Read Termanu YEREMIA 39 Bible Online

YEREMIA 39 - Termanu bible

YEREMIA 39

¹Zedekia fo manek Yehuda paleta neu bula kasanahulu teuk kasion-na boema Nebukadnezar fo manek Babel-la no basa manamatee-matatin-nala mai de sapu-la Yerusalem.

²Manek Zedekia paleta neu bula kahaa fain sio teuk kasanahulu esa, boema musu-a tao nakalulutuk kota papala nanadaman-na,

³boema latona-la Yerusalem. Boema manek Babel-la mauli-malangan-nala basas mai de leu langatu-la lelesu ina tala'dak-ka. Nai sila dalek hapu Nergal-Sarezer, Samgar Nebo, Sarsekim fo uma manek malanga uma loon-na, Nergal-Sarezer Rabmag ma malanga soloda'du fe'ek-kala.

⁴Nai lelek manek Zedekia no basa soloda'dun-nala lita la'iesak manada'dik ndia boema, ala ito-ato, de lalai lo Bafak Yarden le'dodaek ndia boe. Ala ho'i eno kaluak tunga uma manek-ka osi bungan-na, boema ala laladeak tunga lelesu isa fo natutik no papala nanadamak kaduak manai mamanak ndia.

⁵Tehu soloda'du Babel-lala usi laheles den ala ho'u-la Zedekia neme mook matetuk Yerikho-a. Basa boema lon lo manek Nebukadnezar-ra nai kota Ribla fo nai Hamat nggolo-ta'dun, boema laketu huhuku nisak neun.

⁶Nai kota ndia boe, anan-nala basa nanatao nisak nai matan-na, ma basa mauli-malangan manapaletak manai Yehuda boeo nanatao nisak-kala.

⁷Basa ndia boema ala e'do heni Zedekia matan-na, boema ala langen de lon lo Babel neu.

⁸Ndi te hataholi Babel-lala hotuheni manek-ka uma manen, ma laun-nala uman, ma ala tao latu'u Yerusalem papala nanadaman-nala.

⁹Mate'en-na laun fo bei hapu nai kota, lo basa hataholi-hataholi fo lalai, de lok hataholi Babel-lala Nebuzaradan, fo Babel malanga matee-matatik musun-na los lo Babel neu.

¹⁰Neme laun nggelok nuu taak nanseli-a ma hata-heto taak-kala, ala la'o elas nai Yehuda de ala fes osi angol ma tina-osi.

¹¹Manek Nebukadnezar-ra nadenu Nebuzaradan fo mauli-malanga musu-a nafa'da paleta leoiak nae:

¹²“Mu sanga Yeremia, fo manea matalololen. Boso taon le'e esa boen; tao-no'i hata fo ana nokek-kala.”

¹³Boema Nebuzaradan no malanga soloda'du kaduan-nala, fo nde, Nebusyazban ma Nergal-Sarezer, ma basa malanga soloda'du fe'en-nala,

¹⁴ho'i-la au neme uma manek-ka so'dan-na. Boema ala fe au lo Gedalya fo Ahikam anan-na fo Safan upun ndia, fo muse ana no falik au u'ung-nga naso'da molek. Boema au leo nai laun-nala tala'da.

¹⁵Lelek ala bei huku au nai uma manek-ka so'dan-na te, MANETUALAIN nadenu au

¹⁶afa'da neu Ebed-Melekh fo hataholi Sudan-ndia ae, MANETUALAIN Fo Manakoasa, fo Israel Manetualain-na, nafa'da nae leoia, “Sama leo makahulun-na fo Au afa'dak-ka, neukose Au uni fe kota ia susa-soe te ta tetu-temak fa. Neukose o mita dede'ak ndia ana da'di.

¹⁷Tehu Au, MANETUALAIN, neukose asulu-ahapa o. Neukose o nanafe tak leo hataholi-hataholi fo o bii-mamata'uk-kala.

¹⁸Neukose o nanatao nisa tak, nana neukose Au soi-tefa ala o. Neukose o samanem-ma naso'da nanahu o masalai deam-ma neu Au. Au, MANETUALAIN, nde manakokolak-ka.”