Read Termanu IMAMAT 18 Bible Online

IMAMAT 18 - Termanu bible

IMAMAT 18

¹MANETUALAIN nadenu Musa

²nanduku-nalosak paleta ia-la neu leoina Israel-la, “Au nde emi MANETUALAIN.

³Emi boso na'da dulak, sama leo hata fo hataholi manai dae Masir-ra tao-no'in. Masir fo makahulun-na emi leo hai meme naa so, do hataholi manai Kanaan-nala, fo besak ia Au sanga o emi leo naa meu.

⁴Tunga Au hoholo-lalaneng, ma tao-no'i hata fo Au paletan. Au nde emi MANETUALAIN.

⁵ Tunga Au fe emi nakanenetek ma hoholo-lalanek-kala. Metema, emi tao leondiak soona, emi maso'da. Au nde MANETUALAIN-na.”

⁶MANETUALAIN fe nakanenetek-kala nde ia: Boso sungu moo hataholi esa neme emi tolanoo ka'a-fa'dim mai.

⁷Boso sungu moo o inam, fo o amam saon-na, nana o amam hak ndia.

⁸ Boso makadadaek o amam, nenik sungu moo saoina fe'en esa.

⁹ Boso sungu moo o fetom-ma, do o feto palam, fo nau emi mamatua sama-sama nai uma esa dalek, do namatua nai uma fe'ek boe.

¹⁰Boso sungu moo o upum-ma; neukose tatao-nono'ik ndia, tao nakamamaek seluk o aoinam-ma.

¹¹Boso sungu moo o fetom fo emi ama esa, te inan fe'e, do emi ina esa, te aman fe'e, nanahu o tolanoom ndia boe.

¹² Boso sungu moo o te'om, nau o amam tolanoo inan ndia, do o inam tolanoon-na boe.

¹⁴Boso sungu moo o to'om saon-na, nanahu o te'om ndia boe.

¹⁵ Boso sungu moo o manafeum-ma anan-na,

¹⁶ do o ka'am-ma saon-na.

¹⁷ Boso sungu moo inak esa, o sungu hai moon so anan-na do upun-na. Fafa'kama o tia-laim sila, de tatao-nono'ik ndia, ta kandaak fa.

¹⁸Boso sao o saom-ma tolanoon-na, nai lelek o saom-ma bei naso'da.

¹⁹ Boso sungu moo inak esa, nai lelek ana hapu bulak, nanahu, inak ndia bei nai manggenggeok dale.

²⁰ Boso sungu moo hataholi fe'ek saon; nana tatao-nono'ik ndia, ana tao-na o da'di manggenggeo.

²¹ Boso fe o anam esa, fo tunu-hotun nai sosongo-tatangok Molokh-ka dalek, nanahu tatao-nono'ik ndia, tao nakadadaek o MANETUALAIN na'den-na.

²² Touk ta bole sao touk fa. Manetualain nakamuu-nakadau tatao-nono'ik ndia.

²³ Nau touk do inak boe, ta bole sao bana fa; nana tatao-nono'ik mangalauk ndia ana tao nanggenggeo emi.

²⁴Boso tao manggenggeo o aoinam-ma nenik tatao-nono'ik sila-la, nana no enok ndia, leoina manaleo makahuluk neme emi nai Kanaan-na, ala tao langgenggeo aoinan-nala so. Hu ndia de, MANETUALAIN usi henis, fo ela emi hapu leo nusak ndia.

²⁵Ala tao la'iesak tatao-nono'ik nanamaluak sila-la, nalosa sila daen-na da'di nanggenggeo. Boema MANETUALAIN hukus, ma Ana ta fes loak, fo ala leo lai naa fa. Tehu emi boso tao tatao-nono'ik sila-la makandondook. Emi basa-basam-mala hataholi Israel, ma hataholi nusa dea manaleo lahele sama-sama loo emi-a, muse tunga MANETUALAIN nakaneneten ma paletan-nala,

²⁸fo ela Ana boso huku emi, ma Ana usi heni emi neme dae ndia mai, sama leo hataholi fo ta lalelak MANETUALAIN-na, ala leo lai naa, te emi beita mai fa.

²⁹Emi bubuluk, mae ba'eneu see fo ana tao tatao-nono'ik nanamaluak sila-la soona, ana ta da'di Manetualain anan-nala so'on.

³⁰Boema, MANETUALAIN nafa'da nae, “Tunga Au fe nakanenetek-kala leona, fo boso nanadulak neme hataholi fo ala leo lakahuluk neme emi nai dae Kanaan-na, tatao-nono'in-nala. Boso tao manggenggeo o aoinam-ma mesak-kana, nenik tatao-nono'ik sila-la. Au, fo emi MANETUALAIN.”