Read Termanu IMAMAT 12 Bible Online

IMAMAT 12 - Termanu bible

IMAMAT 12

¹MANETUALAIN fe Musa nakanenetek-kala nde ia,

²soaneu leoina Israel-la. Metema, inak esa ana bongi anatouk, soona inak ndia nanggenggeo faik hitu dalen-na, sama leo lelek ana hapu bulak-ka.

³ Neu fai ka falun-na soona, muse ana sunat anan-na.

⁴Basa ndia soona, inak ndia bei nanggenggeo faik teluhulu seluk, nanahu daan-na bei kalua. Ana ta bole koila'e bua-lo'a makaluku-makatelen fa, ma ana ta bole neu leo MANETUALAIN Lalaa Teman dale neu fa, losa basa faik fo tao nalalao-nalalafu aoinan-na.

⁵Metema, inak esa bongi ana inaanak, soona inak ndia nanggenggeo faik sanahulu haa dalen-na, sama leo lelek ana hapu bulak-ka. Basa ndia soona, inak ndia bei nanggenggeo faik 66 seluk, nanahu daan-na bei kalua.

⁶Basa faik fo tao nalalao-nalalafu aoinan-na, nau hu kande ana bongi anatouk do anainak boe, soona inak ndia muse neni tutunu-hohotuk leo imam-ma, nai MANETUALAIN Lalaa Teman-na lelesun-na, bafan-na. Tutunu-hohotuk ndia nalupa leo bi'ilopoana esa, teun esa soaneu tutunu-hohotu nanatunuk, ma manupui kaluaana esa, do kateuana esa, soaneu tutunu-hohotuk fo sala-singok hapu do'o do ampon.

⁷Imam-ma muse fe inak ndia tutunu-hohotun leo MANETUALAIN neu, ma ana tao feta soaneu lose heni inak ndia manggenggeon-na, nalosa inak ndia da'di balisi. Da'di, nai lelek inak esa, ana bongi basa soona, muse ana tao leondiak.

⁸ Metema, inak ndia ta hapu sadia bi'ilopoana esa fa soona, muse neni manupui kaluaana dua, do manupui kateuana dua; fo esa soaneu tutunu-hohotu nanatunuk, ma esa seluk soaneu tutunu-hohotuk fo sala-singok hapu do'o do ampon. Imam-ma muse tao feta soaneu lose heni inak ndia manggenggeon-na, soona ana da'di balisi.