Read Termanu IMAMAT 10 Bible Online

IMAMAT 10 - Termanu bible

IMAMAT 10

¹Faik esa boema, Nadab ma Abihu ho'i-la sila mamana tunu boomenin-na, de ala tao ha'ikaak leo dalek neu. Boema ala tao boomenik leo ha'i ndia dalek neu, de ala tunu-hotu fen neu MANETUALAIN. Tehu ha'i ndia, ha'i nalulik, nanahu MANETUALAINta nadenu sila tunu-hotu fan.

²Boema MANETUALAIN nakona ha'i-a mai, de ana hotu nisas nai MANETUALAIN Lalaa Teman dale.

³Boema Musa nafa'da Harun nae, “MANETUALAIN dale dodoon-na nde ndia, nai lelek nafa'da nae, ‘Basa manamalalau-maoono Au-a, muse fe ha'da-holomata neu Au malalao-malalafung. Neukose, Au atu'du Au matua-mademang neu basa Au leoinang-nga lala'en-na.’ ” Tehu, Harun ka'da denge-denge.

⁴Basa boema, Musa naloo Misael ma Elsafan, fo Uziel anan-nala, ma Harun to'on. Nafa'das nae, “Mai leo ia mai, fo ko'o-ma emi tolanoo daem duas popolan-nala neme MANETUALAIN Lalaa Teman dale mai, fo meu pe'das neu mamana ofu-a deak.”

⁵Boema ala mai, de ko'o-la duas popolan fo ndia te ala bei pake bua papakek sila-la, de lenin leo mamana ofu-a deak neu, sama leo Musa paletan-na.

⁶Boema Musa nafa'da Harun no ana fe'en-nala, fo nde Eleazar ma Itamar nae, “Boso po'ilotak emi langa doom-ma nanggangganu, ma boso sisii-lulu'i emi bua papakem-ma, fo matu'du mae emi susa, ma emi falu. Metema emi tao leondiak soona, neukose mate emi, ma MANETUALAIN namanasa la'iesak hataholi Israel-la. Tehu hataholi Israel fe'ek-kala, bole falu soaneu hataholi manamatek ka duak-kala, nanahu ha'i-a neme MANETUALAIN mai.

⁷Boso la'oela MANETUALAIN Lalaa Teman-na, fo ela boso mate emi, nana emi nanandoo ei basak nenik mina feta, fo emi malalau-maoono MANETUALAIN.” Ala taon, sama leo Musa hala nafa'dan-na.

⁸MANETUALAIN nafa'da Harun nae,

⁹“O minu basa angol do ala-lalu soona, o moo o anam-mala ta bole meu leo Au Lalaa Temang dale meu fa. Metema, emi la'olena nakanenetek ndia soona, neukose mate emi. Basa o tititi-nonosim-mala muse tunga nakanenetek ndia.

¹⁰Emi muse mete malelak, hata beek-ka nde nanafe hehelik soaneu MANETUALAIN, ma hata beek-ka nde ta nanafe hehelik fa, hata beek-ka nde manggenggeok, ma hata beek-ka nde ta manggenggeok fa.

¹¹Basa hoholo-lalanek fo Au fen neu emi, tunga Musa, emi muse manolin neu leoina Israel-la.”

¹² Musa nafa'da Harun ma anan duas, fo Eleazar ma Itamar nae, “Ho'i-ma gandum lenak-ka, neme nana'ak fo nanatunu-hotuk soaneu MANETUALAIN. Tao loti, fo ta pake laluteik, neme ha'desopuk ndia mai, fo mi'an nai mei tunu-hotuk-ka boboan-na, nanahu, tutunu-hohotuk ndia malalao-malalafuk nanseli.

¹³Emi muse mi'a loti ndia nai mamana malalao-malalafuk, nana neme nana'ak fo nanatunu-hotuk soaneu MANETUALAIN-na, o moo o anatoum-mala baba'em-ma nde loti ndia. MANETUALAIN fe au paleta leo ndiak.

¹⁴ Tehu o ma o anatou-anainam-mala, bole mi'a bana tutunu-hohotu natutu'duk-ka tenen-na, ma bana tutunu-hohotu hehelik-ka sakibolon-na. Basa sila-la nde da'di imam-mala baba'en-na neme leoina Israel-la tutunu-hohotu mole-damen-na mai. Emi bole mi'an su'di nai mamanak bee boe, sa'di ta manggenggeok fa.

¹⁵Muse ho'i meni bana tutunu-hohotu hehelik-ka sakibolon-na, ma bana tutunu-hohotu natutu'duk-ka tenen-na, sama-sama no minan-na, soaneu tutunu-hohotu nanatunuk-ka, fo da'di leo tunu-hotu hehelik ba'eneu MANETUALAIN. Paa bibiak sila-la, ala da'di o ma o anam-mala nuun, losa dodoon-na, sama leo MANETUALAIN paletan-na.”

¹⁶Basa boema, Musa natane la'eneu bi'ihiik soaneu tutunu-hohotu sala-singok-ka hapu ampon. Lafa'dan lae tunu basa bi'ihiik ndia so. Hu ndia de, sila tataon ndia taon-na Musa namanasa Eleazar ma Itamar, de nafa'das nae,

¹⁷ Tao le'e de, emi ta mi'a paa tutunu-hohotuk fo sala-singok hapu do'o do ampon ndia, nai mamanak malalao-malalafuk fa? Tutunu-hohotuk ndia malalao-malalafuk nanseli; MANETUALAIN fen neu emi, fo ela hataholi Israel-la sala-singon hapu do'o do ampon.

¹⁸Bi'ihiik ndia daan-na, ta lenin leo MANETUALAIN Lalaa Teman-na neu fa, da'di tunga ndoon-na, emi mi'a tutunu-hohotuk ndia paan-na neme ndia, sama leo au paletang neu emi-a.

¹⁹Boema Harun nataa nae, “Memak faik ia, hataholi Israel-la fe basa tutunu-hohotuk fo sala-singok hapu do'o do ampon, ma tutunu-hohotu nanatunuk soaneu MANETUALAIN so. Leomae leondiak boe, soe ia tuni la'e au. Sa'di leo been-na, faik ia, au u'a paa tutunu-hohotuk fo sala-singok hapu do'o do ampon ndia boe, soona, ade, neukose MANETUALAIN ta namahoko fa do?”

²⁰Musa name'da-nana, natataak ndia dai so.