Read Termanu YEREMIA 10 Bible Online

YEREMIA 10 - Termanu bible

YEREMIA 10

¹Hataholi Israel-la lemin, mamanene MANETUALAIN hala-hehelun neu emi.

²Manetualain nafa'da nae, “Boso na'da leoina fe'ek-kala ha'da tataon, ma mita ta'du tana nai lalai-a, fo leoina sila bii-mamata'u soona boso nggenge.

³Leoina sila-la ha'da-tataon-nala sosoa-ndandaan taak makandondook. Ala lo'o ai nai nula dale, fo ladenu tuka ai-la tao-no'in da'di dodoki-dudulak sosongok-tatangok.

⁴Basa soona dodoki-dudulak ndia, nanabalias nenik lilopilas ma lilofulak, boema tao latea-lahelen nenik paku fo boso tu'da.

⁵Dodoki-dudulak sosongo-tatangok sila-la sama leo hataholi nai osi aido dale. Sila ta hapu kokolak fa, ta hapu nggani ein-nala fa, ma muse so'us. Boso bii-mamata'u neus, nana ala ta tao mangalauk neu emi fa; Ta lakatatakak tao malole boen fa.”

⁶MANETUALAIN do mandela masa'ak, ta hapu sama leo O fa, O na'dem-ma matua-madema ma henuk no koasa.

⁷ See ndia fo ana ta nau namahele fa, neu O, manek la'eneu leoina-la? Te'e-te'e o manafe ha'da-holomata nanseli. Neme basa malelak fo manai leoina-la tala'da ma neme basa sila manen-nala mai, ta hapu hataholi esa boen naksasamak no O fa, Ou MANETUALAIN.

⁸Sila basa-basas nggoa-panganaa nana lamatua daebafan-na ka'da ai tuk mesak-kana, ma ta hapu nanoli hata neulauk fa.

⁹Ndia manapopoti-papaluk nenik lilofulak ma lilopilas fo nananenik neme Spanyol ma kota Ufas-sa, fo basa-basas lala'en-na lima tataak neme basa lima leen ma mana tao nalelak lilopilas-sa. Papake-ngganggaon neme temak pilas balanggeok ma tema pilas nulak-ka mai, fo nanatao neme basa manatenu malelak-ka mai.

¹⁰Tehu O, MANETUALAIN, Manetualain fo matetuk-ka, Manetualain fo manafe so'dak-ka, Manek fo manaketu basa tak. Metema O mamanasa soona, daebafak-ka nanggengo, metema O nasam-ma lua soona leoina-la ta lakatatak fa. (

¹¹Hei anang-ngala lemin, emi muse mafa'da neus mae, lamatua daebafak-kala fo ta lakadada'dik lalai-a ma daebafak ndia fa, neukose nanatao namopo-namatek. Neukose sila mopok-kasa neme daebafak ia mai.)

¹²MANETUALAIN nakadada'dik daebafak-ka nenik koasan-na, Ana heheo-hihiluk daebafak-ka nenik manatee-tenon-na, ma nataba lalai-a nenik dudu'a-aafin-na.

¹³Ka'da nenik paletan-na, de oe-a nadodolo nai lalai-a. Ana fe ko'as-sa neme daebafak-ka pe'dan, ma ana tao ndelas-sa lasalolo'de nai u'dan dale, boema ana haitua anin neme mamana pepe'dan-na.

¹⁴Hataholi daebafak-ka nita basa sila-la boema lame'da, lae ndia nggoak ma ta nanuu dudu'a-aafik fa. Basa manatao nalelak lilopilas mopo matan-nala, nana sila tao dodoki-dudulak sosongo-tatangok ndia ta te'e-te'ek fa ma hahaen ta.

¹⁵Sosongo-tatangok sila beli taak-kala, nanda nanahokinonolik ma nananakadadaek. Metema losa fain-na soona sila mopo-mate.

¹⁶Yakob etualain-na ta sama leo sosongo-tatangok ndia fa; Ndia manamakadada'dik basa hata lala'en-na. Na'den-na nde MANETUALAIN Fo Manakoasa; Ndia nde hele Israel da'di Anan-nala.

¹⁷Hei Laun Yerusalem-mala lemin, ala sapu-la emi! Hu ndia de malai beno'u leon-na!

¹⁸Oek ia soona neukose MANETUALAIN po'ilotak basa leoina Yehuda-la neu mamana okak-ka; Neukose Ana tao nakalulutuk emi basa makandondook. Ndia nde been-na ala-heheluk neme MANETUALAIN.

¹⁹Laun Yerusalem lalo bebou lae, “Ami hapu bisu matua de ana ta hapu hai fa. Makahulun-na ami maedaenga toto'a-tataak ia ami lu'a-lepan, te sekona taa.

²⁰Ami lalaa temam-ma, ma talin-nala ketun la'iesak-kasa. Ta hapu manamapadedeik falik lala temak so'on, ma ta tao falik teman-nala fa nanahu la'o basa ni'iana-la so.”

²¹Boema au ata ae, “Ita mauli-malangan sila-la nggoak-kala. Ala ta loke natutu'duk neme MANETUALAIN mai fa, hu ndia de ala ta hapu hata esa boen, ma ita tapasasala su'di leo bee neu.

²²Mamanene dei! Hapu tutuik lae leoina esa nai kii ana sanga tao nale'a-napilik. Neukose soloda'dun-nala tao-la Yehuda kotan-nala da'di nenee lino-linok ma ta hapu manaleo-mapalasa fa. Neukose busa fuik-kala lafuni lai na.”

²³MANETUALAIN, au bubuluk ta hapu hataholi esa boen nanuu koasa fo ana naketu ua-nalen do lelepos nalelak so'dan-na eno-dalan.

²⁴Fepa li'u ami ou MANETUALAIN, tehu boso fepa liu mahe'di ami nanseli. Boeo boso huku ami, metema O nasam-ma be fo'a, nana tao leo beo neukose ami basa-mala mate-mopo.

²⁵Po'a-ngganga O nasam-ma neu leoina fo ta nalelak O fa ma ta nau lakaluku-lakatele neu O fa. Nana sila tao lamate-lamopo O anam-mala makandondook ma ala tao lakalulutuk ami nusam-ma.