Read Termanu YESAYA 5 Bible Online

YESAYA 5 - Termanu bible

YESAYA 5

¹ Mamanene au nakameeng, la'eneu au tia-laing-nga osi angon-na Au tia-laing-nga, nanuu osi angol nai pupukuk malolek-ka huun-na.

²Ana foi daen-na de ana tu'u heni batun-nala. Ana sele angol nanahehelek neun ana tao lalaa naneak Ana kali-na, bolok esa soaneu mamana hehe'e angon-na, boema nahani boan-na namalatu, tehu angol-la, boan-na makeis.

³Da'di, besak ia, Au tia-laing-nga nafa'da nae, “Emi basa-basam fo, laun Yerusalem ma Yehuda-la lemin, maketu-mala'di Au osi angol-la ma Au.

⁴Au muse tao seluk beek bai, tehu Au beita taon soaneu Au osi angol ndia fa. Tao le'e de, naboa boa makeis, te ta boa malole, sama leo Au amahenak-ka fa?

⁵Neukose Au tao au osi angol ndia leo iak: Neukose Au ofe heni pa'a fo manaokofeonalan-na, neukose Au tao tu'u papala nanadamak fo, manamasulu-mahapan-nana, Boema, Au po'ilotak bana fuik-kala tao lalutun fo ala heheta-aa'in.

⁶Neukose Au po'ilotak na'u-aiana moli lai dalek. Au ta ta'ti heni angol-la huun-na fa, ma neukose Au ta te'te na'un-na fa. Nakalenak, Au po'ilotak makatemak dila-nggauk ma na'u-la, moli lahenu dalek. Lena-lenak, Au kena-ka'i ko'a u'dak-kala, fo boso fen u'dan.”

⁷Nana MANETUALAIN Fo Manakoasa osi angol-la nde been-na, nde hataholi Israel-la, ma hataholi Yehuda-la nde been-na, osi angol fo Ana selen. Namahena ndoos ma matetuk-ka neme sila mai, tehu hapu ka'da tatao-nono'i ha'da hataholi tak-ka Namahena, sila lapadedeik latetu ndoos-sa, tehu hapu ka'da hoongguk-ka, fo loke ndoos ma matetuk-ka.

⁸Soe ba'eneu emi fo manaasa uma-la, ma malaka-ma tina-la, soaneu popo-tama seluk neu emi hata-hetom-mala! Ta dook-ka so'on te, ta hapu mamanak soaneu hataholi fe'ek-kala so'on fo ka'da emi nde leo nai nusak ndia.

⁹Au amanene MANETUALAIN Fo Manakoasa soo-supa nae, “Uma matuaina mana'ahiik ia-la, neukose basa-basas louk, nana hataholi ta leo nai dalek fa.

¹⁰Neukose dae-a, ta fe buna-boak fa, osi angol fo loloan-na hektar 10 soona, buna-boan ka'da angol oek litel sanahulu. Bini-ngges litel natun esa soona, buna-boan ka'da gandum litel sanahulu.”

¹¹Soe ba'eneu emi! Emi ue-le'dim neme fafaik losa le'odae, nde ka'da minu ala-lalu fo mafuk.

¹²Nai emi feta-dotem-mala dalek, hapu kecapi liik, gambus liik, rebana liik, ma kinu liik, ma nininuk angol. Tehu emi ta taoafik neu MANETUALAIN ue-le'din, ma hata fo Ana taon fa.

¹³Hu ndia de, Au anang fo, ala ta bubuluk hata-hata fa, neukose ala foo lenis da'di leo hataholi nanafook. Basa mauli-malangan ma laun-na, neukose mates loo la'a-ndoes-sa, ma maa ma'dak-ka.

¹⁴Mamates-sa bafan ka'u-ka'u, soaneu ana ko'do heni hataholi nananita-nalelak manai Yerusalem-mala, sama-sama loo laun fo ala feta-dote sama-sama.

¹⁵Basa hataholi-la, neukose nananakamamaek, ma hataholi manakoao-ndaeaok-ka, nananakadadaek.

¹⁶Tehu MANETUALAIN Fo Manakoasa natu'du matua-mademan nenik Ana tao hata fo ndoos. Neukose natu'du malalao-malalafun, nenik naketu-nala'di leoinan-na.

¹⁷Neukose bi'ihiiana ma bi'ilopoana, la'a na'u nai kota manandefan-na, fo ala ta to'a-taa nana'ak fa.

¹⁸Soe ba'eneu emi fo, manatao sala-singok do'e-do'e!

¹⁹Emi mafa'da mae, “Nemen-na MANETUALAIN fo Israel Manetualain malalao-malalafun-na, Ana ho'i nakeketuk no lai-laik! Nemen-na fo, nakalala'ok dale tutu'un-na, fo ela ita tita ma bubuluk.”

²⁰Soe ba'eneu emi fo, po'de masafali hata fo malole ma hata fo mangalauk, hata fo makahatuk ma hata fo mangale'dok, hata fo makahe'duk ma hata fo makeek!

²¹Soe ba'eneu emi fo, mafa'da mae, emi manatee-tenok ma malelak nanseli!

²²Soe ba'eneu emi fo, nai uluk nai nininu angol-la dalek! Emi hataholi mapalanik ma anseli, metema muse sese'dok ala-lalu!

²³Tehu ka'da soaneu hapu doi sosolo dalek-ka, de emi po'i hataholi masalak-ka, ma emi kena-ka'i hataholi sala tak-ka, fo ana boso hapu ndoos ma matetuk-ka.

²⁴Emi ta sipok MANETUALAIN Fo Manakoasa nanolin-na fa, ma emi makadadaek Israel Manetualain malalao-malalafun-na paletan-na so. Hu ndia de, sama leo ha'deaik-ka ma na'u tuuk-ka putun nai ha'i dale, leondiak boe, emi okam-mala, neukose laboo emi bungam-mala lamatuu, fo anin-na fuu nenis.

²⁵MANETUALAIN namanasa leoinan-na. Naheheleaon basa, soaneu Ana hukus so. Neukose letek-kala langgengo; hataholi manamatek-kala popolan-nala besenggela-besenggali sama leo kadafuk-ka nai enok-kala lain. Tehu MANETUALAIN bei namanasa, de neukose ka'da Ana huku.

²⁶Neukose MANETUALAIN naloo leoina manai dook-kala, fo neukose ala mai no lai-laik!

²⁷Laheheleaon tataas esa, soaneu latee-lata'ti, ma ala ta sota-mangu lita fa. Ala ta sungu, do teekauk lita fa.

²⁸Kokou isin-nala matane, ma kokoun-na nanahela memak. Ndalan-na eifangan-na, tean-na sama leo batuaik-ka, ma kaleta-na ein-na ana loli sama leo sangu-a.

²⁹Basa solda'dun-nala langao sama leo singa fo besak-ka ana kaa nana'an-na fo nalai, de ta hapu hataholi bisa finga-na falik-kana fa.

³⁰Nai faik ndia, nai Israel-lala'en-na, lamanene nasanggati natee-natatik-ka kao-kao, sama leo lii tasi-a. Mitak, nusak ndia lala'en-na makahatuk fo neni makase'ek-ka. Mangale'dok-ka da'di makahatu kiu-kiuk.