Read Termanu YEREMIA 30 Bible Online

YEREMIA 30 - Termanu bible

YEREMIA 30

¹MANETUALAIN, fo Israel Manetualain-na,

²nafa'da neu au leo ia, “Sulak ma la'iesak hata fo Au afa'dak neu o ia neu buku esa dalek.

³Nana neukose fain-na losa, Au tao ahii Au anan Israel no Yehuda heheo-hihilun-nala. Neukose Au o falik-kasa lo nusak fo Au fen neu sila bei ba'ikai manamaten-nala. Neukose ala hapu falik nusak ndia. Au, MANETUALAIN, nde manakokolak-ka.”

⁴MANETUALAIN nafa'da neu anan-nala Israel no Yehuda,

⁵“Au amanene basa hataholi fo manadele nggebe-nggebek-ka naka'di-nakaun, ma hataholi manabiik-ka fo ta nanuu dale nakaloe-nakadae aok-ka naka'di-nakaun boe.

⁶So'ba dudu'a-dodoon ma mete matalololen! Fafakama touk bisa bongi ni'iana beuana do? Metema leondiak soona, tao le'e de Au ita touk-kala esa-esak mata-panan-nala putuk beke esak ma ala ne'e tein-nala nenik liman-nala sama leo inak-ka fo sanga bongi-a?

⁷Faik fo matuaina nanseli ana losa so, faik fo ta hapu nakandandak na fan. Ba'eneu Au anang-ngala soona, faik fo dale manatesa-tama taak; tahu neukose Au soi po'i sila.”

⁸MANETUALAIN Fo Manakoasa nafa'da seluk neu Anan-nala nae, “Metema faik ndia losa soona, lange fo nanataok nu emi lasuhaim-ma neukose Au tao ala'din, ma emi hehenge-papa'am-mala neukose Au se'i-po'in. Neukose emi ta da'di ata neu hataholi manamai-a so'on.

⁹Emi neukose sene-do'ok neu Au, fo emi Amam MANETUALAIM-ma, ma neu hataholi esa, fo tititi-nonosik neme Dauk mai neukose Au so'un da'di leo manek-ka.

¹⁰ Au anang Israel-la lemin, boso bii! Au atang Yakob, boso nggenge-boik! Neukose emi mo emi tititi-nonosim-mala Au soi-po'is neme nusa dok fo mamanak emi nanahukuk-ka. Neukose emi me'um-ma leo emi nusa-namom-ma fo leo no nene-lino-linok. Neukose emi leo no dale manatesa-tama; ta palu emi bii-mamata'u hata esa boen.

¹¹Neukose Au mai, fo neukose Au soi-po'i emi. Leoina-leoina, fo mamanak Au tao tapasasala emik-ka, basas neukose Au tao amopo-amates, tehu Au ta tao emi tao leondiak fa. Tete'ek-ka neukose emi ta maladeak neme huhukuk-ka mai fa, tehu Au huhukung neu emi-a nde been-na ndos matetuk, ma nanda no nakeketun-na. Au, MANETUALAIN, nde manakokolak-ka.”

¹²MANETUALAIN nafa'da neu anan-nala nae: “Emi he'dim-mala bela nanseli, ba'eneu emi bisum-mala soona ta hapu aidon-na fa.

¹³Ta hapu hataholi esa boen, tunga-sanga soaneu emi lelea-hahaim fa, ta hapu mo'do-akidok soaneu emi bisum ngguma-paele'bem-mala fa, ta hapu mamahehenak ba'eneu emi soaneu lea-hai fa.

¹⁴Basa emi manasue-manalain-nala lasanggango heni emi so; Ala ta nau lafandele emi so'on. Sama leo musu-a sapun-na emi, ma Au huku emi nenik nasak, nanahu emi sala-singom ba'uk-ka ma emi kilu-salam-mala matuaina.

¹⁵Boso masasale-dale la'eneu emi bisum-mala, nana ta hapu namahehenak ba'eneu emi hai fa. Au huku tao emi tao leondiak nanahu emi sala-singom-mala ba'uk-ka ma emi kilu-salam-mala matuaina.

¹⁶Tehu besak ia basa manako'do emi-a, neukose nanako'dok, ma basa o musumom-mala neukose nanafoo nenik lo mamana tu'u-tapak-ka neu. Neukose Au tuni-ndeni manatuni-ndenik-ka, neukose Au amanako manamamanako emi-a.

¹⁷Leomae emi musum-mala nafa'da nae, ‘Sion nanatu'u-tapa henik so, ma ta hapu manatao afik neu fan,’ tehu leomae leondiak boe, neukose Au tao-a emi lea-hai nasa-fali, ma neukose emi bisum-mala Au amo'dos.”

¹⁸MANETUALAIN nafa'da seluk bai nae: “Neukose Au sue-lai emi fo Au anang-ngala ma Au tao matalolole emi heheo-hihilum-mala nai emi dae oem-mala. Yerusalem neukose nananafofo'a seluk, ma uma manen-na nanaao mahiik.

¹⁹Ndia laun-nala neukose ala koa-kio Au nenik nakamek, ma ala eeki-latadale nenik namahokok. Au taon nana fe ha'da-holomata, te ta nananakadaek so'on, ma sila dede'un-nala boe tai lamaba'uk-ka.

²⁰Neukose Au tao-a emi leoinam-ma ma lolole-lanapu sama leo makahulun-na, ma ala da'di lasafali sama leo Au anang-ngala. Basa manatuni-ndenis-sala neukose Au hukus boe.

²¹Manek fo ana paleta emi-a dada'din-na neme emi leoinam-ma mai. Neukose nanapo'i-lotak ana deka no Au metema Au aloon ana nasasale-matak no Au. Nana see kande ndia fo napalani nasasale matak no Au, nenik ndia hihi-nanaun mesan-na? Neukose emi da'di Au Anang-ngala ma Au da'di emi Manetualaim-ma. Au, MANETUALAIN nde manamafa'dak ndia.”

²³MANETUALAIN nasa-melun-na nonokabai lii manapopouk-ka, nonokabai ani sangu fo malepaka tuni-ndeni la'e hataholi mangalauk-kala, ma neukose ta naloe fa, metema ana dudu'a-dodonakala beita da'di fa. Neu fai makabuin-na fo neukose Au anang-ngala bubuluk dede'ak ndia.