAIN nafa'dan nae,

²“Neukose Au sadia enok, ba'eneu o; Neukose Au tao atetu letek ma pupukuk-kala, neukose Au heaba'e lelesu liti-la, ma Au helula'di besi betubalan-nala.

³Boema neukose Au fe o su'i-betes fo, nananafunik-ka, fo ela o bubuluk, Au nde Amak, fo Israel MANETUALAIN, fo naloo basa o, nenik o na'dem-ma,

⁴Au aloo o, de Au fe o, na'de maha'da-holomatak, leomae, o ta malelak Au fa. Au fe o bela-ba'uk, fo tulu-fali Au atang Israel, nana Au leoina heheleng sila.

⁵Au nde MANETUALAIN, ta hapu fe'ek fa, Au Manetualain Fo Ka'da Kisak esa. Au fe basa o tafa-sisilo so, leomae, o ta malelak Au fa.

⁶Au tao basa sila-la fo ela neme dulu losa muli, basa hataholi-la bubuluk, Au nde MANETUALAIN, ta hapu lamatua daebafak fe'ek, ka'da Au mesang-nga.

⁷Au nde akakadada'dik mangale'dok ma makahatuk, Au fe baba'e-papalak mai, ma soe-a mai. Au nde MANETUALAIN, fo manatao basa sila-la.

⁸Au akona sesengik-ka, neme lalai mai, sama leo u'dan-na, daebafak-ka nakapepela liman-na, soaneu ana sipok-kana, boema, Au akamomolik so'da-molek ma ao loak-ka; Au MANETUALAIN fo manamakadada'dik basa sila-la.”

⁹ Soe ba'eneu hataholi fo Manamakadada'dik-kana; Hataholi ndia, sama leo ulek fo, ana la'ban hataholi manataon-nana. Ade dae ulek-ka, natane neu manatao ulek-ka nae, “O tao beek ia?” Ade ulek-ka haladoi nae manatao ndia, malelan-na beita dai fa do?

¹⁰Soe ba'eneu hataholi fo, nafa'da ina-aman nae, “Tao le'e de, au nanabongik leo iak?”

¹¹Amak, fo Israel MANETUALAIN malalao-malalafun-na nafa'da nae, “Matane Au, la'eneu maso'dak nai fai manamaik-ka. Tehu, boso matane la'eneu Au anang-ngala, do madenu Au, tao hata esa.

¹²Au nde MANETUALAIN fo manamakadada'dik daebafak-ka, ma manamakadada'dik hataholi daebafak-ka, fo ana leo nai dalek. Au akapepela lalai-a, nenik Au koasang-nga, ma fe paleta neu le'do, bulak, ma nduuk-kala.

¹³Au nde adenu Kores, soaneu nakalala'ok Au dale tutu'ung-nga ma napadedeik natetu ndoos ma matetuk-ka. Neukose Au tao-a basa enok fo, ana tungan-nana, latetu Neukose ana nafofo'a falik Yerusalem, fo Au kotang-nga ma ana soi-po'i Au anang fo, nanafook-kala ta no doi sosolo dalek, ma ta no sese'ba-babaek fa.” MANETUALAIN Fo Manakoasa, nde manakokolak-ka.

¹⁴MANETUALAIN nafa'da Israel nae, “O soa Masir dae-oen buna-boan, ma Sudan nanalan-na. O soa hataholi Syeba fo, mata makeek-kala; ala la'ok lai o deam-ma, no nanalangek. Neukose ala sene-do'ok ma ala manaku lae, ‘te'e-te'e Manetualain nai o tala'da; ta hapu lamatua daebafak fe'ek fa, ka'da Ndia mesak-kana!

¹⁵Manetualain fo, manasoi-tefa Israel-la, nde been-na Manetualain fo, nafuni aoinan-na.

¹⁶Basa hataholi manatao dodoki-dudula sosongo-tatangok-kala; neukose nananakamamaek ma nananakadadaek

¹⁷Tehu MANETUALAIN soi-tefa-na Israel; so'da-molen-nala, neukose nakatatakak. Neukose emi ta nananakamamaek ma nananakadadaek losa dodoon-na fa.’ ”

¹⁸MANETUALAIN nde nakadada'dik lalai-a, Ndia nde MANETUALAIN-na! Ndia nde manamakadada'dik ma manafe daebafak-ka lupak, Ana taon-nan, natea-nahele, ma napadeik nahele. Ana ta taon-nan da'di mamana nee-nee lino-linok fa, tehu soaneu mamana leleok. Ndia nde nafa'da nae, “Au nde MANETUALAIN, de ta hapu fe'ek fa.

¹⁹Au ta kokolak no nafufunik, do no bibila-babaak fa. Au ta adenu Au anang Israel sanga Au no palsuma fa. Au MANETUALAIN, kokolak hata fo ndoos, ma afa'da hata fo la'en.”

²⁰MANETUALAIN nafa'da nae, “Makabubua, fo mai sama-sama, hai emi basa-basam fo, maladeak neme leoinak-kala tala'da mai! Hataholi fo, ala ho'i leni ai nanadoki-dulak-ka, fo ala la'ok benongo okofeo nggolok-ka, ma hataholi manahule-haladoi neu lamatua daebafak-kala, fo ta hapu soi-tefa-nala fas-sala, hataholi nggoak-kala.

²¹Kalaak o dede'am-ma, ma fe buti, hei, nemen-na fo, lakokolaok sama-sama. See kande, manatui-benga dede'ak ndia ma nafa'dan neme makahulun-na mai? Ade, ta nde Au fo, MANETUALAIN fa do? Ta hapu lamatua daebafak fe'ek fa, ka'da Au mesang-nga Au nde MANETUALAIN, fo ndoos ma matetuk, ma Manasoi-tefa, ta hapu fe'ek fa, ta'da fe'e Au!

²²Hai, basa laun daebafak-ka lala'en-na, fali leo Au mai, fo ela emi nanasoi-tefak, nana ka'da Au nde Manetualain-na, de ta hapu fe'ek fa!

²³ Au helu basa so, de Au hehelung-nga, neukose ta hela falik-kana fa; Au soo inik Au na'deng-nga: Basa hataholi-la, neukose ala senek nai Au matang, ma laheluk nai sila dede'an-na dalek, soaneu lilineka neu Au.

²⁴Neukose hataholi-la, lafa'da lae, ‘Ndoos ma matetuk-ka, ma be'i-balakaik, ka'da neme MANETUALAIN mai!’ Basa hataholi fo, ta lahiik Au fa, neukose ala mai leo Au mai, fo ala hapu mamaek.

²⁵Tehu, Yakob tititi-nonosin, neukose nanasoi-tefak, ma neukose ala koa-kio Au, fo MANETUALAIN.