Read Termanu YEREMIA 40 Bible Online

YEREMIA 40 - Termanu bible

YEREMIA 40

¹MANETUALAIN kokolak no au ndek Nebuzaradan, fo malanga mat-matatik ndia, soi-po'i au neme Rama. Ala lo au nu te au nanalangek sama-sama o hataholi fe'ek neme Yerusalem ma Yehuda, fo nanafoo nenik da'di leo hataholi nanatahan lo Babel neu.

²Malanga matee-matatik ndia naloo heheli au, de nafa'da nae, “MANETUALAIN fo o Manetualaim-ma so'u nasak soaneu tao nakalutuk nusak ia.

³Besak ia dede'ak ndia ana tao-no'in, nanahu o leoinam-ma nasala-nasingo basa so, ma ala ta nau lamahele neu fan.

⁴Besak ia au se'i heni lange ia neme o limam-ma, fo daenga au po'ilotako. Metema o nau soona, o bole tunga lo Babel neu, te neukose au akaboboi o. Tehu metema o ta nau fa soona, ta hata-hata fa. Nai nusak ia dalen-na o su'di leo beem-mu boeo pake ka'da o dale hihiim-ma.”

⁵Au beita la'o fa te, Nebuzaradan nafa'da nae, “Metema o nau soona, o bole fali leo Gedalya, fo Ahikam anan-na fo Safan upun-na neu, fo nanaso'uk neme manek Babel-la da'di gobelnol nai Yehuda kotan-nala. O bole leo mon nai laun-nala tala'da, ado o bole mu su'di leo beem-mu tunga o dale hihiim-ma.” Boema ana fe tua-lepa ma bua-lo'a palsen fe au, de ana po'i au la'o.

⁶Au u lo Gedalya neu nai Mizpa, de au leo on nai laun-nala tala'da, fo nanala'o elak mani nusak Yehuda.

⁷ Manek Babel-la ana so'u basa Gedalya da'dik gobelnol nai Yehuda, soneu ana paleta la'iesak hataholi fo bei elak manai Yehuda, fonde hataholi-hataholi nuu-taak-hatataak nanseli-a. Basa malanga soloda'du ma soloda'du Yehuda nggelok fo ala ta fe aoinan-nala lo Babel neu fa lamanene la'eneu Gedalya soso'un fo da'dik gobelnol ndia.

⁸Boema Ismael fo etanya anan-na, Yohanan fo Kareah anan-na, Seraya fo Tanhumet anan-na, ma Efai neme Netofa anan-nala, boema Yezanya neme Maakha de basa-basas lo sila hataholin-nala leu lo Gedalya nai Mizpa.

⁹Gedalya nafa'da neus nae, “Emi ta palu bii-mamata'u soaneu fe emi aoinam-mala neu hataholi Babel-lala fa. Ka'da leo neme ita nusan ia, ma da'di manek Babel-la atan. Au bole afa'da ae, neukose emi maso'da.

¹⁰Leo neme kota-kota fo emi mahiik-kana, ma po'ilotak emi makaduduluk angol, ai boak ma mina zetun fo pe'da. Au mesang-nga neukose leo nai Mizpa fo asala'e laun-nala metema hataholi-hataholi Babel-lala mai leo ia mai.”

¹¹Ndia te basa hataholi Israel fo manai nusak Moab-pa, Amon-na, Edom-ma ma nusak fe'ek-kala lamanene lae, manek Babel-la ana po'i hataholi Israel nggelok leo nai Yehuda, ma lae ana so'u basa Gedalya da'dik gobelnol so.

¹²Hundia de, ala la'o ela mamanak-mamanak fo nai bee sila nanatao tapasasalak-ka, boema ala fali le'us lo Yehuda neu. Ala mai leo Gedalya mai nai Mizpa, de lakaduduluk-la angol ma ai boak makadotok lanseli.

¹³Basa ndia boema, Yohanan ma basa soloda'du fo ala ta nau solok aoinan-na neu musu-a fa, ala mai lo Gedalya nai Mizpa

¹⁴de lafa'da lae, “Ade o bubuluk do ta de, Baalis fo manek Amon-na ana nadenu Ismael tao nisa o do ta?” Tehu Gedalya ta namahele neu sila kokolan ndia fa.

¹⁵Boema Yohanan nafa'da neu Gedalya nenik nakakukutuk nae, “Malole lenak au u tao isa Ismael; fo ela hataholi esa boen ta bubuluk nae sekande tataon ndia fa. Tao le'e de po'ilotak-kana ana tao nisa o? Neukose ndia nenenin-na basa hataholi Yehuda fo manamakabubuak lo o manai iala ala tapasasala seluk bai, ma dedeak ndia tao nalutu laiesak laun fo bei elak manai Yehuda.”

¹⁶Tehu Gedalya nataa nae, “Bosok! Hata fo o mafa'dak la'eneu Ismael ndia ta tete'ek fa!”