Read Termanu YEREMIA 14 Bible Online

YEREMIA 14 - Termanu bible

YEREMIA 14

¹MANETUALAIN nafa'da au nae leo ia la'eneu fai hanas matuaina,

²“Yehuda dale he'dis kota-kota-nala hihi maten. Hataholim-mala langape'uk nai dae-a ma lasasaledale. Yerusalem lakadi beau loke tutulu-fafalik

³Hataholi kamasu'ik-ka nadenu basa malalau-maoonon-nala sanga nai basa mamanak lala'en-na; de leu leo basa oedolu lala'en-na, tehu oen-nala basa so. Ketel-la louk fo lenik-kala ala leni falik-kana. Ala mae de ala potiketu mata-panan-nala nana dalen-nala ba'ihanak-ka ma ketu dudu'an-nala.

⁴U'dan-na ta mai fa de dae-a tuk metomelok; manamaue-la potiketu mata-panan-nala nana delen-na ba'ihana nanseli.

⁵Ta hapu na'u so'on, hu ndia de nusa ina-la la'o. Anan fo besak-ka ana bongik-ka ana la'o ela nai moo maloa.

⁶Keledei fuik-ka ka'da napadeik nai letek-ka poin, matan-na male nanahu na'u ta, ana loli-fali sama leo busa fuik-ka.

⁷Au anang-ngala lalo bebou lae, ‘MANETUALAIN, leomae ami sala-singom-mala tuni-ndeni ami tehu tulu-fali ami sama leo O hala-hehelum-ma. Ami la'o ela O do'e-do'e; Tete'ek-ka, ami masala-masingo neu O.

⁸Te'e-te'e O nde been-na Israel namahehenan-na, fo ana soi-tefan-na neme susa-soe mai. Tehu tao le'e de O sama leo hataholi nusa dea nai ami nusang dale, sama leo fui-a fo kada ana singo le'odaek esa, fo basa soona ana la'o.

⁹Tao le'e de O sama leo hataholi fo mapangamak-ka; sama leo palani tatibatu fo ta tulu-fali be'i fa do? Tehu, tao leo beeo O nai ami tala'da, MANETUALAIN! Ami anam-mala, de O boso la'o ela ami!’ ”

¹⁰La'eneu leoina ndia MANETUALAIN nafa'da nae, “Au ta amahoko neu hataholi-hataholi sila-la fo ala hii ka'da lalai heni aoinan-nala leme au-a mai. Neukose au ta asanggango heni sila salan-nala fa, ma neukose Au huku-doki sila, nanahu sila sala-singon-nala.”

¹¹MANETUALAIN nafa'da au nae, “Boso moke Au tulu-fali hataholi sila-la.

¹²Leomae ala oka aon-nala boeo, Au ta nau taoafik neu sila nalolou fo loke tutulu-fafalik fa; ma leomae ala fe Au tunu-hotu nanatunuk ma tunu-hotu gandum, boeo neukose Au ta amahoko neu hataholi sila-la fa. Nasafalin-na neukose Au tao amate-amopos nenik natee-natatik, la'a-ndoes ma he'di-laus.”

¹³Boema au afa'da ae, “Ou MANETUALAIN Fo Madema ina, O bubuluk te nabi-nabi-la lafa'da basa neu laun-nala lae, neukose ta hapu natee-natatik do la'a-ndoes, nanahu O helu basa mae, nai nusak ia hapu ka'da mole-dame.”

¹⁴Tehu MANETUALAIN nataa nae, “Nabi sila-la leni hala pepeko-lelelok pake Au na'deng-nga; Au ta adenu sila fa, ma manafe paleta taak do kokola O sila fa. Ninita-ninitak fo ala tui-bengak-ka ta neme Au mai fa; Ala neuk dede'a-dede'ak sosoa-ndandaan taak, fa ka'da ala tao aon-nala.

¹⁵Ala kokolak pake Au na'deng-nga lae, neukose natee-natatik-ka ma la'a-ndoes-sa ta tuni-ndeni nusak ia fa, te sekona Au ta adenus ala kokolak dede'ak ndia fa. Au MANETUALAIN, afa'da neu O, Yeremia, neukose hata fo Au tao-no'in neu nabi-nabi fo Au ta adenuk sila fa. Neukose Au tao isas nenik natee-natatik ma la'a-ndoes.

¹⁶Hataholi-hataholi fo ala sipi basa sila neuk-kala boeo neukose nanataonisak nenik enok matak esa. Neukose sila popolan-nala nana tu'u-tapak leo Yerusalem enon-nala lain neu, nana hapu mana matoi fa. Sila lo sao anan-nala ua-nalen-nala leondiak. Neukose Au tao-a sila lame'da lita sila tatao-nono'i mangalaun-nala sasaina.”

¹⁷MANETUALAIN nadenu au afa'da au dale he'ding-nga neu ndia anan-nala. Muse au afa'da ae leoia, “Memena fo au kii ta pake tata'da fa, lele'do le'dodaen lu'u oe-la titi-beboto Nana au leoinang bisu matua ma ala doidoso lanseli.

¹⁸Metema Au u leo mook-ka, au ita mana mateek-kala popolan-nala nanahu natee-natatik-ka. Au ita toto'a-tataak-ka nai kota dalek, hataholi-la hihi lae mates nana la'a-ndoes-sa. Nabi-la ma imam-mala lakalala'ok bela-ba'un-nala te ta lalelak hata fo ala taok-ka fa.”

¹⁹MANETUALAIN, ade O tipa-dede'a heni Yehuda makandondook, ma o ta hii makanae Sion laun-nala fa do? Tao le'e de O fepa-li'u mapane'e ami tao leondiak, de nalosa ami ta hai so'on? Ka'da palsuma la'iesak-kana ami sanga mole-dame-a, te ami mamahena lelea-hahaik-ka sosoa-ndandaan taa, nana hapu ka'da naset-nalakak-ka.

²⁰MANETUALAIN, ka'da ami masala-masingo basa neu O. Ami manaku aom ami sala-singom-mala ma ami bei-ba'ikaim-mala sala-singon-nala.

²¹Mafandele neu O hala hehelum-ma te O boso makadadaek ami; Ma O boso ka'i O hala-hehelum neu ami-a. O boso makadadaek Yerusalem fo O kandela manem-ma mamanan.

²²Leoinam-mala sosong-tatangon-nala ta hapu lakona u'dan leo daebafak-ka mai fa. Lalai-a boeo ta bisa po'a u'dan nenik koasan-na mesak-kana fa. Ka'da O nde ami mamahenak-ka. O nde tao basa sila-la ala da'di.