Read Termanu YESAYA 49 Bible Online

YESAYA 49 - Termanu bible

YESAYA 49

¹ Mamanene au, hai nusa dook-kala lemin, taoafik neu dede'a-kokolang. MANETUALAIN naloo au, te beita bongi au fa, Ana hele au, neme lelek, au inang nailu au-a.

² Ana taon-na, au dede'a-kokolang tanen-na, sama leo tafaina tanen-na nenik liman-na mesak-kana Ana nasulu-nahapa au. Ana taon-na au da'di, sama leo kokouisi matane, de Ana pe'dan nai mamana pepe'da kokouisik dale.

³Nafa'da au nae, “O nde, Au atang-nga; Neukose Au nananamatutua-namadedemak, hu kande o.”

⁴Tehu au afa'da ae, “Au sosota-mamangung, palsuma; au basa au be'i-balakaing, no sosoa-ndandaa tak!” Tehu au amahele MANETUALAIN nasala'e au hak-ka, Manetualain balas au, tunga au tatao-nono'ing.

⁵Beita bongi au fa, te MANETUALAIN naloo au, fo au da'di Ndia atan, soaneu au tao akabubua hataholi Israel-la fo ela, ala fali ma'is leo Ndia mai. MANETUALAIN taon-na au da'di, hataholi nanafe ha'da-holomata, Manetualain nde been-na, au bei-balakaing.

⁶ MANETUALAIN nafa'da au nae, “Hai Au atang-ngo nei, bela-ba'u mabelaina, nahani o; neukose, ta ka'da o moo falik Yakob tititi-nonosin fo, bei elak-kala fa, ma ta mabebeu leo-leo Israel-la, matua-mademan, tehu Au tao o da'di mangale'dok, ba'eneu leoinak-kala, fo ela, basa daebafak-ka lala'en-na, nanasoi-tefak.”

⁷Israel MANETUALAIN malalao-malalafun, Manasoi-manatefan, nafa'da neu hataholi fo, nananakadadaek nanseli, ma leoinak-kala, ta lahiik-kana fa, boema ana da'di ata, neu manakoasa-la, nae, “Neukose mane-manek-kala, lita Au tatao-nono'ing; neukose, ala fo'a, fo ala fe ha'da-holomata neu Au. Neukose basa manakoasa-la lita boe, boema, ala sene-do'ok.” Dede'ak ndia ana da'di, nanahu MANETUALAIN hele basa atan-na so; Israel Manetualain malalao-malalafun-na, lilineka neu hehelu balataan.

⁸ MANETUALAIN nafa'da nan-nala nae, “Nai lelek, Au daleng-nga nau soona, neukose Au ataa; nai Au fai soi-tefang-nga, Au tulu-fali emi. Au asulu-ahapa, ma Au anea emi, ma Au tao emi da'di, hehelu-balataak ba'eneu leoinak-kala Au ta abebeu nusak mananee-nee lino-linok-ka da'di dae pusaka fo nanaleok.

⁹Au adenu hataholi nanahukuk-kala kalua; fo manai mamana makahatuk-ka, Au os leo mangale'dok-ka mai. Nakalena, manai pupuku na'u tak-ka, ala to'a-taa fa, nana'ak-ka, nanasadiak su'di enok-ka nanalun-na.

¹⁰ Neukose ala ta maa ma'da, do lamala'a fa, ma neukose, le'do mahaak-ka, ta la'e fas, nai moo solokaek-ka fa. Nana Au, fo manasue-lai sila, neukose hela-noles, ma hela-noles leo oemata-la leu.

¹¹Neukose Au tao enok, tunga letelepak-ka, neukose, Au tao atetetu Au akofoong-nga.

¹²Au anang-ngala, mai beosu leme dook-ka mai, leme kii, muli ma Sinim fo nai kona.”

¹³Hai lalai, makamee leona, hao daebafak, mamahoko-setelee leona, hai letek-kala, eki no mamahoko-seteleek leona! Nana MANETUALAIN mai kokoe-nanasi anan-nala, Ana sue-lai anan fo nanatuni-ndenik-ka.

¹⁴Tehu laun Yerusalem-mala, lafa'da lae, “MANETUALAIN la'oela ita so, ita MANETUALAIN-na, nafandele heni ita so.”

¹⁵MANETUALAIN nataa nae, “Hapu nai bee, inak esa, nafandele heni anan-na, ma ana ta sue-lai, ana bongin-na fa? Leomae, nafandele henin boe, neukose, Au ta afandele heni o fa!

¹⁶Yerusalem, Au afandele o tataas esa; Au dokik o nadem-ma, nai au limadaleng-nga.

¹⁷Hataholi manalafofo'a o-a, ala mai no lai-laik, ma manatao lakalulutuk o-a, neukose ala la'o.

¹⁸Mete ma makanae, leo o boboa-kaisum muu, o laum-mala, lakabubua basa, de ala mai leo o mai so. No Au, Manetualain fo maso'dak-ka, Au afa'da ae, tete'ek-ka, neukose o dalem-ma namatua, nanahu o laum-mala, sama leo ina manaka'bing-nga, dalen-na namatua, nanahu lilo-henun.

¹⁹O nusam fo, tokotik, ma nee-nee lino-lino-a, besak ia, ana da'di makabi'a anak nanseli, ba'eneu hataholi fo, lahiik leon-nana. Ma hataholi fo, ana nau tao namate-namopo o-a, nadook aoinan-na neme o mai so.

²⁰Ni'iana fo bongis lai nusa dea, neukose lafa'da o lae, ‘Nusak ia, makabi'a anak nanseli ba'eneu au, fe au mamanak, fo ela au hapu leo nai ia.’

²¹Boema, o dodoo nai o dalem dale mae, ‘See kande, bongi fe au, ni'iana sila-la? Ade, mopo basa au anang-ngala, de ta hapu bongi seluk fa do? Au hataholi nanafook nai mamana tu'u-tapak, ma nanasi'uheok, ma nanala'oelak mesa-mesak-kana. Da'di, ni'iana sila-la, leme bee mai, ma see nde nakabobois-sala?’ ”

²²MANETUALAIN Fo Mademaina, nafa'da anan-nala nae, “Neukose Au fe leoinak-kala, ta'du-tana, fo neukose, ala fe falik o anam-mala; neukose ala ko'ok o anatoum-mala, ma o anainam-mala, nananasaak, nai aluk lain.

²³Neukose mane-manek-kala, ala da'di sama leo o amam, ma ina manek-kala, da'di leo o inam. Neukose, ala senek, fo fe ha'da-holomata neu o, ma lakaloe-lakadae aon-nala neu o. Soona neukose, o bubuluk, mae Au MANETUALAIN; hataholi fo, namahena neu Au-a, dalen-na ta ba'ihana fa.”

²⁴Emi matane mae, “Hapu nai bee, bua-lo'a kakalok-ka, nanaloso-nak neme palani tatibatu liman dale mai, do hataholi nanafook-ka nanaloso-nak, neme hataholi fo, ana tao no ta pake ha'da hataholik-ka, liman-nafanggeten dale mai?”

²⁵MANETUALAIN nataa nae, “Neukose, ndia nde da'di. Basa palani tatibatu-la, hataholi nanafoon-nala, neukose nanaloso falik. Hataholi fo, ana tao no ta pake ha'da hataholik-ka, bua-lo'a kakalon-nala, neukose hataholi loso-na seluk-kana. Nana Au nde, la'ban o musum-ma; neukose, Au soi-tefa o anam-mala.

²⁶Neukose, Au tao-a o musum-ma, mafuk daak, nalosa esa dodo-na esa. Soona basa hataholi daebafak lala'en-na, bubuluk lae Au, MANETUALAIN, o Manasoi-manatefam; Fo Mabe'i-balakai lea, Yakob Manetualain-na, o Manasoi-manatefam.”