Read Termanu IMAMAT 7 Bible Online

IMAMAT 7 - Termanu bible

IMAMAT 7

¹Nakanenetek ia-la, la'eneu tutunu-hohotuk soaneu bae hutak. Tutunu-hohotuk ndia, malalao-malalafuk nanseli.

²Bana soaneu tutunu-hohotuk ndia, muse do'don nai mamanak do'do bana, soaneu tutunu-hohotu nanatunuk-ka, boema pisi daan-na neu mei tunu-hotuk-ka boboan haas.

³Imam-ma muse tunu-hotu la'iesak bana ndia minan-na, nai mei tunu-hotuk lain, fo nde: ikon-na no minan-na, mina tei dalen-na lala'en-na, bade'en-na no minan-na, ma ate neulaun-na.

⁵Tunu basa sila lala'en-na nai mei tunu-hotuk lain, fo da'di leo tutunu-hohotu nana'ak ba'eneu MANETUALAIN. Tutunu-hohotuk ndia nde been-na, soaneu tutunu-hohotuk bae hutak-ka.

⁶Basa touk manai imam-mala teidale-bobongin-na dalek, bole la'a paa tutunu-hohotuk ndia, tehu muse la'an nai mamanak fo nanahele hehelik, nanahu tutunu-hohotuk ndia malalao-malalafuk nanseli.

⁷Soaneu tutunu-hohotuk sala-singok-ka hapu ampon, ma tutunu-hohotuk soaneu bae hutak-ka, nakaneneten-nala sama, fo nde: Bana nanatunu-hotuk-ka, paan-na nde been-na, imam manatunu-hotuk-ka baba'en ndia.

⁸Bana ndia loun-na boeo, imam-ma nuun ndia.

⁹Tutunu-hohotu nanatunuk fo tunun nai mamana tutunuk dale, do nasun nai uledae dale, do nanadalak-ka, imam manatunu-hotuk-ka baba'en ndia.

¹⁰Tehu tutunu-hohotu nana'ak fo ta nananasuk, nau nanasese'dok no mina do tuuk boe, basa-basan lala'en-na soaneu imam fo Harun tititi-nonosin-nala, de ala muse ba'en fo bekebaba'uk.

¹¹Nakanenetek la'eneu tutunu-hohotuk mole-dame, fo nanatunu-hotuk soaneu MANETUALAIN-na nde ia.

¹²Metema, tutunu-hohotuk ndia, nanatunu-hotuk soaneu noke makasi, soona muse tunu-hotu bana ndia, no loti fo ta pake laluteik fa. Loti ndia bole makate, taon neme ha'desopu nanakamek no mina setun, bole loti tuuk ni'ianak boe, fo nanalosek nenik mina, do kokis fo taon neme ha'desopuk-ka no mina setun.

¹³Fe'ek neme ndia mai boe, muse tunu-hotu loti fo ta pake laluteik fa.

¹⁴Neme loti mata-matak sila-la mai, muse tunu-hotu seli soaneu MANETUALAIN, boema imam fo manaho'in-na bana ndia daan-na, de ana pisin neu mei tutunu-hohotuk-ka, soaneu tutunu-hohotuk mole-dame-a, baba'en-na nde ndia.

¹⁵Muse na'a bana ndia paan-na, nai faik fo bana ndia nanatunu-hotuk, ma ta bole ela faaanak boen, losa balahaa fafaik.

¹⁶Metema, hataholi esa neni tutunu-hohotuk mole-dame, fo ana tao natetu hala hehelun neu MANETUALAIN, do soaneu tutunu-hohotuk neme dale nameme'dan-na mai, soona ta paluu la'a basa paa ndia, nai faik ndia dalen-na fa. Bole na'a paa bei elak-kala, nai fai balahaan-na.

¹⁷Metema neu fai ka telun-na, te bei ela paa soona, muse hotuheni paa ndia.

¹⁸Tehu metema, neu fai ka telun-na, te bei la'a paa ndia boe, soona neukose tutunu-hohotuk ndia ta nanasipok fa, ma ta neni baba'e-papalak ba'eneu hataholi ndia fa, nakalenak, ana da'di nana'a nalulik. Hataholi mana'ak-ka nasala, de muse ana lu'a-lepa tatao-nono'in buna-boan.

¹⁹Metema, hata manggenggeok esa, la'e paa soona, muse hotuhenin, ma ta bole na'a fan. Ka'da hataholi fo ta nanggenggeo fa, nde bole na'a tutunu-hohotuk mole-dame-a, paan-na.

²⁰Metema, hataholi ndia bei nanggenggeo, te na'a paa ndia soona, hataholi ndia ta da'di MANETUALAIN anan-nala so'on.

²¹Metema hataholi esa na'a paa tutunu-hohotuk ndia, te ana koila'e basa hata manggenggeok esa so, nau neme hataholi daebafak-ka mai, do neme bana-manu mai boe, hataholi ndia boeo, ta da'di MANETUALAIN anan-nala so'on.

²²MANETUALAIN fe Musa nakanenetek-kala nde ia,

²³soaneu leoina Israel-la. Ta bole la'a sapi minan-na, bi'ilopo do bi'ihiik minan-na fa.

²⁴Bana fo ana mate aon do hu kande bana makaak-kala kaa lisan soona, ta bole la'a minan-na fa, tehu bole paken soaneu paluu fe'e-fe'ek-kala.

²⁵Hataholi fo na'a bana mina, neme bana fo bisa nanatunu-hotuk soaneu tutunu-hohotu nana'ak ba'eneu Manetualain-na, ana ta da'di MANETUALAIN anan-nala so'on.

²⁶ Hataholi Israel fo ana leo su'di nai bee boe, ta bole na'a manupui-a daan-na, do bana fe'e-fe'ek-kala daan-na fa.

²⁷See la'olena nakanenetek sila-la soona, ana ta da'di MANETUALAIN anan-nala so'on.

²⁸MANETUALAIN fe Musa nakanenetek-kala nde ia,

²⁹soaneu leoina Israel-la. Ba'eneu see, fo neni tutunu-hohotuk mole-dame soona, muse ana pe'da fe'e seli, fo soaneu tunu-hotu hehelik ba'eneu MANETUALAIN.

³⁰Ndia mesak-kana nde muse neni tutunu-hohotu nana'ak ndia. Muse ana tunu-hotu bana ndia minan-na, ma tenen-na, fo da'di leo tutunu-hohotuk natutu'duk ba'eneu MANETUALAIN.

³¹Imam-ma muse tunu bana ndia minan-na, nai mei tunu-hotuk lain, tehu tenen-na nde been-na, basa imam-mala baba'en nde ndia.

³²Muse fe sakibolo konan-na, da'di leo tunu-hotu hehelik

³³soaneu imam fo manatunu-hotu tutunu-hohotuk mole-dame ndia daan-na, no minan-na.

³⁴Tenen-na ma sakibolo konan-na nde been-na, tutunu-hohotu hehelik, fo MANETUALAIN ho'in neme leoina Israel-la tutunu-hohotu natutu'dun-na mai, de Ana fen neu basa imam-mala. Fo ndia nde leoina Israel-la tutulu-fafalin ba'eneu basa imam-mala, losa dodoon-na.

³⁵Neme nana'ak fo nanatunu-hotuk ba'eneu MANETUALAIN-na, baba'ek ndia nde Ana fen neu Harun no anan-nala, nai faik fo nanandoo eik da'di imam.

³⁶Nai faik ndia, MANETUALAIN paleta leoina Israel-la, fo ela neme basa sila tutunu-hohotun mai, baba'ek ndia nde soaneu basa imam-mala. Leoina Israel-la, muse tunga nakanenetek ia-la losa dodoon-na.

³⁷Leondiak nakanenetek la'eneu tutunu-hohotuk nanatunuk, tutunu-hohotuk nana'ak, tutunu-hohotuk sala-singok hapu ampon, tutunu-hohotuk soaneu bae hutak, tutunu-hohotuk soaneu ndo eik-ka, ma tutunu-hohotu mole-dame.

³⁸MANETUALAIN fe Musa paleta sila-la, neme Letek Sinai-a, fo nai lelek nadenu leoina Israel-la, tunu-hotu tutunu-hohotuk nai mook solokaek Sinai-a.