Read Termanu YEREMIA 32 Bible Online

YEREMIA 32 - Termanu bible

YEREMIA 32

¹ Zedekia fo manek Yehuda paleta neu teuk ka sanahulun-na, fo nde manek Nebukadnezar fo manek Babel-la paleta neu teuk ka sanahulu falun-na, boema MANETUALAIN kokolak no au.

²Nai lelek ndia te manek Babel-la leu sapu-la Yerusalem. Ndia te au nanatahan nai uma manek-ka so'dan-na

³neme manek Zedekia, nanahu ala du'du lae, au po'a-benga ae, MANETUALAIN nafa'da nae leo ia, “Neukose Au po'ilotak manek Babel-la nangatun-na kota ia,

⁴de manek Zedekia ta nala deak fa. Neukose ndia nanafek lo manek Babel-la neu, fo nasasale matak no manek ndia fo ana kokolak matan non.

⁵Makabuin-na neukose ala fua leni Zedekia lo Babel neu, fo leo nai naa losa au hukun. Leomae ana te-tati hataholi Babel-la, tehu ana ta nala fas. Au, MANETUALAIN, nde manakokolak-ka.”

⁶MANETUALAIN nafa'da neu au

⁷nae, au toung Salum anamanen Hanameel, neukose ana mai soaneu noke fo ela au asa a daen-na nai Anatot, fo nai Benyamin nggolo-ta'dun. Nana au, nde been-na nggilleo-bobongin fo nanadekak fo anu hak asa a dae ndia.

⁸Boema nanda no hata fo MANETUALAIN nafa'dak-ka, de Hanameel mai nakanini au nai uma manek-ka so'dan, fo nafa'da au asa-a daen-na. Hundia de au amahele te'e-te'e ae MANETUALAIN kokolak no au.

⁹Boema au asa a dae ndia neme Hanameel mai belin-na doi fulak sanahulu hitu. Au alo-a sakasii-la de au lima-le susula aasak-ka nai sila matan boema au tao segel neun, de besak-ka au tai fe doin-ala neu.

¹¹Makabuin-na boema au ho'i-a susula aasak ndia fo nanatao basa segel, ma isin-na eno-dalan no nakeketun-nala. Au ho'i-a susulak fo segel taka boe,

¹²de au fe susulak kaduak sila lo Neria fo Barukh anan, fo Mahseya upun-na. Au fe susulak ndia lo Hanameel no manasakasik-kala fo manalimale susulak ndia matan, ma nai hataholi-hataholi fo manamangatuuk manai uma manek ndia so'dan-na matan-na neu.

¹³Au afa'da neu Barukh nai sila basas matan ae,

¹⁴“MANETUALAIN Fo Manakoasa, fo Israel Manetualain-na, ana paleta fo ela o ho'im-ma susulak kaduak ia la, leomae asli do nanasalin, fo taon leo ule pepe'dak esa dalek fo ela nahele losa dook-ka.

¹⁵MANETUALAIN Fo Manakoasa, fo Israel Manetualain-na, nafa'da nae, uma, dae, ma osi angol boe neukose nananase'ok seluk nai nusak ia.”

¹⁶Au fe susulak nase'o-banasak sila lo Barukh neu beoma, au hule-haladoi as,

¹⁷“MANETUALAIN Fo Madema ina, O nde makadada'dik lalai-a ma daebafak-ka nenik O koasam-ma, ma O be'i-balakaim fo matuaina ndia. Ta hapu hata esa fo matea ba'eneu O fa.

¹⁸O matu'du O susue-lalaim neu hataholi lifu-lifuk-kala, tehu O huku hataholi nanahu ina amam-mala sala-singon-nala boe. O nde been-na Manetualain fo matetuk, ma mabe'i-balakai; O na'dem-ma MANETUALAIN Fo Manakoasa.

¹⁹O dudu'a-dodoo fai manamaim-ma ana seli nanseli, ma O tatao-nono'im manada'dik beuk; O mita la'iesak hataholi daebafak-ka tatao-nono'in lala'en-na, de O balas-sala nanda no sila tatao-nono'in.

²⁰Makahulun eli O tao manada'dik beuk-kala ma dede'a matuaina-la nai Masir, ma losa besak ia boe, O bei tao mahelen, leomae nai hataholi Israel-la tala'da do nai leoina fe'ek-kala boe. Hu ndia de besak ia O nananita-nalelak nai basa mamanak lala'en-na.

²¹Nenik O koasam-ma ma O be'i-balakaim fo matuaina, de O meni falik hataholi Israel-la kalua leme Masir mai. O tao manada'dik aok-kala, ma manada'dik beuk-kala, ma manada'dik fo manatao manggenge musu-a.

²²Nusak fo neulauk-ka ma malole-manapuk ia, O fen neu sila, sama leo hata fo O helu basak-ka neu sila be'i-balakai manamaten-nala.

²³Tehu nai lelek ala mai lo nusak ia mai de latona-la boema, ala ta nau tunga O paletam-mala fa, ma ala ta laso'da tunga O nanoli-nafa'dan fa. Basa hata fo O paletak neu sala ala ta tao-no'i esa boen. Hu ndia de O muni fes basa susa-soe iala neu sila.

²⁴Hataholi Babel-la ala tao papala nanadamak musu feo kota soaneu latona-la, de besak ia latee-latati so. Natee-natatik-ka, la'a-ndoes-sa, ma he'di laus matuaina, neukose taon-na kota ia tu'da lo sila neu. O mita matan boe, basa hata fo O mafa'dak-kala ala da'di mata nitak.

²⁵Leomae leondiak boe, Ou, MANETUALAIN Fo Madema ina, O nde madenu au asa-a dae ia nai manasakasik iala matan, leomae ba'ihanak seluk bai te kota neukose nanatonak neme hataholi Babel-la mai.”

²⁶Basa boema MANETUALAIN nafa'da au nae,

²⁷“Au nde been-na MANETUALAIN, fo basa hataholi Manetualain-na. Ta hapu fo matea ba'eneu Au fa.

²⁸ Kota ia neukose Au po'ilotak-kana nanakoasak neme Nebukadnezar fo manek Babel-la no basa soloda'dun-nala lala'en-na. Neukose ala latona-na kota ia,

²⁹de hotu heni la'iesak basa-basas lo uma-la, te hataholin-nala tao lafo'a Au nasang-nga nanahu ala tunu boominik neu Baal-la ma ala di'a angol da'di leo tutunu-hohotuk ba'eneu lamatua daebafan-nala.

³⁰Neme hataholi Israel ma hataholi Yehuda-la tutui makasososan-na mai-a, ala tao-la Au daleng-nga ta namahoko fa. Ala tao lafo'a Au nasang-nga nenik sila tatao-nono'i mangalaun-nala.

³¹Nai lelek lafofo'a kota ia, laun-nala tao-la Au nasang-nga fo'a nan seli. Au aketu basa so, soaneu tao amate-amopos,

³²nanahu tatao-nono'i mangalauk fo nanataok neme hataholi Yehuda-la ma Yerusalem-mala, sama-sama lo basa sila manen-nala, basa manaho'u paleta, basa imam-mala ma basa nabi-la.

³³Leomae Au anoli-aheles, tehu ala ta nau lamanene fa, ma ala ta nau tuka-tei sale-dale fa, ma la'o ela Au.

³⁴ Nakalenak uma fo ala taolak soaneu mamana huhule-haladoik neu Au-a, ala tao langgenggeon nenik ala pe'da sila sosongo-tatangon fo manamaluak nai mamanak ndia.

³⁵ Ala tao mei tunu-hotuk soaneu Baal-la nai Bafak Hinom, ma ala tunu-hotu anan-nala neu lamatua debafak Malokh. Te sekona Au beita adenus ala tao dede'ak ndia lai esa boen, nakalenak beita da'di nai Au dudu'ang dale lai esa boen nae, neukose ala tao tatao-nono'i mangalauk ndia, de tao-la hataholi Yehuda-la lasala-lasingo.”

³⁶MANETUALAIN, fo Israel Manetualain-na, nafa'da au nae, “Yeremia, leoina Israel-la lafa'da lae natee-natatik-ka, la'a ndoes-sa, ma he'di laus matuaina taon-na kota ia tu'da lo manek Babel-la liman dale neu. Tehu besak ia, mamanene hata fo Au afa'dak-ka boe.

³⁷Neukose Au tao akabubua leoina ia, neme basa nusak fo Au tao tapasasalas nanahu Au nasa-melung neus. Neukose Au o falik-kasa lo mamanak ia, ma Au fes leo nai mamanak ia no nene-lino-linok.

³⁸Neukose sila da'di Au anang, ma Au da'di sila Manetualain-na.

³⁹Neukose Au fe sila dudu'ak ka'da esa fo nde, fe ha'da-holomata neu Au neme dodoon losa dodoon-na; dede'ak ndia neukose neni malole ba'eneu sila aopaan-na, ma ba'eneu sila tititi-nonosin.

⁴⁰Neukose Au tao hehelu-balatak matea-mahelek no sila. Neukose Au ta tao hahae neulauk ba'eneu sila fa. Neukose Au taos ala bii ma ala fe ha'da-holomata neu Au no dale katema-tuak, fo ala boso dook-ka neme Au-a mai.

⁴¹Neukose Au hii ka'da tao malole ba'eneu sila, ma Au tao-as leo lahele nai nusak ia soaneu losa dodoon-na.

⁴²Sama leo Au uni susa-soe ba'eneu leoina ia, leondiak boe neukose Au fes basa malole-malole la'eneu fo Au helu basan ba'eneu sila so.

⁴³Hataholi-la lafa'da lae, neukose nusak ia ana da'di sama leo mook solokaek-ka, fo hataholi daebafak-ka, ma bana manu ta leo fan, ma lae nusak ia ana tu'da lo hataholi Babel-la liman dale neu. Tehu Au afa'da ae, neukose lase'o-banasa seluk tina-osi nai nusak ia;

⁴⁴Neukose susulak nase'o-banasan-na nanalima leek, ma nana segel, ma nana tao natea-nahelek neme sakasii-la mai. Ndia neukose ana da'di nai Benyamin mamanan-na nai Yerusalem nggolo-ta'dun-nala boboa-kaisun, nai Yehuda kotan-nala, nai letelepak kotan-nala, nai nggolo-ta'duk manai letelepak-kala huun-na, ma nai Yehuda boboan kona, Neukose Au tao ahii leoina ia heheo-hihilun nai nusak ia. Au, MANETUALAIN, nde manakokolak-ka.”