Read Termanu YEREMIA 41 Bible Online

YEREMIA 41 - Termanu bible

YEREMIA 41

¹ Nai teuk ndia bulak kahitun-na Ismael fo Netanya anan-na fo Elisama upun-na no hataholi sanahulu leu lo Mizpa leu soaneu latongo lo Gedalya. (Ismael nde been-na hataholi esa tititi-nonosi manek, hataholi esa nde been-na soloda'du pangkat matuaina nai nusak-ka.) Ala bei la'a-la'a te,

²Ismael no hataholi kasanahuluk sila-la fa'u-la tafan-nala, de ala tao lisa Gedalya, gobelnol fo nanaso'uk neme hataholi Babel-la mai.

³Ismael boeo tao nisa la'iesak hataholi Yehuda fo manamakabubuak lo Gedalya nai Mizpa, ma basa soloda'du Babel fo manai ndia boe.

⁴Balahaa te hataholi beita bubuluk Gedalya tatao nisan-na fa te,

⁵hataholi faluhulu leme Sikhem, Silo, ma Samaria mai. Ala nggeu heni takudaen bulun-nala, papaken-nala siba'ek-kala, ma ala dudui lahina aon-nala. Ala leni gandum ma kemenyan soaneu ala tunu-hotu nai MANETUALAIN Uman-na.

⁶Boema Ismael neme Mizpa mai, de neu natongo nos. Au-a bei kiki, te nafa'da nae, “Mai teu fo mitak Gedalya dei.”

⁷Ala losa kota tala'da tutika, Ismael no hataholin-nala mulai tao lisas. Tehu neme sila mai-a, sila sanahulu nafa'da neu Ismael lae, “Boso tao nisa ami! Te ami bei manuu gandum matak dua, mina zetun boe, ma fani oe. Ami bei mafunis lai kota deak.” Hundia, de ismael ta tao nisa fsa, tehu fe'ek-kala soona, ana tao nisas de popolan-nala nanatapak lo oedolu dale neu.

⁹Oedolu ndia nde been-na oedolu matua, fo manek Asa nde taon-na nai lelek Baesa fo manek Israel-la sapu-nan nana.

¹⁰Makabuin-na boema Ismael ho'un-na la'iesak manek-ka ana fe'on-nala ma basa hataholi fo bei elak manai Mizpa, fo Nebuzaradan fes leu Gedalya paletas-sala. Ismael foonenis boema ana la'ok nos de lalanga lo Amon leu.

¹¹Yohanan fo Kareah anan-na, ma basa soloda'du fo sama-sama lon nana lamanene la'eneu Ismael tatao-nono'i mangalaun-na.

¹²Boema sila sama-sama lo sila ana boan-nala leu usi tungan de ala hapun neme lifu ina Gibeon-na.

¹³Lita Yohanan sama-sama no soloda'du sila-la mai boema, basa hataholi fo Ismael foonenik-kala lamahoko lan seli,

¹⁴boema lasafali de lalai leu soluk Yohanan hataholin-nala.

¹⁵Tehu po'i heni Ismael ma ana boan falu de lalai lo nusak Amon-na neu.

¹⁶Makabiun-na boema Yohanan ma soloda'dun-nala tao lakabubua basa soloda'du anak-kala, inak-kala, ni'iana-la, ma basa uma manek-ka manana'a nggadin-nala fo nanafoonenik neme Ismael nai lelek ana tao nisa Gedalya.

¹⁷Sila basa-basas da'di manabik leu hataholi Babel-lala, nanahu Ismael tao lisa Gedalya fo nanaso'uk neme manek Babel-la da'dik nusak ndia gobelnol-la. Da'di sila lalai lo Masir neu. Nai eno tala'dak, ala late'e neme Kimham dekak no Betlehem.