Read Termanu YEREMIA 12 Bible Online

YEREMIA 12 - Termanu bible

YEREMIA 12

¹“Ou MANETUALAIN, metema Au eni au dede'ang-nga leo O matam-ma neu, soona tao leo beeo neukose butina-na nae, O nde been-na ndos. Tehu hii atane seluk neu O la'eneu ndos ma matetuk-ka: Tao le'e de hataholi mangalauk-ka so'dan-na natetu? Tao le'e de hu ka nde hataholi fo ta ndos-sa fa ana hapu-dai?

²O sele-tanis sama leo bubu'u-palusa, boema ala lahu-laoka, de ala moli ma labuna-laboa. Ala kokolak soona, ka'da malole-malole mesa-mesan, la'eneu O aoinam-ma, tehu nai dalen-nala dalek soona, tunga ndon-na ala ta mete-lakanae O fa.

³Ou MANETUALAIN, tehu O malelak au. O mita beek-ka fo au tao-no'ik-ka, ma o bubuluk au dale maedaenga tao leo beek soaneu O. Tipa-soli hataholi-hataholi mangalauk sila la leo deak neu, menis sama leo bi'i lopo-a leo mamana dodo'dok-ka neu. Maneas losa fain-na losa soaneu sila nana do'dok.

⁴Nusak ia tuk losa fai hi'da, ma na'un-nala male nai basa tina-la lala'en-na? Manupui-la ma bana-manu fe'ek-ka mates nanahu ami leoinam-mala tatao-nono'i mangalaun-nala. Sila lafa'da lae, neukose Au ta ita sila ua-nalen-na so'on.”

⁵MANETUALAIN nafa'da nae, “Yeremia, metema o da'di manasotak makasusu'dik mo hataholi daebafak-ka, ma neme bee mai-a o bisa makasusu'dik mo ndala-a? Metema o bii-mamata'u nai dae aek-ka, o tao-no'i beek-ka, nai lelek o nai nula na'uanak dea fo nai lee Yarden-na su'un?

⁶O nana malelesi basak so, lena-lenak neme o tolano ka'a-fa'dim-mala mai; sila boeo sapu-la o. Boso mamahele neu sila, leomae sila hala-kokolan-nala makee-mamina.”

⁷MANETUALAIN nafa'da nae, “Au mamana leleong-ngaau ta tao afik neu fan, nusak fo da'di au nung-nga au la'o ela so'on, ma au anang-ngala fo Au sue-laik-kala, au fe heni basas leo musu-a liman dale neu.

⁸Au anang-ngala la'ban Au; sama leo singa nai bafak dale, leondiak boe, sila langao lasale Au.

⁹Sila sama leo manupui fo manupui langafula sapu nas leme basa bu'u-bolok lala'en-na mai. Malo basa bana fuik lala'en-na soaneu tao mabasa la'i esak-kasa.

¹⁰Manakoasa nusa dea ba'uk-ka tao lalutu la'iesak Au osi angol-la, ma ala heheta-aa'i lakalulutuk basa Au tina-osing lala'en-na. Au nusang fo malole-mana'a, ala tao lasafalin da'di moo-solokaek fo mamana nes.

¹¹Memak tete'ek-ka Au ita ala tao Au nusang-nga da'di mamanak nes nan seli. Basa-basan lala'en-na lalengulanga pikok, te ta hapu manatao falik fa.

¹²Hataholimai lamanako nai moo-solokaek selik fo nai letelepak-ka. Au fe natee-natatik-ka neu, soaneu tao nalutu basa nusak-ka, de nalosa ta hapu hataholi naso'da nai mole-dame-a dalek fa.

¹³Au anang-ngala sele-nggali gandum, tehu ala ketu-kolu dila-nggauk. Ala puselaipana no ue osak, tehu buna-boan ta. Au amanasa anseli os de nalosa ala ta ketu-kolu fa.”

¹⁴MANETUALAIN nafa'da nae, “Au hehelu-balatang leoiak la'eneu Israel nusa-nusak titia-tatain-nala, fo manatao nakalulutuk nusak fo Au fen neu Au anang Israel-la. Leondiak boe neukose, Au kalua heni hataholi-hataholi mangalauk sila-la neme sila nusa namon-nala mai, sama leo bubu'u-palusa fo nanafe'a henik neme dae-a mai.

¹⁵Tehu basas nanakalua henik boema, Au sue seluk-kasa bai; de Au o falik basa leoina-la esa-esak leo nusa-namon-nala neu.

¹⁶Metetma ala sipok Au anang-ngala so'da salanin-nala no dale katematu, ma ala nau soo-supa no lafa'da lae, ‘MANETUALAIN fo so'dak-ka,’ — samaleo makahulun-na ala lanoli Au anang-ngala soo-supak neu Baal-la — soona neukose sila da'di Au anang ma so'dan-nala latetu.

¹⁷Tehu leoina fa ala ta nau tunga Au fa soona, neukose Au fe'a henis sama leo bubu'u-palusa, ma Au tao amate-amopos. Au, MANETUALAIN, de manakokolak-ka.”