Read Termanu YEREMIA 27 Bible Online

YEREMIA 27 - Termanu bible

YEREMIA 27

¹ Beita dook boen te Zedekia fo Yosia ana manen-na da'di manek nai Yehuda, boema MANETUALAIN nadenu au

²tao tali neme ai louk-ka mai ma lange neme ai-a mai, fo taon neu au lesuhaing-nga.

³Ndia boe nadenu au anduku-alosak hala-haituan-na neu manek-manek Edom-ma, Moab-a, Amon-na, Tirus-sa ma Sidon-na nenik sila hataholi nadedenun fo manamaiklo Yerusalem leu-a soaneu donge-dama Manek Zedekia.

⁴Au muse afa'da neu sila ae, MANETUALAIN Fo Manakoasa, fo Israel Manetualain-na nafa'da nae,

⁵“Au akadada'dik daebafak-ka, ma hataholi daebafak-ka no basa bana-manu lala'en-na nenik Au koasang-nga fo matuaina, ma nenik Au be'i balakaing, fo Au apu fen neu see ndia boe fo Au ahiik-kana.

⁶Au nde fe basa leoina ia lala'en-na lo Au atang Nebukadnezar, fo manek Babel-la koasan dale neu. Nakalenak bana-manu boeo Au fen leo ndia neu, soaneu ana koasas.

⁷Basa leoina-la ala sene-do'ok neun, ma neu ana manen-na, ma neu upun-na losa fain nusan-na tu'da-monu aom. Nai lelek ndia te leoina Babel-la neukose sene-do'ok neu leoina-leoina fo mabe'i-balakaik ma manek matuainan-nala.

⁸Leoina do dedeo-la fo ala ta nau lakaluku-lakatele neu Nebukadnezar fa soona, neukose Au hukus nenik natee-natatik, la'a-ndoes, ma he'di-laus matuaina, losa makabuin-na leoina ndia nakaluluku-nakatele neun.

⁹Boso mamanene neu nabi-la do see ndia boe fo ana kena-ka'i emi fo boso makaluu-makatele neu manek Babel-la, leomae lafa'da lae, ala sipo ntutu'duk neme me'i-afek, do duladalek mangana'uk, do ala pake be'i-balakaik matabeuk.

¹⁰Ala ke'di emi ndia fo tao kande lo ladok emi neme emi nusa-namom mai. Neukose Au usi adook emi neme emi nusa-namom mai de neukose emi tu'da-monu.

¹¹Tehu leoina fo ala nau lakaluku-lakatele ma ala nau sene-do'ok neu manek Babel-lasoona, neukose Au po'ilotak-kasa ala leo lapasala nai sila nusa-namon-na ma ala foi-fala nai ndia. Au, MANETUALAIN nde manakokolak-ka.”

¹²Soaneu Zedekia fo manek Babel-la soona, au, Yeremia, anduku-alosak dede'ak matak esa. Au afa'da ae, “Bii neu menek Babel-la. Mahele neun, ma neu ndia leoinan-na fo ela Ama maek naso'da.

¹³MANETUALAIN nafa'da nae, leoina fo ala ta nau lakaluku-lakatele neu manek Babel-la fa soona neukose mates nanahu natee-natatik-ka, la'a-ndoes-sa ma he'di-laus matuaina. Tao le'e de ama manek no laun-nala nau mate tao leondiak?

¹⁴Boso mamanene neu nabi-nabi fo ala kena-ka'i Ama manek fo bosos makaluku-makatele neu manek Babel-la, te ala ke'di-ndiu Ama manek ndia.

¹⁵Ala lafa'da lae sila kokolak paka MANETUALAIN naden-na, te lasandandali ndia. MANETUALAIN nafad aon nae, Ana ta fe sila mai fa. Hu ndia de neukose Ana tao tapasasala ma ana tao nakatoto'a-nakatataak Ama manek no basa nabi-la fo manamasapepeko-masandandalik neu Ama manek-ka.”

¹⁶Makabuin-na boema au afa'da neu imam-mala, ma neu basa laun-nala ae, MANETUALAIN nafa'da nae leo ia, “Boso mamanene nabi-nabi fo lafa'da lae, ta dook so'on te, hata-heto manai MANETUALAIN Uman-na neukose leni falik-kasa neme Babel mai. Sila lasepepeko ndia.

¹⁷De bosos mamanene neu sila! Bii neu manek Babel-la, fo ela emi maso'da. Sosoak hata kota ia muse nakalulutuk?

¹⁸Metema memak tete'ek-ka sila nabi, de ala sipo hala-haituak neme Au mai soona, tao leo beo be ia ala loke neu Au, MANETUALAIN Fo Manakoasa, fo ela hata-heto bei manai Au Uma manek-ka manai Yerusalem ta nanaso'u nenik lo Babel-la neu fa.

¹⁹Nana Au, MANETUALAIN Fo Manakoasa, fo Israel Manetualain-na, aketu basa ae, basa hata sila-la neukose naso'uk lo Babel neu, ma neukose lahele leme na, losa Au tao afik neu seluk-kasa. Nai lelek ndia soona besak-ka Au uni falik-kasa lo mamanak ia mai. Au, MANETUALAIN, nde manakokolak-ka.” Hata-heto bei hapu nai MANETUALAIN Uman ndia de: dii-la, ule alumunium, kaleta-la, ma hata-heto fe'ek de'ubee fo MANETUALAIN Uman-na nun. Hata-heto fo nana nenik taak o Babel neu ndia, ndek lelek Yoyakhin fo Yoyakim ana manen-na fo manek Yehuda no basa Yehuda ma Yerusalem lasi nggolon-nala nanafook neme manek Nebukadnezar-ra lo Babel neu-a.