Read Termanu IMAMAT 4 Bible Online

IMAMAT 4 - Termanu bible

IMAMAT 4

¹MANETUALAIN nadenu Musa

²fo ana po'a-benga neu leoina Israel-la, nae su'di see, fo ta name'da fa te ana tao sala-singok, nenik ana la'olena MANETUALAIN paletan esa soona, muse ana tunga nakanenetek-kala nde ia.

³Metema manatao sala-singok-ka nde Imam Matuaina, nalosa basa leoina Israel-la tao salak soona, muse ana tunu-hotu fe MANETUALAIN, sapi maneanak esa, ta lu'u-la'ak fa, fo ela sala-singon hapu do'o do ampon.

⁴Muse neni sapi ndia leo MANETUALAIN Lalaa Teman-na, lelesun-na neu. Imam Matuaina ndia, muse ana lalaa liman-na neu bana ndia langan lain, boema ana ta'tin nai Lalaa Temak-ka matan-na.

⁵Muse neni daan-na seli leo Lalaa Temak dale neu.

⁶Boema, muse ana dope limaku'un-na leo daak ndia dalek neu, fo ana pisin la'i hitu neu tema lelesu matan fo manata'da fe'e Kama Malalao-malalafuk-ka

⁷Muse, ana lose daak ndia seli neu mei tunu-hotu boomeni kaboomenik-ka, susulan manai bu'un haas, nai Lalaa Temak dale, boema, muse ana pisi daak fo bei elak ndia, neu mei tunu-hotu nanatunuk-ka sosolon dale, nai Lalaa Temak-ka lelesun-na, uluk.

⁸Imam-ma, muse ho'i-na sapi mane ndia minan-na lala'en-na, fo nde tei-aten minan-na,

⁹bade'en-na no minan-na, ma ate neulaun-na.

¹⁰Muse ana tunu basa sila-la, nai mei tunu-hotuk nanatunuk lain, sama leo tutunu-hohotu mole-dame-a boe.

¹¹Tehu sapi ndia isin-na, loun-na, langan-na, ein-na, tei-ate lenak-kala ma ngganggaen-na boe,

¹²da'di basa-basan lala'en-na, muse nenis leo mamana oofuk-ka deak neu, ta'da fe'e paa nanahele basak-kala. Muse tunu sapi ndia, nai mamana popo'a afu-a, fo nde mamana nanahele hehelik, soaneu tataos leondiak-ka.

¹³Metema manamasala-masingok ndia, basa hataholi Israel-la lala'en-na, nana ta lame'da fa te ala la'olena MANETUALAIN paletan esa,

¹⁴boema no lai-laik, sala-singok ndia nanabubuluk soona, salanik-kala muse leni sapi maneanak esa leo MANETUALAIN Lalaa Teman-na bafan-na neu. Bana ndia muse nanatunu-hotuk, soaneu tutunu-hohotu sala-singok-ka, hapu do'o do ampon.

¹⁵Basa mauli-malangan leoina, muse lalaa sila liman-nala neu bana ndia langan lain, boema ala ta'tin nai mamanak ndia.

¹⁶Imam Matuaina, muse neni bana ndia daan seli leo Lalaa Temak dale neu.

¹⁷Nai ndia, muse ana dope limaku'un-na leo daak ndia dalek neu, fo ana pisin la'i hitu neu tema lelesu fo manata'da fe'e Kama Malalao-malalafuk-ka, bafan-na.

¹⁸Muse, ana lose daak ndia seli neu mei tunu-hotu boomenik-ka susulan manai bu'un haas, nai Lalaa Temak dale, boema muse ana pisi daak fo bei elak ndia, neu mei tunu-hotu nanatunuk-ka sosolon dale, nai Lalaa Temak-ka lelesun-na bafan-na.

¹⁹Muse ana ho'in-na la'iesak bana ndia minan-na, fo tunun nai mei tunu-hotuk lain.

²⁰Tataon-na sama leo tunu-hotu sapi mane soaneu tutunu-hohotuk fo sala-singok hapu do'o do ampon. Tataon-na leondiak, ba'eneu Imam Matuaina tunu-hotu tutunu-hohotuk soaneu salanik-ka sala-singon-nala, soona neukose, MANETUALAIN fe do'o do ampon neu sala-singok sila-la.

²¹Basa soona, muse neni sapi mane ndia paan-na seli leo deak neu, fo tunun nai mamana ofu-a deak, sama leo tunu-hotu sapi mane nanata'tik soaneu tutunu-hohotuk fo Imam Matuaina ndia sala-singon hapu do'o do ampon. Tunu-hotu tutunu-hohotuk fo salanik-ka sala-singon hapu do'o do ampon-na, tataon-na leondiak.

²²Metema, manatao sala-singok-ka, hataholi manakoasa esa, nanahu ta name'da fa te ana la'olena MANETUALAIN paletan esa,

²³boema no lai-laik name'da-nan soona, muse ana tunu-hotu bi'ihii mane esa, ta lu'u-la'ak, soaneu sala-singon hapu do'o do ampon.

²⁴Muse, ana lalaa liman-na neu bana ndia langan lain, boema ana do'don nai mei tunu-hotuk-ka boboan kii, fo nai mamana do'do bana, soaneu tutunu-hohotu nanatunuk.

²⁵Imam-ma muse dope limaku'un-na leo bana ndia daan dale neu, fo ana losen neu mei tunu-hotuk-ka susulan-nala nai mei bu'un haas, ma ana pisi daak fo bei elak-ka leo mei tunu-hotuk-ka sosolon dale neu.

²⁶Basa soona, muse tunu la'iesak bana ndia minan-na nai mei tunu-hotuk lain, sama leo tutunu-hohotu mole-dame-a boe. Imam-ma tataon-na leondiak, soaneu ana fe tutunu-hohotuk ba'eneu hataholi manakoasa esa, soona neukose, MANETUALAIN fe do'o do ampon neu hataholi ndia sala-singon.

²⁷ Metema, lauingu esa, ana tao sala-singok, nanahu ta name'da fa te ana la'olena MANETUALAIN paletan esa,

²⁸boema no lai-laik name'da-nan soona, muse ana tunu-hotu bi'ihiiina esa, ta lu'u-la'ak fa.

²⁹Muse, ana lalaa liman-na neu bana ndia langan lain, boema ana do'don nai mei tunu-hotuk-ka boboan kii, fo nai mamana do'do bana, soaneu tutunu-hohotu nanatunuk-ka.

³⁰Imam-ma, muse dope lima ku'un-na leo bana ndia daan dale neu, fo ana losen neu mei tunu-hotuk-ka susulan-nala nai mei-a bu'un haas, ma ana pisi daak fo bei elak-ka leo mei tunu-hotuk-ka sosolon dale neu.

³¹Muse, ana ho'in-na la'iesak bana ndia minan-na, sama leo tutunu-hohotu mole-dame-a boe. Imam-ma, muse tunu bana ndia minan-na nai mei tunu-hotuk lain, fo daenga boon-na nandaa no MANETUALAIN dalen-na. Imam-ma tataon-na leondiak, soaneu ana fe tutunu-hohotuk ba'eneu hataholi lauingu esa sala-singon, soona neukose MANETUALAIN fe do'o do ampon neu hataholi ndia.

³²Metema hataholi esa tunu-hotu bi'ilopo esa, soaneu sala-singon hapu do'o do ampon soona, bi'ilopo ndia, muse bi'ilopoina ma ta lu'u-la'ak fa.

³³Muse, ana lalaa liman-na neu bana ndia langan lain, boema ana do'don nai mei tunu-hotuk-ka boboan kii, fo mamana do'do bana soaneu tutunu-hohotu nanatunuk-ka.

³⁴Imam-ma, muse dope limaku'un-na leo daak ndia dalek neu, fo ana losen neu mei tunu-hotuk-ka susulan manai bu'un haas, ma ana pisi daak fo bei elak-ka leo mei tunu-hotuk-ka sosolon dale neu.

³⁵Basa soona, muse ana ho'i-na la'iesak bana ndia minan-na, sama leo tutunu-hohotu mole-dame-a boe. Muse tunu bana ndia minan-na nai mei tutunuk-hohotuk lain, sama-sama no tutunu-hohotu nana'ak fo nanatunu-hotuk neu MANETUALAIN. Imam-ma tataon-na leondiak, soaneu ana fe tutunu-hohotuk ba'eneu hataholi ndia sala-singon, soona neukose, MANETUALAIN fe do'o do ampon neu hataholi ndia.