Read Termanu IMAMAT 15 Bible Online

IMAMAT 15 - Termanu bible

IMAMAT 15

¹MANETUALAIN fe Musa no Harun nakanenetek ia-la,

²soaneu leoina Israel-la. Metema touk esa, ana moe nanak, nanahu ana hapu he'dis nai mamaen-na, soona nanak ndia manggenggeok,

³nau nanak manakaluak-ka, do nanak fo ana beita kalua fa.

⁴Hataholi ndia nangatuuk do nangape'uk nai mamanak bee soona, mamanak ndia da'di mamana manggenggeok.

⁵Ba'eneu see, fo ana koila'e do nangatuuk neu hataholi manamoe nanak ndia mamana tutuun-na, do ana mu'di apen-na la'en soona, muse ana safe bua papaken-na ma nadiu oe, tehu ana da'di manggenggeok losa le'do tenak

⁹Hataholi manamoe nanak ndia, nangatuuk neu ne'a sa'e ndala, do su'di beek soona, buas sila-la da'di manggenggeok.

¹⁰Ba'eneu see, fo nangatuuk neu buas esa lain, fo hataholi kamahe'dis ndia nangatuuk hai neme buas ndia lain so, soona ana da'di manggenggeok, losa le'do tenak. Hataholi manaso'u buas ndia, muse ana safe bua papaken-na, ma nadiu oe, tehu nanggenggeo losa le'do tenak.

¹¹Metema, hataholi manamoe nanak ndia, beita nafui oe fa, te ana koila'e hataholi fe'ek, soona ana koila'e hataholi ndia, muse safe bua papaken-na, ma nadiu oe, tehu nanggenggeo losa le'do tenak.

¹²Hataholi ndia koila'e uledae-a soona, muse tao ba'e uledae ndia, ma ana tai la'e bua-lo'as-sala, muse safe bua-lo'as sila-la.

¹³Metema, hataholi ndia lea-hai soona, muse nahani seluk faik hitu dalen-na. Basa ndia soona, muse ana safe bua papaken-na, ma nadiu oe nai oemata dale, soona hataholi ndia balisi.

¹⁴Neu fai ka falun-na soona, muse neni manupui kaluaana dua, do kateuana dua, fo ana fen leo imam-ma nai MANETUALAIN Lalaa Teman-na lelesun-na bafan-na.

¹⁵Imam-ma muse tunu-hotu manupui esa, soaneu tutunu-hohotuk fo sala-singok hapu do'o do ampon, ma esa seluk soaneu tutunu-hohotu nanatunuk. No enok ndia, imam-ma tao hataholi ndia feta nalalao-nalalafun, nai MANETUALAIN matan.

¹⁶Metema, touk esa nalame'i de bini-nggen kalua, soona muse nadiu oe, tehu nanggenggeo nahele, losa le'do tenak.

¹⁷Bini-ngges ndia la'e su'di beek fo taon neme temak do neme ai louk do bana louk-ka mai soona, muse safe buas sila-la; buas sila-la manggenggeok losa le'do tenak.

¹⁸Ina-touk sungu lakabubua basa soona, duas muse ladiu oe, tehu duas langgenggeo lehele losa le'do tenak.

¹⁹Inak esa, ana hapu bulak soona, nanggenggeo faik hitu dalen-na. Ba'eneu see, fo ana koila'e inak ndia soona, nanggenggeo losa le'do tenak.

²⁰Inak fo manahapu bulak ndia, nangatuuk do nagape'uk neu su'di beek lain, soona da'di nanggenggeo.

²¹Ba'eneu see, fo nangatuuk neu mamanak, fo inak ndia nangape'uk hai neme lain, do nangatuuk hai neme mamanak ndia soona, muse ana safe bua papaken-na, ma nadiu oe, tehu nanggenggeo losa le'do tenak.

²⁴Metema, touk esa sungu no inak fo ana bei hapu he'di bulak ndia soona, touk ndia boeo nanggenggeo faik hitu dalen-na, ma basa mamanak fo touk ndia nangape'uk, do nangatuuk hai neme lain-na, langgenggeo boe.

²⁵Metema inak esa, ana ta hapu bulak fa, tehu ana po'a daak faik de'ubee dalen-na, do basa hapu bulan-na so, tehu po'a daan-na ta hahae fa soona, nanggenggeo, nai lelek ana po'a daak ndia, sama leo nai lelek, ana bei hapu bulak-ka.

²⁶Nai lelek ana hapu bulak-ka, nangape'uk do nangatuuk nai mamanak-ka, nanggenggeo.

²⁷Ba'eneu see, fo ana koila'e mamanak ndia soona, nanggenggeo boe. Muse ana safe bua papaken-na, ma nadiu oe, tehu nanggenggeo losa le'do tenak

²⁸Nai lelek po'a daak ndia nate'e, inak ndia muse nahani seluk faik hitu dalen-na. Basa ndia soona, besak-ka ana lea-hai.

²⁹Neu fai ka falun-na soona, muse neni manupui kaluaana dua, do kateuana dua leo imam-ma nai MANETUALAIN Lalaa Teman-na lelesun-na, bafan-na.

³⁰Muse tunu-hotu manupui esa, soaneu tutunu-hohotuk fo sala-singok hapu do'o do ampon, ma esa seluk, soaneu tutunu-hohotu nanatunuk. No enok ndia, imam-ma, tao inak ndia feta nalalao-nalalafun nai MANETUALAIN matan.

³¹MANETUALAIN nadenu Musa, fo ana fe nasanene'dak neu leoina Israel-la, fo daenga ala taoafik neu, faihi'da langgenggeo ma faihi'da ta langgenggeo fa, fo ela ala ta tao langgenggeo MANETUALAIN Lalaa Teman fo nai sila mamana ofun-na tala'da heon. Metema, ala tao langgenggeo Lalaa Temak ndia soona, neukose mates.

³²La'eneu basa touk fo ala moe nanak, nanahu ala hapu he'dis nai mamaen-na, do touk fo ana sungu no inak soona, ana kalua heni bini-nggen leo deak neu,

³³la'eneu inak fo ana hapu bulak, ma la'eneu touk fo ana sungu no inak-ka, ana bei hapu bulak-ka, nakaneneten-na leondiak.