Read Termanu IMAMAT 23 Bible Online

IMAMAT 23 - Termanu bible

IMAMAT 23

¹MANETUALAIN fe Musa

²nakanenetek-kala la'eneu tao agama fai malolen-nala, fo muse nanapo'a-bengak da'di leo fai malole soaneu makaluku-makatele.

³ Hapu faik 6 soaneu naue-nale'di, tehu fai ka hitun-na, fai Sabat, de fai hahaeaok, fo faik ndia nanahele hehelik ba'eneu MANETUALAIN. Nai faik ndia, emi muse makabubua, fo sene-do'ok, ma ta bole maue-male'di fa.

⁴MANETUALAIN naketu fai-fai malole fo emi muse po'a-bengan nai faik nananaketuk-ka, nde sila.

⁵ Tao fai malole Paskah soaneu fe ha'da-holomata neu MANETUALAIN, mulai nai lelek le'do tenak, fo nai hataholi Yahudi-la bula ka esan-na, fain 14.

⁶ Balahaa, fo bulak-ka fain 15 soona, mulai tao fai malole Loti Ta Pake Laluteik-ka, ma nai faik hitu dalen-na, emi ta bole mi'a loti fo taon pake laluteik fa.

⁷Nai fai ka hituk sila-la dalek, emi muse tunu-hotu tutunu-hohotu nana'ak soaneu MANETUALAIN. Nai feta ndia fai makasososan-na, ma fai ka hitun-na, emi muse makabubua, fo tao makaluku-makatele, ma ta bole tao ue-le'dis mabela fa.

⁹Metema, emi losa nusak fo MANETUALAIN fen neu emi, fo emi ketu-kolu dae-a buna-boan soona, muse meni gandum puputu makasososak-ka leo imam-ma neu.

¹¹Nai faik fo basa fai Sabat-ta, imam-ma muse tunu-hotu gandum ndia, da'di leo tutunu-hohotu natutu'duk neu MANETUALAIN, fo ela MANETUALAIN namahoko.

¹²Nai faik fo emi tunu-hotu gandum ndia, emi muse tunu-hotu soaneu tutunu-hohotu nanatunuk-ka, bi'ilopo maneanak esa teun esa boe, ma ta lu'u-la'ak fa.

¹³Tunu-hotu ha'desopuk nanasese'do mina setun kilo dua, soaneu tutunu-hohotu nanatunuk-ka. Tutunu-hohotuk ndia, boon-na nandaa no MANETUALAIN dalen-na. Boeo tunu-hotu angol litel esa, sama-sama no tutunu-hohotuk ndia.

¹⁴Emi beita meni tunu-hotuk ndia leo MANETUALAIN neu fa te, ta bole mi'a gandum beuk ndia faaanak boen, nau mamatak do nanadalak do nanatunuk da'di loti so boe. Basa emi tititi-nonosim-mala, muse tunga nakanenetek ndia losa dodoon-na.

¹⁵ Mulai neme faik fo basa fai Sabat-ta, fo nai lelek emi tunu-hotu gandum puputu makasososak-ka soaneu MANETUALAIN-na, emi muse leke mamaso katemak hitu.

¹⁶Nai fai ka limahulun-na, fo nde faik fo basa Sabat ka 7-a, emi muse meni tutunu-hohotu nana'ak soaneu MANETUALAIN.

¹⁷Uma loo esan-na, muse tunu-hotu loti dua, soaneu tunu-hotu natutu'duk ba'eneu MANETUALAIN. Muse tao loti esa-na neme ha'desopu sopuanak kilo dua, ma pake laluteik, fo muse fen leo MANETUALAIN neu, da'di leo tunu-hotuk neme dae-a buna-boa makasososan-na mai.

¹⁸Leoina Israel-la muse tunu-hotu bi'ilopoana hitu, teuk beke esak, sapi maneanak esa, ma bi'ihiik dua, sama-sama no loti ndia. Ta bole hapu bana lu'u-la'ak nai basa bana sila dalek fa, ma muse nanatunu-hotuk soaneu tutunu-hohotu nanatunuk, no tutunu-hohotu nana'ak ma tutunu-hohotu angol-la ba'eneu MANETUALAIN. Tutunu-hohotuk sila-la, boon-na nandaa no MANETUALAIN dalen-na.

¹⁹Boeo, tunu-hotu bi'ihii mane esa, soaneu tutunu-hohotuk fo sala-singok hapu ampon, ma bi'ilopo maneanak dua, teuk beke esak, soaneu tutunu-hohotu mole-dame.

²⁰Imam-ma muse tunu-hotu loti ma bi'ilopoana ka duak sila-la, da'di leo tutunu-hohotu natutu'duk ba'eneu MANETUALAIN, fo imam-ma baba'en-na nde ndia. Tutunu-hohotuk sila-la nde been-na malalao-malalafuk.

²¹Nai faik ndia, emi muse makabubua fo sene-do'ok, ma ta bole tao ue-le'dis mabela fa. Emi tititi-nonosim muse tunga paleta ndia, losa dodoon-na, ma ala leo su'di nai mamanak bee boe.

²² Metema, emi ketu-kolu soona, boso ke'di gandum manamolik manai emi tinam-ma su'un-na, ma ketu-kolu basa soona, boso meu hehele gandum bei elak-kala. Nemen-na, fo sila soaneu hataholi nuu-taa hata-taak-ka, ma hataholi nusa dea-la. MANETUALAIN nde been-na, emi Manetualaim-ma.

²³Nai hataholi Yahudi-la bula ka hitun-na, fain esa soona, muse tao feta, da'di leo fai hehelik soaneu hahaeaok. Fai hahaeaok ndia, ta'du-tanan nde pupuuk-ka liin-na, de emi muse makabubua, fo sene-do'ok.

²⁵Nai faik ndia, tunu-hotu tutunu hohotu nana'ak soaneu MANETUALAIN, ma boso tao ue-le'dis mabela.

²⁶ Nai hataholi Yahudi-la, bula ka hitun-na fain sanahulu nde been-na, faik fo feta tunga teuk-ka soaneu leoina Israel-la sala-singon hapu ampon. Nai faik ndia, emi muse okaaom-ma, ma makabubua fo sene-do'ok, boema tunu-hotu tutunu-hohotu nana'ak fe MANETUALAIN.

²⁸Boso maue-male'di, nana faik ndia nde been-na, faik fo sala-singok hapu ampon, fo ela emi hapu ampon nai emi MANETUALAIN matan.

²⁹Ba'eneu see, fo na'a hata esa nai faik ndia soona, ana ta da'di Manetualain anan-nala so'on.

³⁰Ma ba'eneu see, fo naue-nale'di nai faik ndia soona, MANETUALAIN nde hukun nenik huhuku mamates-sa.

³¹Nakanenetek ndia, nanapakek soaneu basa emi tititi-nonosim, fo ala leo su'di nai bee boe.

³²Mulai neme lelek le'do-a tenak, fo nai bulak ndia fain sio, losa lelek fo le'do tenak, nai bulak-ka fain sanahulu, emi muse taon sama leo fai Sabat-ta, fo fai hehelik soaneu hahaeaok. Nai faik ndia dalen-na, emi muse okaaom-mala.

³³ Feta Lalaa Akidook-ka dodoon-na faik hitu, fo ana mulai nai hataholi Yahudi-la, bula ka hitun-na, fain 15.

³⁵Nai fai ka hituk sila-la dalek, emi muse tunu-hotu tutunu-hohotu nana'ak. Nai fai makasososan-na, ma fai ka falun-na, emi muse makabubua, fo sene-do'ok, ma tunu-hotu tutunu-hohotu nana'ak soaneu MANETUALAIN. Boso tao ue-le'dis mabela, nai faik ndia.

³⁷MANETUALAIN naketu agama fai malolen-nala nde ndia, de emi muse po'a-bengan. Nai fai malole sila-la, emi muse fe ha'da-holomata neu MANETUALAIN nenik makabubua, fo sene-do'ok, ma tunu-hotu tutunu-hohotu nana'ak, tutunu-hohotu nanatunuk, tutunu-hohotu nana'ak, tutunu-hohotu bana, ma tutunu-hohotu angol oek de'u nanapaluuk tunga faik-ka.

³⁸Fai malole sila-la, nalupa tatamak neu fai-fai Sabat biasa, da'di tunu-hotuk sila-la nde been-na, tatamak neu emi tutunu-hohotu biasam-mala, neu emi tutunu-hohotum soaneu nasar, do tutunu-hohotuk no dale hihii-nanau mesan, fo emi fen neu MANETUALAIN.

³⁹Ketu-kolu basa, fo mulai hataholi Yahudi-la, bula ka hitun-na, fain sanahulu lima soona, emi muse tao feta faik hitu dalen-na. Fai makasososan-na, ma fai ka falun-na nde been-na, fai hehelik soaneu fai hahaeaok.

⁴⁰Nai fai makasososak-ka, emi muse seu ai boa neulauk-kala neme emi osim dale mai, boeo ketu ai palma doon-nala, ma helu ai manaleloaka-kala ndanan-nala, fo mulai tao feta namahoko-setelek soaneu fe ha'da-holomata neu emi MANETUALAIN.

⁴¹Emi muse tao feta ndia nakandoo, nai faik hitu dalen-na. Emi tititi-nonosim, muse tao tunga nakanenetek ndia losa dodoon-na.

⁴²Faik hitu dalen-na, leoina Israel-la muse lahele leme lalaa akidoon-nala dalek,

⁴³fo ela emi tititi-nonosim bubuluk lae MANETUALAIN nadenu leoina Israel-la, leo lai lalaa ta kandaak-kala dalek, nai lelek MANETUALAIN nos kalua leme Masir mai. Ndia nde emi Amam Manetualaim-ma.

⁴⁴Leondiak, Musa nanduku-nalosak neu leoina Israel-la nakanenetek-kala, la'eneu fai malole-la eno-dalan leo beek, fo fe ha'da-holomata neu MANETUALAIN.