Read Termanu IMAMAT 9 Bible Online

IMAMAT 9 - Termanu bible

IMAMAT 9

¹Basa feta ndo eik ndia faik esa, fo nai fai ka falun-na boema, Musa naloo Harun no anan-nala, ma basa leoina Israel-la mauli-malangan-nala.

²Musa nafa'da Harun nae, “Pa'a-ma sapi maneanak esa, ma bi'ilopo mane esa, duas ta lu'u-la'ak fa. Tunu-hotu bana ka duak sila-la soaneu MANETUALAIN, fo sapi mane-a, soaneu tutunu-hohotuk sala-singok hapu ampon, ma bi'ilopo mane-a, soaneu tutunu-hohotuk nanatunuk.

³Boema, madenu leoina Israel-la, fo ala tunu-hotu bi'ihii mane esa, soaneu tutunu-hohotuk sala-singok hapu ampon, ma sapiana esa, boema bi'ilopoana esa, teuk beke esak, ma ta lu'u-la'ak fa, fo soaneu tutunu-hohotu nanatunuk.

⁴Madenus, fo ala tunu-hotu sapi mane esa, ma bi'ihii mane esa boe, fo soaneu tutunu-hohotuk mole-dame. Sila muse tunu-hotu basa sila-la, soaneu MANETUALAIN, sama-sama no tutunu-hohotuk nana'ak fo nanatao mina, nanahu nai faik ia, MANETUALAIN mai leo sila mais.”

⁵Leni Musa helu basa hata-la, leo lalaa Temak-ka matan-na neu, ma basa salanik lala'en fo lakabubua lai ndia soaneu ala sene-do'ok neu MANETUALAIN.

⁶Boema Musa nafa'da nae, “MANETUALAIN nadenu emi tao basa ia-la, fo ela emi hapu mita MANETUALAIN mamain-na, ndela-sa'an.”

⁷ Basa ndia boema, nafa'da Harun nae, “Muu leo mei tunu-hotuk-ka muu, fo sadia tutunu-hohotuk sala-singok hapu do'o do ampon, ma tutunu-hohotuk nanatunuk-ka, fo ela MANETUALAIN fe do'o do ampon neu o sala-singom ma salanik-ka sala-singon. Taon sama leo hata fo MANETUALAIN paletan.”

⁸Boema, Harun neu leo mei tunu-hotuk-ka neu, de ana ta'ti sapi mane fo sanga nanatunu-hotuk, soaneu ndia sala-singo mesan-na, hapu do'o do ampon.

⁹Harun anan-nala leni bana ndia daan-na leo Harun neu, boema ana dope limaku'un-na leo daak ndia dalek neu, de ana losen neu mei tunu-hotuk-ka susulan-nala, nai mei-a bu'un haas. Basa ndia boema, ana pisi daa lenak-ka leo mei tunu-hotuk-ka sosolon dale neu.

¹⁰Ana tunu bana ndia minan-na, bade'en-na, ma bana ndia paa neulaun-nala, nai mei tunu-hotuk lain, sama leo hata fo MANETUALAIN paletan neu Musa.

¹¹Tehu, ana tunu bana ndia paan-na, ma loun-na nai mamana oofuk-ka deak.

¹²Basa boema, Harun do'do bana, fo soaneu tutunu-hohotu nanatunuk-ka, ba'eneu ndia. Harun anan-nala leni fen bana ndia daan-na, de ana pisin neu mei tunu-hotuk-ka, boboan haas.

¹³Basa ndia boema, leni fen bana ndia langan-na, ma bibiak fe'e-fe'en-nala, de ana tunus nai mei tunu-hotuk lain.

¹⁴Basa boema, ana safe bana ndia tei-aten ma sakibolon-na, de ana tunun no tutunu-hohotu nanatunuk-ka, nai mei tunu-hotuk lain.

¹⁵Basa boema, ana tunu-hotu bi'ihiik soaneu tutunu-hohotuk sala-singok hapu do'o do ampon, ba'eneu salanik-kala sala-singon hapu do'o do ampon Ana do'do bi'ihiik ndia, de ana tunu-hotun sama leo tutunu-hohotuk soaneu ndia sala-singo mesan-na hapu do'o do ampon.

¹⁶Basa boema, ana ho'i-na bana, fo soaneu tutunu-hohotu nanatunuk-ka boe, de ana tunu-hotun tunga nakanenetek-ka.

¹⁷Basa ndia boema, ana tunu-hotu tutunu-hohotu nana'ak-ka; ana ho'i-na ha'desopuk nafanggetek esa, de ana tunun nai mei tunu-hotuk lain. Ndia nde been-na, tatamak neu tutunu-hohotu nanatunuk tunga faik-ka.

¹⁸ Boema ana ta'ti sapi mane esa, ma ana do'do bi'ilopo mane esa boe, fo soaneu tutunu-hohotuk mole-dame ba'eneu hataholi Israel-la. Harun anan-nala leni fen bana ndia daan-na, de ana pisin neu mei tunu-hotuk-ka boboan haas.

¹⁹Ana pe'da sapi ma bi'ihiik ndia, bibian maminan-na neu

²⁰bana ka duak sila-la tenen lain, boema Harun tunus nai mei tunu-hotuk lain.

²¹Ana tunu-hotu bana sila-la tenen-na, ma sakibolo konan-na, fo da'di leo tutunu-hohotu natutu'duk ba'eneu MANETUALAIN. Basa imam-mala baba'en-na nde ndia, sama leo Musa paletan-na.

²² Tunu-hotu basa tutunu-hohotuk sila-la boema, Harun lalaa liman-na neu hataholi Israel-la lain, de ana ba'e-palas, boema ana kona falik.

²³Basa boema, Musa no Harun leu leo MANETUALAIN Lalaa Teman dale leu. Basa ndia boema, ala kalua falik, de ala ba'e-pala hataholi Israel-la. Boema, basa hataholi Israel-la, lita MANETUALAIN mamain-na ndela-sa'an.

²⁴No kaiboik, MANETUALAIN nakona ha'i mai, de hotu heni tutunu-hohotu nanatunuk-kala, ma paa bibiak mamina manai mei tunu-hotuk lain-na. Lelek hataholi Israel-la litan boema, ala eeki-latadale ma ala sene-do'ok.