Read Termanu YEREMIA 2 Bible Online

YEREMIA 2 - Termanu bible

YEREMIA 2

¹MANETUALAIN nadenu au

²po'a-benga halak ia neu basa hataholi manai Yerusalem-mala nae, “Hai Israel, Au afandele, o lilineka manseli, nai lelek o bei muli-solum-ma; o susue-lalaim ba'un-na seli nai lelek ita da'di manaka'bing beuk-ka. Au u leo moo solokaek-ka u, boeo o tunga o la'ok tunga dae fo, nanasele-nggali taak-ka.

³Israel, Au nuu heheling o, Au ana bonging, fo Au sue-laik-ka. Au fe soe-a, ana tuni-ndeni-nala, basa hataholi fo, manataon-na o doi-doso, Au, fo MANETUALAIN nde manakokolak-ka.”

⁴Mamanene MANETUALAIN hala hehelun-na, hai emi fo, Yakob tititi-nonosin, ma leo-leo Israel-la lemin!

⁵MANETUALAIN nafa'da nae, “O bei-ba'i kaim-mala, hapu sala beek nai Au-a, nalosa ala ke'di-ndiu Au? Ala usi ka'da sosongo-tatangok eli taak-ka de mate'en-na, lakadadaek seluk aoinan-nala.

⁶Au ta afaduli fa; Au fo, manahela-noles nai enok so, ma Au os kalua leme Masir mai la'ola'di moo solokaek-ka, dae tokotiik fo dopelele'un makadotok, boema tuuk, bai te henuk no soe-a — mook fo, nanaleo taak ma ta la'ok tunga fan!

⁷Au os leo, nusa maoe-maisik-ka neu fo la'a buna-boak, ma basa hata malole lala'en manai naa-la. Tehu ala losa ndia boema, ala tao langgenggeo Au daeng-nga, ma ala tao Au hata-hetong da'di hata esa fo nanamaluak.

⁸Ta hapu imam esa boen, fo natane nae, Au, fo ndia MANETUALAIN-na nai bee fa. Basa manaketu-mala'dik-kala boeo, ta bubuluk see Au fa basa manakoasa-la, lena-la'ban Au paletang-nga. Basa nabi-la, kokolak pake Baal na'den-na, ma ala sene-do'ok neu sosongo-tatangok fo, sosoa-ndandaa taak-ka.”

⁹Manetualain nafa'da nae, “Besak ia, Au adede'a seluk o Au anan-ngala, ma Au aketu-ala'di tititi-nonosin-nala

¹⁰La'ok ndolo-ndolo leo Siprus solokae su'un manai boboan muli, haitua hataholi leo dulu neu, fo leo nusa Kedar-ra neu, palisak matalolole nai naa, ade dede'ak matak esa, ana da'di hai nai naa so do beik?

¹¹Beita hapu leoina esa, ana tuka heni lamatuan-na, leomae lamatuak ndia, Manetualain ta nde ndia fa. Tehu, Au anang-ngala tuka heni Au, fo sila mandela-masa'an-na, nenik hata esa fo, sosoa-ndandaan ta.

¹²Hu ndia de, hai lalai, makabale leona! Nggenge ma dele leona!

¹³Au anang-ngala tao sala-singok matak dua: ala la'o ela Au, fo oemata maso'dak-ka, de ala kali aon sila lifun-na, fo nde lifu fo, sama leo ule ba'ek-ka, fo oe ta nate'e nai dalek fa.”

¹⁴“Ade Israel ndia ata, do ata anan do. Tehu tao le'e de, ana da'di musu non-na paa nana'an?

¹⁵Musu non-na, nangao soaneun sama leo singa, daen-na nanataok da'di dae tokotiik, ma louk, ha'i-a na'a heni kotan-nala, laun-na ta leon so'on.

¹⁶Hai Israel, hataholi Memfis ma Tahpanhes-sala, nggute heni o langa doom-ma.

¹⁷O nde tataom basa manda'dik manala'e o aoinam-ma, nanahu nai lelek Au hela-nole o nai leleo-lala'ok-ka dalek, o masadea Au, fo Amam MANETUALAIM-ma.

¹⁸Nanalak hata, o muu leo Masir muu? Fo sanga minu Lee Nil-la oen-na? Nanalak hata, o muu leo Asyur muu? Fo sanga minu Lee Efrat-ta oen-na?

¹⁹O tatao-nono'i mangalau-ma, nde huku o aoinam-ma, O nanatao doidosok, nanahu o tipa Au, fo o MANETUALAIM-ma. Besak ia, mame'da mita makahe'duk-ka, ma he'din-na ba'un-na seli metema Au asadea o, ma Au ta fe ha'da-holomata neu o fa. Au, fo MANETUALAIN nde manakokolak-ka; Au nde MANETUALAIN, Fo Mademaina ma Manakoasa matuaina.”

²⁰MANETUALAIN nafa'da nae, “Dook-ka so, o ta nau da'di ata neu Au fa; o ta nau tunga, do sene-do'ok neu au fa. Nai pupuku mademaina-la esa-esak lain, ma nai aihuuina-la esa-esak huun-na, o sene-do'ok neu lamatua daebafak, fo manafe dae-a nalole.

²¹Au sele-tani o, sama leo ai angol fo Au helen neme bini-ngges malole-a mai. Tehu besak ia, o da'di masafali da'di na'u-aiana dila-nggauk fo sosoa-ndandaan ta.

²²Leomae o madiu oe, fo o pake sabu makadotok nanseli, tehu Au bei ita, o salam-ma tataan-nala boe.

²³O mapalani manseli, mafa'da mae o malole, ma o mae o beita tunga hai Baal fa! Mete su'dik o tatao-nono'im neme bafak-ka, mafandele o tatao-nono'i mangalaum-ma, fo manakun leona! O sama leo ontaina mala'bik fo, nalai neu-mai, de ta hapu napanggee-na fan,

²⁴boema ana masok leo moo solokaek fo nee-nee lino-linok-ka dalek neu. Metema sanga nala'bi soona, ta hapu napanggee-na fan. Fo manamahiik-kana, ta paluu sanga sota-mate no fan, nana nai fai nala'bik-ka, ana mai tataas esa.

²⁵Israel, o boso muu usi lamatua daebafak-kala, ma boso eki fo maloos, mahani te, neukose o eim-ma nakahina, ma o nggati anam-ma namatuu, nanahu maa ma'dak-ka. O mafa'da mae, ‘Ta, neukose au ta bisa fali fa, nana au sue lamatua daebafak-kala, ma au nau u tungas.’ ”

²⁶MANETUALAIN nafa'da nae, “Sama leo nakodaa name'da mamaek, nai lelek ho'u-lan, leondiak boe, emi basa-basam-mala neukose mame'da mamaek, hai hataholi Israel-la, emi manem-mala, emi manaho'u paletam-mala, emi imam-mala ma emi nabim-mala lemin!

²⁷Neukose emi nananakamamaek, nana emi maloo ai bibiak esa soona, emi mae ama, ma emi maloo batu esa soona, emi mae ina. Emi ta mai leo Au mai fa, te emi la'oela Au. Tehu, metema toto'a-tataak-ka ana mai soona, Au nde emi malook-ka, fo mai soi-tefa emi.

²⁸Emi taom-ma, emi sosongo-tatangom-mala lai bee? Metema hapu toto'a-tataak soona, madenus fo ala soi-tefa-la emi, metema ala bisa soi-tefa! Hai Yehuda, o lamatua daebafam-mala de'u o kotam-mala!

²⁹Ade beek-kande taon-na emi, ta mahiik Au fa, nalosa emi la'ban Au?

³⁰Palsuma la'iesak-kana, Au huku emi, nana emi ta nau sipo nanoli-nafa'dak fa. Emi sama leo singa kamulus-sa, de emi taomisa basa emi nabim-mala.

³¹Hai hataholi Israel-la lemin, mamanene Au hala-kokolang ia-la. Ade Au da'di hai moo solokaek ba'eneu emi, do sama leo dae fo makahatu kiu-kiuina so do beik? Tehu tao le'e de, emi mafa'da, mae emi nau maso'da no aoloak, ma ta nau fali seluk leo Au mai fa?

³²Ade hapu anafe'oanak-ka nafandele heni lilo-henun, do manaka'bing inak-ka nafandele heni ba'du ka'bin-na do? Tehu emi mafandele heni Au, doon-na seli so — neme lelek fo, ta hapu leke-nala fan.

³³Emi te'e-te'e sanga malelak eno keke'dik soaneu sanga susue tou-ta'ek, ma ina anafe'ok-ka! Ina manasosoa-piaok fo mate basa mamaen-na boeo, ana bei hapu nanoli neme emi mai!

³⁴Ami papake-ngganggaom nanggenggeo, hu kande hataholi nuu taa-hata taak-ka, ma hataholi sala taak-ka, daan-na, ta hu kande nakodaa nanaho'un-nak-ka daan-na fa. Leomae leondiak boe,

³⁵emi mafa'da mae emi salam ta, ma emi mae Au ta amanasa seluk emi so'on. Tehu Au fo MANETUALAIN, neukose huku emi, nanahu emi ta nau manaku, mae emi masala fa.

³⁶No lai-laik nanseli, emi meu leo leoina fe'ek-kala lamatua daebafan-nala meu, fo moke tutulu-fafalik! Neukose tao leo bee-o, Masir taon-na emi dalem-ma ba'ihana, sama leo Asyur tao ba'ihana emi dalem-ma.

³⁷Neukose no dale manaba'ihanak ma mamaek, emi la'oela Masir. Au fo MANETUALAIN ta sipok sila, fo emi masalai emi deam-ma neus fa; neukose emi ta hapu nanalak hata-hata esa boen, neme sila mai.”