Read Termanu YEREMIA 20 Bible Online

YEREMIA 20 - Termanu bible

YEREMIA 20

¹Imam Pasyhur fo Im anan nde been-na malanga manamanea MANETUALAIN uman. Nai lelek ana namanene au po'a-benga basa dede'ak sila-la boema,

²ana paleta fo ela au nanafepa-li'uk ma nana langek nai Lelesu Ina Benyamin, lelesu manatia-lain-na nai MANETUALAIN Uman.

³Fafainak manamaik-ka Pasyhur po'i basa au neme langek-ka mai boema, au afa'da ne'un ae, “Na'dek fo neukose MANETUALAIN fen neu o-a ta Pasyhur fa, tehu ‘Teror su'di nai bee-a.’

⁴MANETUALAIN nafa'da aon nae, ‘Neukose Au akadada'dik o teror ba'eneu o ao inam mesak-kana, ma ba'eneu o nono anam-mala. Neukose o mita sila nanataoisak neme sila musun-nala mai. Basa hataholi Yehuda-la neukose Au po'ilotak-kasa nanakoasak neme manek Babel-la; nggelok neme sila mai-a nana fo nenik da'di leo nananakataak-ka nahelek leo Babel neu, ma elak-kala neukose nanataonisak.

⁵Sila musun-nala boeo neukose Au po'ilotak-kasa ala kalo ma ala ho'i leni kota ia su'i-beten-nala, boema sila hata-heton-nala, nakalenak Yehuda manen-nala hata pusakan-nala leo Babel neu.

⁶Ma o, Pasyhur, mo basa o umam isim-mala boeo neukose nanaho'u nak fo nanafua nenik leo Babel neu. Nai na neukose mate o de latoi o; leondiak boe, basa nono anam-mala fo lamanene basa o manakoao ao-ndaeaon-na boe.’ ”

⁷MANETUALAIN, O fufu'di-oodok au de au nanafufu'di-oodok. O be'im-ma ba'u lena heni au, ma au akatele. Basa hataholi hakinonoli au, au nananakamu-nakadau neme fafain-na losa nosa.

⁸Au kokolak do'e-do'e ae, au muse eeki-apane'e losa basa au be'i-balakaing-nga, “Nasananseli! Susa-soe!” MANETUALAIN, au nanahakininisik ma nananakamu-nakadau su'di faik, nanahu anduku-alosak o hala-hehelun-na.

⁹Tehu au afa'da nai au daleng dale ae, “Nemena fo ka'da au asanggango heni MANETUALAIN, au ta nau kokolak unik ndia na'den-na fa,” boema O hala-hehelum-ma nono'kabai ha'i-a pila lo'a-lo'a nai au dale bobongon anang-nga. Au akatatakak so'bak-kana, te sekona au ta akatatakak ala fa.

¹⁰Au amanene hataholi-la lamakukutuk nai basa mamanak-kala, “De bibii-namata'uk-ka boetai namatuak-ka! Mai fo tafa'da lo manakoasa!” Nakalenak basa u tia-laing-ngala lala'en-na lahani au tutu'dang-nga. Ala lafa'da lae, “Fafa'kama nenik fufu'di-oodok, ndia ita hapu tao takalan, fo ela ita hapu balas nanape'da-dalek neun.”

¹¹Tehu O, ou MANETUALAIN, O mook au; O be'im-ma nanseli ma nakalenak balakai ina. Sila fo manausil-la ma manatuni-ndeni au, neukose ala tu'u leu de be'i-balakai taak-kala. Neukose ala mae losa dodoon-na, sila dudu'a-dodoo manada'di taak-kala beno'u. Sila nakamumulu-nakamamaen ndia neukose nananafandele nahelek tatas esa.

¹²Tehu, ou MANETUALAIN Fo Manakoasa, O fola hataholi daebafak-ka no ndoos matetuk; O bubuluk sila dalen-na ma dudu'a-aafin-nala. Hu ndia de sa'di leo been-na au ita o balas musu fo tatao-nono'i mangalaun-na nana au fe basa au dede'ang-nga lo O neu so.

¹³Makame ba'eneu MANETUALAIN ma koa-kion nana soi-po'i hataholi manatuni-ndenik-ka neme hataholi manake'di-ndiuk-ka koasan-na mai.

¹⁴ Au fai bobonging-nga nana supa-sook! Nemena fo au inang bongi au-a, atasi'da-atasai.

¹⁵Nama supa-sook nei mananeni bebengak-ka boe fo manataon-na au amang namahoko nansel, fo nai lelek nafa'da neu lae, “O hapu ni'ianak touanak esa!”

¹⁶Nemena fo mananeni halak ndia nalupa kota-kota fo MANETUALAIN tao nakalulutuk-kana ta no dale kasian fa. Nemena fo namanene honggu'u he'di-laus nai faik fafain-na, ma nanggasiaok natee-natatik-ka nai le'do hana.

¹⁷Nana ana ta tao nisa au fa nai lelek au bei nai iluk-ka dalek, fo ela au inang nailu nahele au ma ein-na da'di leo lates ba'eneu au.

¹⁸Tao le'e de au muse nanabongik? Ka'da soaneu toto'ak-tataak-ka do? Ma fo ela au so'dang-nga mopo nakandondok-kana nai mamaek-ka dalek do?