Read Termanu YEREMIA 26 Bible Online

YEREMIA 26 - Termanu bible

YEREMIA 26

¹ Yosia ana manen Yoyakim da'di Yehuda manen-na tutik-ka.

²MANETUALAIN nafa'da neu au nae, “Mu mapadeik neu Au umang-nga so'dan-na, fo kokolak mo Yehuda laun fo manamai hule-haladoi manai ndia. Manduku-malosak neu sila basa hata fo Au paletak-ka neu o-a, soaneu mafa'dan neu sila. Boso mafa'da kulang esa boen.

³Fafa'kama leoina ndia nau namanene boema ala hahae tao mangalauk soona, Au pe'da tatak Au dudu'ang-nga soaneu akatoto'a-akatatak sila nanda no sila tatao-nono'in fo mangalauk-ka.”

⁴MANETUALAIN nadenu au afa'ada ea leo ia neu sila, “Au, MANETUALAIN, paleta basa so, po ela emi mamahele neu Au, ma makalala'ok hoholo-lalanek fo Au fe basan neu sila.

⁵Emi boeo muse mamanene hata fo nananafa'dak neme Au atang-ngala, basa nabi-la fo Au adenu tatas esa os neu emi. Tehu emi ta nau mamanene fas.

⁶ Metema emi malanga batu mahele soona, uma mamasok ia neukose Au taon sama leo Silo, de nalosa basa leoina manai daebafak-ka pake kota Yerusalem ia na'den-na da'di leo soo-supak.”

⁷Basa hata fo Au afa'dak manai MANETUALAIN uman ndia, basa imam-mala, basa nabi-la ma laun-nala lamanenen.

⁸Au po'a-benga basa MANETUALAIN hala haituan fo ana paletak ndia tutik-ka, ala ho'u-la au ma ala eeki lae, “O muse mate!

⁹O mapalani manseli mafa'da nenik MANETUALAIN na'den-na mae, neukose umania da'di sama leo Silo, ma mafa'da mae neukose kota ia nanatao nakalulutuk, ma ana da'di mamanak fo ta leo-napalasan.” Tutika hataholi ba'u lakamomotu-la au.

¹⁰Lelek malanga manapaleta Yehuda-la lamanene hata fo manada'dik ndia, boema sila kalua lai-lai neme uma manek-kamai, boema leu lo MANETUALAIN Uman-na neu, de langatuk neu Lelesuina Beuk-ka.

¹¹Basa imam-mala, ma nabi-la lafa'da neu malangan sila-la, ma neu laun-nala nae, “Hataholi ia nad nanahuku nisak nanahu ana kalua hala-kokolak fo la'ban ita kotan ia. Emi mamanene matam so.”

¹²Boema au afa'da ae, “MANETUALAIN nde nafa'da au anduku-alosak hala haituak fo la'ban MANETUALAIN Uman-na, ma kota ia sama leo hata fo emi mamanenek-ka.

¹³Hu ndia de tao mahii emi so'dam-ma heheo-hihilu ma emi tatao-nono'im; nanda no tunga emi Amam MANETUALAIM-ma, fo ela Ana pe'da tatak dudu'an-na soaneu tao namopo-namate emi.

¹⁴La'eneu au so'dang-nga soona, memak nai emi limang dale, de tao taon taoleobek boeo tunga emi hihi-nanaum.

¹⁵Tehu mafandendelek te, metema emi tao misa au soona,, emi ma kota ia laun-nala neukose lu'a-lepa sala singok neme hataholi sala taak ndia nakanisan-na mai. Nana, MANETUALAIN nde nadenu au soaneu fe nasanene'dak ndia neu emi.”

¹⁶Boema basa malanga manapaletak-kala ma laun-nala lafa'da neu imam-mala ma nabi sila-la lae, “Hataholi ia kokolak pake ita Aman MANETUALAIN na'den-na; de ta nanda huku nisa fan.”

¹⁷Basa ndia boema, mauli-malanga leoina de'ubee ala lo uluk leu de lafa'da hataholi-hataholi manamangak manai ndia,

¹⁸ “Lae nai lelek Hizkia da'di manek nai Yehuda, boema Nabi Mikha neme Moresyet nanduku-nalosak kokolak-ka nde ia, neme MANETUALAIN Fo Manakoasa nae, ‘Sion nana foi-falak sama leo tina, Yerusalem neukose ana da'di batu ai madodouk, ma pupukuk MANETUALAIN Uman-na neukose ana da'di nula.’

¹⁹Tehu manek Hizkia ma hataholi Yehuda-la ta tao lisa Mikha fa. Nakalenak seluk bai, Hizkia bi neu MANETUALAIN ma noke Manetualain sue lain. Tutika MANETUALAIN helafalik nasa melun fo manatao namate-namopos-sala. Ma besak ia isabaina ita ia teni susa soe matuaina neu ita aoinan.”

²⁰Tehu hapu hai hataholi fe'ek esa ana kokolak la'ban kota-a ma leoina ia pake MANETUALAIN na'den-na, sama leo au afa'dak-ka boe. Hataholi ndia na'de Uria fo Semaya anan, fo neme Kiryat-Yearim.

²¹Lelek manek Yoyakim no malanga soloda'dun-nala ma basa manaho'u paleta-la lamanene Uria hala-kokolan boema manek-ka ito ato fo ana tao nisan. Tehu Uria namanene dede'ak ndia boema ana da'di manabiik de nalai leo Masir neu.

²²Tehu Mane Yoyakim-ma nadenu Elnatan fo Akhbor anan-na no hataholi fe'ek de'ubee leu Masir leu fo ala lalafalik Uria.

²³Boema ala lo falik-kana leo Mane Yoyakim-ma neu. Basa boema manek nadenus fo ala tao lisan, de popolan-na ala tapa henin nai mamana loo-latek-ka.

²⁴Tehu besak ia, Ahikam fo Safan anan-na baba'e-papala tutulu-fafalin de, au, Yeremia, ta nanafek lo laun-nala leu fo soaneu tao lisa au fa.