Read Termanu YESAYA 47 Bible Online

YESAYA 47 - Termanu bible

YESAYA 47

¹ MANETUALAIN nafa'da nae, “Hai Babel, kona meme o kandela manem lain mai leona, fo mangatuuk muu afu dale. O ta la'ok malelengoao, ma ta mata makeek, sama leo makahulun-na fa.

²Kekenok ha'desopuk menik batu; buka heni o tema popoti langam-ma, so'u laik o poum-ma, losa lita o bitiboam-ma, ma lena lee-la.

³Neukose hataholi nita o makaholam-ma, nananakadadaek, ma nananakamumulu-nakamamaek. Neukose, Au balas dale he'dik neu o, ma Au ta fe hataholi esa boen, naladeak fa.”

⁴Israel Manetualain malalao-malalafun-na, soi-po'i ita, na'den-na, MANETUALAIN Fo Manakoasa.

⁵MANETUALAIN nafa'da Babel nae, “Denge-denge, fo muu leo makiu-makahatuk dale muu leona. Neukose ta loke seluk o lae, ‘Nusak-kala inamanen fa.’

⁶Makahulun-na, Au amanasa Au anang-ngala, Au ta sipok-kasa, da'di Au nuung so'on. Boema Au fes leo o neu de o ta sue-lai fas, nakalenak o tunu-ndeni lasik-kala, no ta pake ha'da hataholik fa.

⁷O maedaenga, neukose o da'di ina manek, losa dodoon-na, te o ta mame'da, do dudu'a-dodoo fai makabuin-na fa.

⁸ Hu ndia de, mamanene Au leona, hai o fo, hii ka'da usi lole-napu daebafak-ka! O maedaenga, o so'dam-ma nee-nee lino-linok, ma ta hapu hata fo, sama leo o fa. O dodoo mae, neukose o ta da'di inafalu fa, ma o tititi-nonosim, neukose ta mate-mopo fa.

⁹Tehu, ka'da hatematak esa, fo nai faik esa dalen-na, dede'a ka duak sila-la, ala da'di landaa. Leomae, o pake suangi, ma mo'do-akidook, o saom-ma, ma o anam-mala nanaloso nenik boe.

¹⁰O mame'da, o dalem-ma tesa-tama nai o tatao-nono'i mangalaum-ma dalek, o dodoo mae, o tatao-nono'im, nanataoafi tak. O manatee-tenom-ma, ma o malelam-ma, ana taon-na o, matofa-matalak, o maedaenga, ta hapu hata, fo sama leo o fa.

¹¹Tehu, neukose soe-a, tuni-ndeni-na o, o malela suangim-ma, ta hapu usiheni fan. Neukose soe-a, ana mai leo o mai, fo o ta sili mabe'i fan. Mamate-momopok-ka, neukose ana mai no kaiboik, fo o ta bubuluk fa.

¹²Ka'da makatatakak menik o mo'do-akidoom, ma suangim-ma, fo ana taon-na o, langam-ma dila, mulai neme tepo lelek o bei anan-ma. See bubuluk, ndia masosoa-ndandaak ba'eneu o, soaneu makabibiik o musum-mala.

¹³O sota-mangu, nanahu nanoli-nafa'da makadotok-kala. Madenu manasiula-tongonok-kala, ala mai soi-tefa-la o; sila fo, manapalisak matalolole, lalai-a lala'en-na, ma manamanolin-nduuk-kala, ma nai tunga-tunga bula beuk lafa'da memak hata fo neukose ana da'di neu o.

¹⁴Mitak, sila sama leo ha'deaik fo, ha'i na'an; ala ta hapu soi-tefa-la sila aoinan-nala mesak-kana fa! Ha'i ndia, pilan-na, nahaa nanseli ba'eneu sila ta nde ha'i mato'bik fo dala fa.

¹⁵Basa manasiula-tongonok-kala, sosoa-ndandaan nde ndia, ba'eneu o fo manataon-na o langam-ma dila, neme tepo lelek o bei anam-ma; esa-esak la'oela o; ta hapu manatulu-fali soaneu o fa.”