Read Termanu YESAYA 52 Bible Online

YESAYA 52 - Termanu bible

YESAYA 52

¹ Fo'a leon, hai Yerusalem, fo'a leona! Matetea-mahehele o dalem-ma! Pake o papake matua-mademan! Hai Yerusalem, kota fo malalao-malalafuk, hataholi manggenggeok-ka, ana ta masok tunga o lelesuinam-ma so'on.

²Hai Yerusalem, fo'a meme afu dale mai leon, fo sasapu heni, afu manai o aom-ma. Hai Sion, fo nanafook-kala lemin! Se'iheni namosina, fo nanapa'ak nai emi botoliim-ma leona!

³MANETUALAIN nafa'da anan-nala nae, “Emi nananase'ok no palsuma, da'di besak ia, nanasoi-po'ik no palsuma boe.

⁴Makahulun-na, emi meu leo Masir meu, de emi leo nai ndia, da'di leo hataholi manamai. Basa boema, Asyur eese-lulumu emi, ta tunga enon-na fa.

⁵ Besak ia, Au ito-ato beek nia ia bai? Hataholi Babel-la, foo emi leondiak mesan. Sila fo, manatuni-ndeni emi-a, ala koao-ndaeao, ma lakadadaek Au lakandondoo henin.

⁶Hu ndia de, neukose emi manaku, mae Au Manetualain, ma nai lelek ndia, neukose emi bubuluk, mae Au nde manakokolak o emi-a.”

⁷ Namahokok nanseli, mete hataholi nadedenuk-ka, mamain-na; ana la'ok la'di letelepak-ka de neni hala malole, hala so'da-molek, hala so'da-molek ba'eneu Sion; nae, “O Manetualaim-ma Manek!”

⁸Mamanene manamanea kota, eeki namahokon-na, ala eeki-latadale sama-sama! Nana ala lita matan MANETUALAIN fali ma'in leo Sion mai.

⁹Eeki-matadale leon, hai Yerusalem ai-batu manatapasasak-kala lemin, nana MANETUALAIN kokoe-nanasi anan-nala, ma ana soi-po'i Yerusalem.

¹⁰MANETUALAIN natu'du koasan-na, nai basa leoina lala'en-na, matan-na. Boema basa daebafak-ka lala'en-na, sakasii so'da-molek-ka, neme ita Manetualain-na mai.

¹¹ Muu leona! La'oela kota Babel-la, hai emi fo, manaho'i meni Manetualain uman-na, lou-lan! Boso koila'e buas fo, manggenggeok: emi beita la'o fa te, tao malalao-malalafu emi aoinam-ma.

¹²Neukose emi ta makalupu lala'ok fa, ma ta sama leo, hataholi manamalaik-ka fa. Nana, neukose MANETUALAIN hela-nole emi; Israel Manetualain-na, neukose nasulu-nahapa emi, neme bu'u-bu'uk lala'en-na mai.

¹³MANETUALAIN nafa'da nae, “Tete'ek-ka, Au atang-nga, neukose ana hapu buna-boak; neukose nanakoa-kiok, ma nananamadedemak.

¹⁴Makahulun-na, hataholi makadotok litan de ala nggenge, boema ala tao lalutu mata-panan, nalosa ta nalupa hataholi daebafak so'on.

¹⁵ Tehu besak ia, ana taon-na leoina makadotok dodoo doak-kana, mane-manek-kala, ta lahahala fa, nanahu ala dodoo doak-kana. Neukose ala lita, ma lalelak, hata fo makahulun-na, ala ta bubuluk-kana fa.”