Read Termanu YEREMIA 16 Bible Online

YEREMIA 16 - Termanu bible

YEREMIA 16

¹MANETUALAIN nafa'da seluk neu au nae,

²“Boso sao fo hapu anak nai mamanak ia.

³Neukose Au afa'da neu o la'eneu hata fo neukose ana da'di neu ni'iana-la fo manabongik nai ia ma neu ina anan-nala boe.

⁴Neukose sila mates nana he'di-laus fo maneni mamates la'es ma neukose sila mates nai natee-natatik-ka dalek, do mates nanahu la'a-ndoes-sa. Neukose ta hapu hataholi esa boen kii namatanis do natotoi-natotonok fas. Neukose sila popolan-nala tongganggali samaleo pupuk-ka nai dae-a, ma manupui-la no bana makisu-makak-kala la'as.

⁵Yeremia, boso mu leo hataholi manasusak-ka uman neu. Boso falu soaneu se ndia boe, Neukose Au ta ba'e-pala au anang-ngala no tetu-temak so'n, ma neukose au ta atu'du Au susueng-nga do lalaing-nga neu sila fa.

⁶Hataholi kamasu'ik-ka ma hataholi nuu ta hata-taak mani nusak ia neukose mates te ta hapu manamatoi fa. Ta hapu hataholi esa boen neukose tao nahe'di aopan-na do nggeu heni langa doon-na da'di leo manafaluk soaneu sila fa.

⁷Ta hapu hataholi neukose tete'i loti ba'e fe hataholi manafaluk-kala. Nakalenak neukose ta hapu hataholi fo ana fen ninu neme nggala namahokok-ka nanahu inan do aman mamaten-na fa.

⁸Boso mu leo hataholi manatao fea uman neu. Boso mu'a-minu moos boe.

⁹ Mamanene bek fo au, Amak MANETUALAIN Fo Manakoasa, fo Israel Manetualain-na, sanga kokolak nu o. Neukose au tao ate'e feta kabing-nga hala namahokon-na ma seteleen-na ma lame'ma. Dede'ak ndia de neukose nananita matak neme hataholi-hataholi fo laso'da nai O tepo lelem ia.

¹⁰Metema o manduku-malosak basa iala neu sila so'on, fafa'kama neukose ala latane lae, tao le'e de au huku-doki sila ba'u-ba'u basa ndia. Neukose sila latane lae salan-na beek ma sila sala-singon-na beek neu au Amak fo sila MANETUALAIN-na.

¹¹Mafa'da meu sila mae Au afa'da leo ia, em bei ba'i mamaten-nala la'o ela Au, ‘De ala sene-do'ok ma lamahele neu lamatua daebafak fe'ek. Sila lasanggango heni Au, de ala ta nau tunga Au paletang-nga fa.

¹²Tehu emi tao-no'i mangalauk lena selukai. Emi malanga batu ma emi nau tunga ka'da emi hihii-nanaun mesam-ma fo mangalauk ndia. Emi ta nau mamahele Au fa.

¹³Hu ndia de, neukose Au usi heni emi neme nusak ia mai fo Au tu'u emi leo nusak esa fo nai doon-na seli ba'eneu emi ma ba'eneu emi manamaten-nala. Nai na, lele'do le'dodaem neukose emi hule-haladoi neu lamatua daebafak fe'ek, de neukose Au ta sue-lai emi fa.’ ”

¹⁴MANETUALAIN nafa'da nae, “Neukose fain-na losa soaneu hataholi ta soo-supa seluk nenik a Au, Manetualain fo maso'dak, fo maneni falik hataholi Israel-la kalua leme Masir mai,

¹⁵te hu nenik Au, Manetualain fo maso'dak, fo neni falik hataholi Israel-la kalua neme nusak esa nai dulu, ma neme basa nusak fe'ek-kala fo nai be e au tao tapasasala sila. Neukose au uni falik sila fali ma'is lo sila dae oen-nala mai, fo Au fe nusak leo sila bei ba'i-kain-nala.”

¹⁶MANETUALAIN nafa'da nae, “Au sanga alo manadolu-dala ba'uk-ka soaneu ala ho'u-la hataholi-hataholi ia la. Basa soona neukose Au aloo-a manasopu-danga ba'uk-ka soaneu ala sapu-la sila nai basa letek-kala ma pupukuk-kala ma nai basa lea-luak-kala nai batu piak-kala.

¹⁷Au ita basa hata fo sila taok-ka so. Ta hapu fo nananafunik ba'eneu Au fa; Sila sala-singon-nala boeo Au itan so.

¹⁸Neukose Au balas sila sala-singon-nala ma tatao-nono'i mangalaun-nala didikuk la'i dua, nanahu sila tao basa manggenggeo-mangganggamuk nai Au nusang dale nenik sosongok-tatangok ba'uk-ka. Sosongok-tatangok sila-la hahae taak-kala sama leo manamates-sa.”

¹⁹MANETUALAIN, O nde masulu-mahapa au-a, ma fe be'i-balakaik neu au; O tulu-fali au, nai lelek au nai dudu'a-aafi makale'ok-ka dalek. Leoina-leoina fo maneme pe'dak leo pe'dak neu-a neukose ala mai leo O-a fo lafa'da lae, “Emi bei ba'i-kain-nala lanuu lamatuak daebafak masapepekok fo sosoa-ndandaan tak makandondook nanseli.

²⁰Hapu hataholi daebafak tao aon ndia lamatua daebafan-na do? Tao leo beo ta! Manataok ndia tao leo beo ta Manetualain fa.”

²¹“Hu ndia de,” MANETUALAIN nae, “oek ia neukose Au tao basa leoina-la lame'da lita Au koasang-nga ma Au be'i-balakaing-nga fo ela soaneu losa dodoon-na neukose sila bubuluk lae Au ia MANETUALAIN.”