Read Termanu YEREMIA 3 Bible Online

YEREMIA 3 - Termanu bible

YEREMIA 3

¹MANETUALAIN nafa'da nae, “Metema touk esa elaheni saoinan-na, boema tou fe'ek saon-na inak ndia, soona touk fo inak ndia sao elan-na, ta bole ho'i falik-kana, da'di leo saoinan fa, nana dede'ak ndia, neukose tao nalutu nusak ia. O fo Israel, o manuu susue tou-ta'ek ma ina anafe'ok makadotok nanseli so, hapu nai bee, besak ia, o nau fali ma'im-ma leo Au mai!

²So'ba mete leo lain fo leo pupuk-kala lain muu! Mamanak beek-kande, o beita muu sosoa-piao meme ndia fa? Sama leo hataholi Arab-pala lai moo solokaek-ka, leondiak boe, o mangatuuk nai enok-ka su'un-na fo o mahani hataholi fo, ana hii nakaminak susue tou-ta'ek ma ina-anafe'ok. O tao manggenggeo nusak ia, nenik o sosoa-piaom, ma o tatao-nono'i mangalaum-ma

³Hu ndia de, oe ta mai neme lalai mai, ma nai fai sele-nggalik-ka, u'dan-na ta mai fa. O hihii mae, sama leo ina mana sosoa-piaok-ka, ma bibii-mamae tak.

⁴Nai lelek o nai toto'a-tataak-ka dalek, o maloo au mae o amam nde Au, ma o mae Au sue-lai o, mulai neme o bei anam-ma mai.

⁵O boeo mafa'da mae neukose, Au ta amanasa o, nakandondoo henin fa. Hai Israel, o mafa'da mae leo ndia, tehu o bei tao tatao-nono'i mangalauk lala'en fo, o hapu tao-no'in.”

⁶ Nai tepo lelek Mane Yosia paleta, MANETUALAIN nafa'da au nae leo ia, “O mita basa hata fo Israel, inak fo ta manalilinekak ndia, tao-no'ik-ka so do beik? An la'oela Au, de ana sosoa-piao nai pupuku mademaina-la esa-esak lain, ma nai ai huu matuaina-la, esa-esak huun-na.

⁷Au aedaenga, lelek ana tao basa sila-la soona, neukose ana fali ma'in leo Au mai, te hu ana ta fali ma'i fan, te se'kona neu sosoa-piao. Hu ndia de, Au asi'da on, de Au usi henin. Yehuda, fo Israel tolanon, fo manalilineka taak ndia, nita basa sila-la, tehu ana ta bii-namata'u fa. Lena-lenak, ana da'di manasosoa-piaok,

⁹ma ana ta name'da bibii-mamaek makandondook fa. Ana hohonge, nanahu ana sene-do'ok neu ai ma batu, nalosa nusak ia ana da'di naggenggeo.

¹⁰Yehuda fo ta mana lilinekak ndia, ana tao basa sila-la boema, ana fali ma'in leo Au mai, tehu ta no dale katema tuan-na, nanahu dalen-na ta ndoos fa. Au, fo Manetualain nde manakokolak-ka.”

¹¹Basa boema, MANETUALAIN nafa'da au, nae leomae Israel nasadea Au so, tehu se'kona, Israel malole lena neme Yehuda fo ta manalilinekak ndia mai fa.

¹²MANETUALAIN nadenu au u, fo afa'da dede'ak ia neu Israel nae: “Hei Israel, fo ta mana lilinekak-konei, fali ma'im-ma, leo Au mai leona! Au daleng-nga henuk no susue-lalaik, de neukose Au ta amanasa o losa dodoon-na fa.

¹³Ka'da manaku leon, mae o masala, ma o ta tunga Au, fo o MANETUALAIM-ma, paletan-na fa Manaku leon, mae o fe o susue tou-ta'ek ma ina anafe'om-ma, neu leoina fe'ek-kala lamatua daebafan-nala, nai ai ina-la huun-na so, ma o ta tunga Au paletang-ngala fa Au, fo MANETUALAIN nde manakokolak-ka.”

¹⁴MANETUALAIN nafa'da nae, “Hei Au anang fo, ta mana lilinekak-konei, fali ma'im-ma, leo Au mai leona! Emi nde been-na Au nuung. Neukose, neme kota esa mai soona, Au ho'i-a, emi hataholim esa, neme teidalek esa mai soona, Au ho'i-a hataholi dua, ma Au o falik emi leo Pupuku Sion-na meu.

¹⁵Neukose, Au fe emi, mauli-malangan fo manatunga Au paletang-nga. Neukose ala hela-nole emi, no dudu'a-aafi manatee-tenok, ma henuk no dudu'a manadaik.

¹⁶Boema, metema emi mamade'u nai nusak ia soona, neukose hataholi ta kokolak seluk, la'eneu Au Peti Hehelu-balataang so'on. Neukose, ala ta dudu'a-dodoo, do lafandelen so'on, te nakalenak ala ta paluun, do ala tao Peti Hehelu-balataa fe'ek fa.

¹⁷Nai lelek ndia, neukose loke kota Yerusalem-ma soona lae, ‘MANETUALAIN Kandela Manen’, fo basa leoina lala'en-na, neukose lakabubua lai kota ndia, fo ala sene-do'ok neu Au. Neukose, ala ta tunga seluk sila dale hihii-nanau mesan fo nggoa-panganaan, ma mangalauk ndia so'on.

¹⁸Neukose, Israel nakabubua no Yehuda, fo ala mai sama-sama leme nusak fo, mamana ookak-ka nai boboak kii Neukose, ala fali ma'is leo nusak fo, Au fe basan neu o bei-ba'i kaim-ma, da'di leo dae pusaka.”

¹⁹MANETUALAIN nafa'da nae, “Israel, Au hii sipok o da'di leo Au anang, ma Au fe o, nusak fo nandaa no o dalem-ma, nusak fo malole nanseli, nai basa daebafak-ka lala'en-na. Au hii o maloo Au mae ama, ma o ta malai meme Au mai so'on.

²⁰Tehu o boeo, ta lilineka neu Au fa, sama leo saoinak fo, manalilineka taak-ka. Au, fo MANETUALAIN nde manakokolak-ka.”

²¹Hala makalupuk-ka, nana namanenek nai letek-kala poin-na; Halak ndia, neme hataholi Israel fo manakii, ma manadokodoe, nanahu lasala-lasingo basa so, ma manalafandele heni sila Aman MANETUALAIN-na.

²²Hei basa emi fo, manala'oela MANETUALAIN so, fali ma'im-ma leona! Neukose, Ana tao nalea-nahai emi, ma Ana taon-na emi da'di manalilinekak. Emi mafa'da mae, “Ya, besak ia ami mai leo MANETUALAIN, nanahu ami Manetualain ndia.

²³Palsuma la'iesak-kana, ami sama-sama meu sene-do'ok neu sosongo-tatangok, nai letek-kala poin-na! Tutulu-fafalik soaneu Israel, ana mai ka'da neme ami Amam MANETUALAIN mai.

²⁴Sene-do'ok neu Baal, fo sosongo-tatangok maneni bibii-mamaek ndia, taon-na ami mamopo ami anam-mala, boema ami sapim-mala ma ami bi'ilopom-mala, fo nde basa hata lala'en fo, ami bai-ba'i kaim-mala ue elas, neme makahulun eli mai so.

²⁵Da'di, nemen-na fo, ami lu'a-lepa bibii-mamaek, ma nemen-na fo, ami da'di matasi'da-matasaek. Nana, ami ma ami bei-ba'i kaim-mala, masala-masingo basa neu ami Amam MANETUALAIN so, ma ami ta tunga mita paletan-na fa.”