Read Termanu YEREMIA 35 Bible Online

YEREMIA 35 - Termanu bible

YEREMIA 35

¹ Nai lelek Yosia anan Yoyakim da'di manek nai Yehuda boema, MANETUALAIN nafa'da neu au nae,

²“Mu kokolak mo Rekhab hataholin-nala. Mos leu kama esa dalek nai Au Umang dale, fo di'a fes angol.”

³Boema au u ala basa hataholi Rekhab, nde been-na Yaazanya, (anak esa fo na'den-na Yeremia fo Habazinya anan-na) no basa tolanon-na ma basa ana touk lala'en-na.

⁴Au os lo MANETUALAIN Uman fo Yigdalya anan Nabi Hanan-na ana manatungan-nala kaman-na. Kama ndia, nai Salum anan Imam Maaseya kaman-na lain fo dekak no manaho'u paleta fe'ek-kala kaman-na. Maaseya nde been-na manana'a ngga'di madema ina fo manea lelesu-lelesu manai MANETUALAIN Uman-na.

⁵Basa boema au pe'da nggala nininuk-kala henuk no angol ma nggalas-sala neu Rekhab hataholin-nala matan. Boema au afa'das ae, “Minu leona.”

⁶Tehu ala lataa lae, “Ami a minu angol fa. Ami bei ba'ikai manamatem Yonadab fo Rekhab anan-na kena-ka'i ami losa ami tititi-nonosin ta bole ninu angol fa. Kekena-kaka'ik ndia ana moli-da'di soaneu losa dodoon-na.

⁷Ami ta bole foi-fala dae, ma ta bole maue-maosa do manuu osi angol fa. Nai ami fai maso'dam-ma, ami boeo ta bole tao uma fa. Ami muse leo ka'da nai lala temak dale, fo ela ami leo mahele nai nusak ia, da'di leo hataholi nusa dea.

⁸Basa hata fo manapaletak neme Yonadab neu ami-a, ami tungan. Nai ami fai maso'dam-ma, ami mo ami sao anan-nala bole ninu angol fa.

⁹Ami ta bole mapadeik uma soaneu ami mamana leleom-ma, te ka'da ami leo nai uma lala temak dale. Ami boeo ta manuu osi angol, tina-osi da bini-ngges gandum soaneu sele-tani fa. Keke'un-na basa hata fo manapaletak neme ami bei ba'ikai manamaten Yonadab ndia, ami tungan no dale katema-tuak.

¹¹Tehu nai lelek manek Nebukadnezar sapun-na nusak ia boema, ami maketu mae, ami mulai neme Babel no Siria soloda'dun-nala, de ami malai lo Yerusalem neu. Hundia de besak ia ami leo nai ia.”

¹²Boema MANETUALAIN Fo Manakoasa, fo Israel Manetualain-na, nadenu au u lo hataholi Yehuda-la ma Yerusalem-mala, fo afa'das MANETUALAIN hala-haituan ia neu sila, “Au, MANETUALAIN, atane ae, tao le'e de emi ta nau mamanene Au, ma ta nau tunga Au paletang-ngala fa.

¹⁴Yonadab ana kene-ka'i tititi-nonosin-nala fo ala boso linu angol, de ala tunga neu kekena-kaka'ik ndia. Losa faik ia, neme hataholi sila-la esa boeo ta ninu angol boen. Tehu Au kola-kola o emi tatas esa, te emi ta nau mamanene fa.

¹⁵Au adenu laiesak Au atang-ngala ma basa nabi-la neu emi tatas es, fo ala nasiat emi soaneu tao mahii emi ha'da-tataom-mala, ma bosobai tao mangalauk ba'in. Ala fe emi nasanene'dak fo boso sene-do'ok neu lamatua daebafak fe'ek ma boso makaluku-makatele neu sila, fo ela emi leo mahele nai nusak ia, fo Au fe basan neu emi bei ba'ikai manamatem-mala. Tehu emi ta nau tao afik ma ta nau mamanene neu Au fa.

¹⁶Yonadab tititi-nonosin-nala lamahele neu sila ama manamaten-na paletan-nala, tehu emi soona ta nau mamahele neu Au fa.

¹⁷Hundia, de Au, MANETUALAIN Fo Manakoasa, fo Israel Manetualain-na, neukose uni fe emi hataholi Yehuda-la ma Yerusalem-mala — basa totoa-tataak fo Au aketu basan soaneu emi, sama leo hata fo Au afa'dak-ka. Au afa'da dede'ak ndia nanahu emi ta nau mamanene, metema Au kokolak o emi, ma emi ta nau mataa fa metema Au alo emi.”

¹⁸Boema Au afa'da neu Rekhab hataholin-nala ae, MANETUALAIN Fo Manakoasa, fo Israel Manetualain-na, nafa'da nae leo ia, “Emi mahele neu emi bei ba'ikai manamatem Yonadab; basa paletan-nala emi tungas mamakalala'ok-kasa.

¹⁹Hundia de, Au, MANETUALAIN Fo Manakoasa, fo Israel Manetualain-na, helu nae, neme Rekhab anan Yonadab tititi-nonosin mai-a neukose hapu mahele hataholi touk fo nalalau-naoono Au.”