Read Termanu YESAYA 58 Bible Online

YESAYA 58 - Termanu bible

YESAYA 58

¹MANETUALAIN nafa'da nae, “Maloo mapane'e leona! Fo mafa'da sila sala-singon, neu Au anang-ngala.

²Tunga faik, sila sene-do'ok neu Au, ma sila hii bubuluk Au hihii-nanaung, nono'kabai, sila tao hata fo malole, ma sila lilineka neu Au hoholo-lalaneng. Sila lafa'da, lae sila lamahoko sene-do'ok neu Au, ma lahiik Au hoholo-lalaneng, fo ndoos ma matetuk-ka.”

³Leoina ndia natane nae, “Sosoak hata, okaaok ndia, metema MANETUALAIN ta mete fa? Sosoak hata, ita takaloe-takadae oa-tala, metema Au ta taoafik neu fan?” MANETUALAIN nafa'da nae, “Te'e-te'e, lelek emi okaaom-mala, emi sanga nanalak soaneu emi, ma eese-lulumu hataholi fo, emi se'ba-baek-kala.

⁴Lelek emi okaaom-mala, emi masipo bafak, ma mahote, ma emi tao hata esa no laka-nakasetik. Emi maedaenga, emi okaaom leondiak-ka, ana hapu tao nakababale Au daleng-nga, fo Au amanene emi huhule-haladoim do?

⁵Metema emi okaaom-ma soona, emi fepa-li'u emi aoinam-ma; emi makatele emi langam-ma, sama leo na'u-a doon-na. Emi bela si'di lafa lapik, fo emi nggali afu leo lain neu, fo emi mangape'uk meu lain. Soona, emi mafa'da mae, okaaok-ka nde ndia do? Emi maedaenga, Au amahoko unik emi tatao-nono'im ndia do?

⁶Au ahiik okaaok-ka, nde ia: Se'iheni, lange tuni-ndenik-ka, ma lulu'a-lelepa ta ndoos ma matetuk-ka, ma soi-po'i hataholi fo nanatuni-ndenik-kala.

⁷ Baba'e emi nana'a-neninum neu hataholi kamala'ak-kala, sipok hataholi uma tak-kala nai emi umam. Fe hataholi makaholak-kala, bua papakek, ma boso tipa emi tolanom fo, ana paluu tutulu-fafalik.

⁸Soona, neukose mangale'dok-ka, ana tii ba'eneu emi, sama leo dulu fula, ma neukose emi bisum-mala, ala lea-hai no lai-laik. Neukose, Au sama-sama o emi, fo Au soi-tefa emi. Neukose Au asulu-ahapa emi, neme bu'u-bu'uk lala'en-na mai.

⁹Metema emi hule-haladoi soona, neukose Au sipok-kana. Metema emi maloo bou-bou neu Au soona, neukose Au ataa. Boso tuni-ndeni seluk, emi nono hataholim-ma, hahae tao musu, ma hahae kokolak manggenggeo hataholi na'den.

¹⁰Fe hataholi kamala'ak-kala la'a, ma tulu-fali hataholi nanatuni-ndenik-kala. Metema emi tao leondiak, soona makahatuk manai emi boboa-kaisum-ma, neukose ana da'di mangale'dok, sama leo nai fai lele'don-na.

¹¹Neukose, Au hela-nole emi tataas esa, ma Au fe emi makabete nai, dae tokotik-ka; Neukose Au anea emi, fo ela emi so'da-la'dak ma balakaik mahele. Neukose emi sama leo osi fo, oen-na dai, sama leo oemata fo, ta manama'dak fa.

¹²Kota fo, ndefahenin dook-ka so, neukose emi mafofo'a falik-kana, nai batu nete palaan lain. Neukose loke emi soona lae, ‘Leoina fo, manamafofo'a falik papala nanadamak-kala, ma manatao lahii uma makalulutuk-kala.’ ”

¹³MANETUALAIN nafa'da nae, “Fe ha'da-holomata neu fai Sabat-ta, sama leo MANETUALAIN fain-na. Nai faik ndia, emi ta bole ito-ato emi paluum-ma fa. Tao faik ndia, da'di leo emi fai maua-manalem: fe ha'da-holomata neu MANETUALAIN fain-na, nenik ta bole la'o leo su'di bee meu fa; boeo, boso maue-male'di, do kokolak dede'a manada'di tak.

¹⁴Soona neukose emi mamahoko-setelee, nanahu emi makatele neu Au. Neukose Au tao-a emi da'di hataholi nananita-nalelak, nai basa daebafak-ka lala'en-na. Neukose emi maso'da no namahokok, nenik emi bei-ba'i kaim Yakob, dae pusakan-na, buna boan. Au, fo MANETUALAIN nde manakokolak-ka.”