Read Termanu YEREMIA 18 Bible Online

YEREMIA 18 - Termanu bible

YEREMIA 18

¹MANETUALAIN nafa'da neu au nae,

²“Muu leo manatao ulek-ka uman, te neukose Au afa'da Au hala-hehelung-nga neu o nai na.”

³Boema au u leo manatao ulek-ka uman-na neu, te au itas ala bei taos nenik hata-heto fo tao nenik ulek-ka.

⁴Metema ulek fo ana bei taok ndia mana'an-na ta neulauk fa soona, ana tao nasafali seluk-kana da'di ulek fe'ek fo nanda no ndia dale hihiin-na.

⁵Boema MANETUALAIN nadenu au u afa'da neu hataholi Israel-la ae,

⁶“Hai Au anang-gala lemin, masa bole au ta hapu taon neu emi sama leo fo tuka ndia tao-no'i nenik ndia dae ulen-na fa do? Leondiak boe emi nai Au limang dale, sama leo dae ulek-ka nai manatao ulek-ka liman dale.

⁷Meten te nai faik esa nai ndia de Au ho'i nakeketuk soaneu fe'a henin, nanatao natuuk ma nanatao nakalulutuk soaneu leoina esa do dedeo esa,

⁸boema leoina ndia tuka tei-sale dale neme ndia sala-singon-nala mai soona neukose Au pe'da tataak Au dudu'ang ndia.

⁹Nasafalin-na, metema Au aketu soaneu apadedeik do tao atetea-ahehele leoina esa, do dedeo esa.

¹⁰Tehu neu makabuin-na leoina ndia ta nau namahele neu Au fa, boema Au tao-no'i hata fo mangalauk-ka soona neukose Au dudu'ang ndia Au pe'da tatakan-na.”

¹¹MANETUALAIN nafa'da neu au nae, “Besak ia mafa'da meu hataholi Yehuda-la ma Yerusalem laun-nala mae, Au sanga tao dudu'a-dodok soaneu la'ban sila, ma sadia huhukuk soaneu sila. Madenus fo ala hahae sila so'da-molen fo masala-masingok ndia, boema tao lahii sila ha'da-paliin ma tatao-nono'in-nala.

¹²Tehu neukose ala lataa lae, ‘Sosoak hata? Ami tunga ka'da ami hihi-nanaun mesam-ma! Neukose ami esa-esak tunga ka'da ami hihi-nanaun mangalaum-ma!’ ”

¹³MANETUALAIN nafa'da nae, “Matane neu leoina-la esa-esak, ade dede'ak leoiak-ka ana da'di hai so do beik. Hataholi Israel-la ala tao-no'i hai hata esa fo mangalau ina nanseli!

¹⁴Salju beita mopon la'iesa boen neme letek Libanon-na mai fa. Oe neuk fo manafaak maneme letek-kala mai-a beita ma'dan la'iesa boen.

¹⁵Tehu Au anang-ngala lasanggango heni Au so, de ala hotu boomenik soaneu sosongok-tatangok-ka. Ala lakatunu lai enok makahulun eli, fo sila muse tungak-ka, boema ala singo leo enok fo nanatao natetu bei taak-ka.

¹⁶Nusak ia ala taon da'dik mamanak fo mangalau ina nan seli, ma ana da'di dede'a muu-dauk losa do doon-na. Basa mana la'ok tunga ndia neukose lakakale langa nau lame'da mangalauk-ka.

¹⁷Leondiak boe neukose Au fe Au anang-ngala leo musu-a matan-na neu, sama leo ani timu-a fu afu-a. Metema mamate-momopok-ka mai soona, neukose Au asadea sila ma ta nau tulu-fali fas!”

¹⁸Hataholi-la lafa'da lae, “Mai fo ata tao naabua makahatuk soaneu la'ban Yeremia. Ta ka'da ndia mesak-kana kokolak no Manetualain fa. Te neukose hapu imam fo manamanoli-manamafa'da, hapu hataholi manatee-tenok fo ana hapu fe nanoli-nafa'da; ma hapu nabi fo ana bisa nanduku-nalosak hehelu-hoholok neme Manetualain neu ita. Mai fo ita kalak-kana lo manamaketu-mala'di-la neu, fo ela ita ta tamanene dede'a-kokolan seluk fa.”

¹⁹Boema au hule-haladoi ae, “MANETUALAIN, mamanene au hule-haladoing-nga; tao afik neu hata fo au musung-nga nafa'dak-ka neu au!

²⁰Natetu-nanda malole-a nanabalak nenik mangalauk-ka? Tehu sila kali bolok, fo ela au tu'da leo dalek neu. Mafandele dei, te au asala'e sila nai O matam, fo ela O boso mamanasa neu sila.

²¹Tehu besak ia, MANETUALAIN, nemen-na fo sila anan-nala mates no la'as-sa, do mates nai natee-natatik-ka dalek. Nemen-na fo sila inan-nala mopo saotoun-nala ma anan-nala; nemen-na fo to-mane-la mates nanahu he'di-laus neninin-na ma hataholi muli soluk-kala mates nai natee-natatik-ka dalek.

²²Madenu manabonga uma-la mai no kaiboik lo sila uman-na, de nalosa ala laka'di-lakau no bibik-ka. Ala kali bolok fo ela au tu'da leo dalek neu, ma ala lona hihi'ik soaneu ho'u-la au.

²³Tehu O. MANETUALAIN, O bubuluk la'i esak sila dudu'a-dodok fo soaneu labasa au samaneng-nga. Hu ndia de boso fe do'o-do ampon neu sila. Boso lose heni sila salan-nala. Fepa-li'us losa ala tu'u. Laka-makaseti neu sila nai O nasa-melum-ma dalek”.