Read Termanu YEREMIA 24 Bible Online

YEREMIA 24 - Termanu bible

YEREMIA 24

¹ MANETUALAIN fe au ninitak esa nae, faik esa boema Yoyakhin fo Yoyakim ana manen-na fo manek Yehuda no basa malanga manapaleta Yehuda-la, basa malelak-kala, ma basa manadoki-dulak malelak nanafua nenik neme Nebukadnezar fo manek Babel-la, fo ninis dai leo nanahukuk neme Yerusalem leo Babel neu. Au ita sapai dua henuk no ai boa kaak-a nai dalek beten-na nai MANETUALAIN Uman so'dan-na.

²Sapai makasososak-ka ai boa kaak neulauk mesn nai dalek, sama leo ai boa kaak keketu makasososak-ka, tehu sapai kadua ai boa kaak fo kabok mesa-mesan nai dalek, de nalosa ta hapu na'a fan.

³Boema MANETUALAIN nafa'da neu au nae, “Yeremia, o mita beek ndia?” Boema au ata ae ai kaa boak “MANETUALAIN. Fo neulauk-kala soona neulauk nan seli, ma kabok-kala soona, kabok nan seli de nalosa ta hapu na'a faan.”

⁴Boema MANETUALAIN nafa'da seluk nae,

⁵“Hataholi fo Au po'ilotak-kasa nanafua nenik lo Babel neu ndia, Au akasasamak-kana sama leo ai kaak boak fo neulau hik iala; hu ndia de Au, MANETUALAIN fo Israel Manetualain-na, neukose tao sila no malolen-na.

⁶Neukose Au aneas ma Au o falik-kasa ma'is lo nusak ia mai. Neukose Au afofo'a sila, te Au ta tao atu'u sila fa, neukose Au sele-tani sila, te Au ta fe'a heni sila fa.

⁷Neukose Au fes dudu'a maneu soaneu lalelak lae, Au ia MANETUALAIN. Soona neukose sila da'di Au anang-ngala, ma Au da'di sila Manetualain-na, nanahu ala fali lo Au-a mai no dale katematuak.

⁸Tehu Zedekia fo manek Yehuda, no basa malangan-nala fo manadekak non nana, ma hataholi Yerusalem fo bei elak-kala fo manaleo mahelek nai nusak ia, ado nanalali lo Masir neu-a, sila basa-basas neukose Au tao as sama leo ai boa kaak fo kabok iala fo ta hapu na'a fan. Au, MANETUALAIN, nde manakokolak-kala.

⁹Neukose Au tao akatoto'a-akatatak-kasa tao taoleondiak, de nalosa basa leoina manai daebafak-ka ia lala'en-na da'di manabi-mamata'uk. Au fes lai mamanak bee ndia boeo, neukose sila nanahakinonolik, nanataok da'di hata nanahika-humek ma nananakamu-nakadauk. Sila na'den-na neukose nanapakek da'di soo-supak.

¹⁰Neukose Au uni fe sila natee-natatik, la'a-ndoes, ma he'di laus matuaina, de nalosa sila basas mate, de ta hapu ela esa boen nai nusak ia, fo Au fen neu sila ma sila bei-ba'i kai manamaten-nala.”