Read Termanu IMAMAT 11 Bible Online

IMAMAT 11 - Termanu bible

IMAMAT 11

¹MANETUALAIN fe Musa no Harun nakanenetek-kala nde ia,

²soaneu leoina Israel-la. Basa bana-manu fo laso'da lai ma'dak lain, boema ala doa fo ala aale ma eifangan-nala kaba'ek nde bee soona, ta bana nalulik fa, de bole mi'a paan-na.

⁴Boso mi'a onta paan-na, bana esa sama leo nusa na'de kelinci, paan-na, ma bana esa sama leo lafo'a, paan-na. Bana sila-la bana nalulik, nanahu leomae ala doa fo ala aale, tehu eifangan-nala ta kaba'ek fa.

⁷Boso mi'a bafi paan-na. Bana nalulik ndia, nanahu, leomae eifangan-na kaba'ek, tehu ana ta doa fo aale fa.

⁸Ta bole na'a paan-na fa, ma maten soonaak ta bole koila'e fan, nanahu bana ndia, bana nalulik.

⁹Emi bole mi'a basa i'ak lala'en-na, fo malelok, ma maunek.

¹⁰Bana fo naso'da nai oe dale, tehu ta malelok ma te maunek nde bee soona, bana nalulik, da'di ta bole na'a fan, ma maten soona, ta bole koila'e fan.

¹³Ta bole na'a manupui-la nde ia, paan-na fa, nanahu manggenggeok. Manupui sila-la nde: manupui kaka'ka, ko'donaok, balupua mata-matak lala'en-na, manupui esa na'de manupui nasar, manupui kaa, manupui onta, manupui esa na'de manupui camar, manupui esa na'de manupui blekok ma danoe mata-matmatak lala'en-na, manupui esa na'de manupui undan, manupui esa na'de manupui kasa ma soik-ka.

²⁰Basa lama-bobo'i mali'dak-kala nde bee soona, lama-bobo'i nalulik,

²¹ta'da fe'e manupui fo lakaboboku nai dae lain, do nai ai-la lain.

²²Da'di, bole na'a lamak, jengkrik, ma lama momo'dok-ka.

²³Tehu basa lama-bobo'i fe'ek fo mali'dak ma manalo'do-laek-kala boeo, bana nalulik sila.

²⁴Hataholi esa da'di hataholi manggenggeok losa le'do tenak, metema ana koila'e bana sila-la esa popolan-na: bana fo maeifangak, ta'da fe'e eifangan-na naba'e ma ana doa fo ana aale, ma bana fo ein 4, ma eifangan-na matane. Ba'eneu see, fo ana ho'i neni bana matak leondiak-ka popolan-na soona, muse ana safe bua papaken-na, tehu bei nanggenggeo losa le'do tenak.

²⁹Lafo manai bolodae dale, lafo matua, lafo ana, ba'iafa, basa lo'donggelek mata-matak lala'en-na, landak, ba'iafa, nggonggoek, ma busali'da nde been-na, bana nalulik sila.

³¹Ba'eneu see, fo ana koila'e bana sila-la do ana koila'e popolan-nala soona, hataholi ndia manggenggeok losa le'do tenak.

³²Metema, mate bana sila-la esa, fo ana tu'da la'e buas esa soona, buas ndia da'di naggenggeo. Nakanenetek ndia ana da'di soaneu basa hata lala'en fo taon neme ai, si'di, ai louk, bana louk, do kalong, ma basa hata fo paken soaneu su'di beek-ka boe. Muse ene buas sila-la leo oe dale neu, tehu bei langgenggeo lahele losa le'do tenak.

³³Metema, mate bana sila-la esa, fo ana tu'da leo uledae dale neu soona, basa hata lala'en fo manai uledae ndia dalek-ka, da'di langgenggeo, de muse tao ba'e uledae ndia.

³⁴Metema, oe manai uledae ndia dalek la'e nana'ak soona, nana'ak ndia da'di nanggenggeo, ma nininuk manai uledae ndia dalek boeo, da'di nanggenggeo.

³⁵Bana mates ndia tu'da la'e su'di beek boe, soona ana da'di nanggenggeo. Bana mates ndia tu'da la'e la'o fo taon neme dae-a mai soona, muse tao nalutu la'o ndia, nanahu nanggenggeo so.

³⁶Ta'da fe'e oemata do oedolu, te basa hata fe'ek lala'en-na, da'di langgenggeo, metema bana mates-sa la'en.

³⁷Metema bana mates ndia, ana tu'da la'e aide'ek fo sanga sele-nggalin soona, aide'ek ndia balisi nahele.

³⁸Tehu metema, aide'ek ndia bei enen nai oe dale, boema bana mates ndia tu'da la'en, soona aide'ek ndia da'di nanggenggeo.

³⁹Ba'eneu see, fo ana koila'e bana mates fo ta nalulik fa, soona nanggenggeo losa le'do tenak.

⁴⁰Hataholi fo ana ho'i neni do na'a bana mates ndia paan-na soona, ana muse sefe bua papaken-na, tehu nanggenggeo nahele losa le'do tenak.

⁴¹Basa bana manalo'do-laek manai dae lain-na, nau manalo'do-laek-ka, ei 4-ka do ein makadotok boe, nde been-na bana nalulik, de ta bole na'a paan-na fa.

⁴³Boso tao manggenggeo o aoinam-ma nenik mu'a bana matak leo silak-ka.

⁴⁴ Au nde emi MANETUALAIN, hu ndia de manea, fo ela emi malalaok-malalafuk mahele, nanahu Au malalaok-malalafuk.

⁴⁵Au nde MANETUALAIN, fo noo emi kalua meme Masir mai, fo daenga Au da'di emi Manetualaim. Ela leo been-na, emi malalao-malalafuk, nanahu Au malalao-malalafuk.

⁴⁶Nakanenetek sila-la, nde da'di nakanenetek la'eneu bana-la ma manupui-la boe, bana fo laso'da lai oe dale, ma manalae-lo'do nai dae lain.

⁴⁷Emi muse bisa mete malelak, beek-ka nde balisi, ma beek-ka nde manggenggeok, bana beek-ka nde bole na'a paan-na, ma bana beek-ka nde, ta bole na'a paan-na fa.