Read Termanu YESAYA 57 Bible Online

YESAYA 57 - Termanu bible

YESAYA 57

¹Hataholi malole ma manatao tatao-nono'i malaole-a maten soona, ta hapu manabubuluk, do manataoafik neu fan. Mate basa soona, sila lala soe-a deak, ma sila hahaeaon no mole-dame.

³Tehu emi fo, manatao sala-singok-kala, mai leona, fo nananaketu-nala'dik! Emi ta malole lena neme, hataholi manapake mo'do-akidook-ka, hataholi fo, ana nau hohonge, ma manasosoa-piaok-ka mai fa!

⁴Emi hika-ka, nde see-ka? Emi hakinonolik-ka, nde see-ka? Ade emi ta nde, tititi-nonosik neme hataholi masapepeko-masandandalik, ma manalena-la'bak-kala mai fa do?

⁵Emi sene-do'ok neu lamatua daebafak fo, manafe dae-a nalole, nenik emi po'ilotak emi dale hihiim-ma, neni emi aoinam-ma leo emi ai manitum-mala huun-na neu. Emi matoi-matono emi anam-mala, lai bafak manai lee-la, ma nai batu-la lelan-nala.

⁶Da'di, emi mandaa, hele makabubua batu talimo'dis-sala leme ndia mai. Fo emi baba'em-ma nde ndia! Emi di'a angol, ma tunu-hotu gandum neu batu sila-la boe. Emi maedaenga, Au amahoko nenik basa sila-la do?

⁷Emi meu leo letek-kala poin-na meu, fo tunu-hotu tutunu-hohotuk, fo emi tao matetu emi nasa sao-anam.

⁸Emi pasak emi dodoki-dudula manggenggeom-ma neu emi umam-ma lelesun-na, bafan-na. Emi la'oela Au so. Emi o'duheni, emi bua papakem-ma, de kae leo pepe'uk fo, emi tao mamaloan nenik emi hataholi susue-lalai tou-ta'em ma ina-anafe'om, de emi se'ban, fo ana sungu no emi, soaneu emi tao matetu emi dale hihiim-ma.

⁹Emi pake mina, ma kaboomenik-kala, boema emi meu sene-do'ok neu lamatua daebafak Molokh-ka. Emi haitua hataholi nadedenuk-kala leu leo nusa dook-kala leu, nakalenak leu leo hataholi manamatek-kala daebafan-na leu.

¹⁰Hu kande, emi leleo-lala'o dae doom-ma, soaneu sanga lamatua daebafak-kala, de emi sota-mangu so, tehu emi ta mafa'da mae, ta hapu namahehenak so'on. Emi maedaenga, sila hapu fe emi manggate beuk, nalosa emi ta tapandoe fa.

¹¹MANETUALAIN nafa'da nae, “See lamatua daebafak sila-la, de ala tao-la emi bii-mamata'u, nalosa emi masapepeko-masandandali, ma ta mafandele Au fa? Ade, emi ta sene-do'ok neu Au so'on, nanahu Au denge-denge dook-ka nanseli do?

¹²Tehu Au afa'da neu emi; te emi tatao-nono'i malolem ndia, ta neu isik fa, ma basa emi tatao-nono'i ma lala'en-na, sosoa-ndandaan ta ba'eneu emi.

¹³Metema emi nggasi soona, nemen-na fo, dodoki-dudulak sila-la soi-tefa-la emi! Neukose anin-na fuu namopos, ma mopok-kasa nenik ka'da ani hahaek esa mesan! Tehu, hataholi fo nasulu-nahapa neu Au-a, neukose nanuu nusak ndia, ma ana sene-do'ok neu Au, nai Au Umang.”

¹⁴Nggelok lafa'da lae, “Tao, ma sadia enok ba'eneu Au anang-ngala, soliheok basa mana mapanggenggek lala'en-na.”

¹⁵Nana Manetualain Fo Mademaina, ma malalao-malalafuk, fo manakoasa losa dodoon-na, nafa'da nae leoia, “Au leo nai mamana mademaina, ma malalao-malalafuk, tehu, nai hataholi dale taidaek-kala, tala'da, ma nai hataholi manatukatei-saledale leme sala-singon-nala mai, fo daenga tao labebeu sila manggaten, ma namahehenan-na, tala'da boe.

¹⁶Au ta fe salak neu Au anang-ngala, losa dodoon-na fa; Au ta amanasa akandondoo henin fa, fo ela ala manggate lakandoo, te se'kona, Au nde fes maso'dak-ka.

¹⁷Sila sala-singo manatenepetan-na, nde taon-na Au amanasa, hu ndia de, Au hukus, ma Au la'oelas. Tehu, ala lalangabatu, de ala hele aon sila enon-na.

¹⁸Au ita basa sila ha'da-tataon so, tehu, neukose Au tao alea-ahais boe. Neukose Au hela-noles ma tulu-falis, ma kokoe-nanasi hataholi fo, dalen-na he'dis-sa.

¹⁹ Neukose, Au fe tetu-temak neu basa hataholi-lala'en-na, nau manai mata, do manai dook-kala boe. Neukose Au tao alea-ahai Au anang-ngala.

²⁰Tehu hataholi manatao tatao-nono'i mangalauk-ka nde been-na, sama leo tasi fo lii-la ta hahae fa, lii-la, puka leni kadafuk ma tane.

²¹ Ta hapu tetu-temak, ba'eneu hataholi masala-masingok-ka fa,” MANETUALAIN nae leondia.