Read Termanu YEREMIA 42 Bible Online

YEREMIA 42 - Termanu bible

YEREMIA 42

¹Basa ndia boema basa hataholi matua do ana, lo basa soloda'dun-nala, ma Yohanan Fo Kareah anan-na ma Azarya fo Hosaya anan-na mai

²lo au-a mai de lafa'da lae, “Ama, samaleo Ama mita matan, ami ia makahulun-na ba'uk-ka te besak ia ela ka'da lumuanak so. Ami dokodoe Ama hule-haladoi soaneu ami, neu Amak MANETUALAIN fo sene-do'ok-ka. Hule-haladoi fe ami fo be elak iala,

³fo ela Amak MANETUALAIN natu'du fe ami lo be neu fo ami muse meu, ma hata fo am muse tao-no'in.”

⁴Au ata ae, “Malole! Metema leondiak. Au sipok emi nonoken ndia. Neukose au hule-haladoi neu ita Aman MANETUALAIN-na fo nataan-na leo beek soona, neukose au afa'da la'iesak-kana neu emi; Esa boeo neukose au ta afunin lo emi neu fa.”

⁵Ala lafa'da neu au lae, “Emi mokeama hule-haladoi neu ita Aman MANETUALAIN-na, nanahu ami nau mamahele neun, fo ela ami heheo-hihilum-ma da'di malole. Da'di MANETUALAIN hala haituan-na malole do mangalauk ndia boeo neukose ami tungan. Nemen-na fo MANETUALAIN da'di sakasii fo ndos ma matetuk ma manalilinekak ba'eneu ami, metema ami ta nau tunga la'iesak paleta fo MANETUALAIN fen neu ami tunga ama fa.”

⁷Basa faik sanahulu boema MANETUALAIN kokolak no au.

⁸Boema au aloo-a Yohanan no soloda'dun-nala, ma hataholi fe'ek fo ala mai sama-sama lon nana.

⁹Au afa'dan neus ae, “Emi madenu au anduku-alosak emi dokodoem-ma neu MANETUALAIN, fo Israel Manetualain-na. Ade, MANETUALAIN nafa'da nae,

¹⁰‘Metema emi nau leo mahele nai nusak ia soona, neukose Au so'uk emi, te Au ta tao atu'da emifa; neukose Au tao akatetetuk emi, te Au ta tao atu'u emi fa. Au daleng-nga he'dis-sa nanahu, Au tao basa susa-soe neu emi so.

¹¹Bosobai bii neu manek Babel ndia. Hapu Au nai emi tala'da soaneu tulu-fali ma soi-po'i emi neme ndia koasan-na mai.

¹²Nanahu Au sue-lai neu emi, de neukose Au ataa manek Babel-la sue-tene emi de ana po'i emi me'um-ma. Au, MANETUALAIN de manakokolak-ka.’ ”

¹³Tehu emi fo be elak manai Yehuda soona, boso ko'bo-ketu emi bafam-ma neu emi Amam MANETUALAIM-ma boso mafa'da mae, “Ami ta nau leo nai nusak ia fa. Ami nau meu lo Masir fo ami leo nai nusak ndia. Nai na ami ta la'ola'di natee-natatik, ta mamanene pupuk-ka nalii soaneu naloo neu musu, ma ta hapu toto'a-tataak, la'a ndoes fa.” Metema emi dalem-ma natea soona meu lo Masir fo leo nai na soona, MANETUALAIN Fo Manakoasa, fo Israel Manetualain-na hala-haituan-na nde ia ba'eneu emi:

¹⁶“Natee-natatik ma la'a-ndoes-sa fo emi bii-mamata'uk ndia, neukose usi nahele emi losa Masir, ma neukose mate-mopo emi nai nusak ndia.

¹⁷Basa hataholi fo latea dalen-nala soaneu ala leu lo Masir ma ala leo nai na soona neukose mates lai natee-natatik-ka dalek do mates nanahu la'a-ndoes-sa do mates nanahu he'di-laus matuaina, neukose ta hapu hataholi esa boen nala deak neme susa-soefo neukose Au fen neu sila; neukose mate la'iesak-kasa.

¹⁸Sama leo Au, fo Israel Aman MANETUALAIN-na po'a Au nasa-melung-nga neu Yerusalem laun-nala, leondiak boe, neukose Au po'a Au nasa-melung-nga neu emi fo mana neu lo Masir. Neukose hataholi-la lita emi soona, langgenggengo ao; neukose emi nananakamumulu-nakamamaek, ma neukose emi na'dem-ma nanapakek da'di leo soo-supak. Neukose ei ta mita emi dae oem ia so'on.”

¹⁹Boema Au afa'da seluk ae, “MANETUALAIN paleta basa so, fo ela emi fo bei elak manai Yehuda, ta bole meu lo Masir fa. Hundia de, besak ia Au fe emi nasanene'dak

²⁰ae, emi tao basa sala matuaina so. Emi moke fo ela au hule-haladoi neu ita Aman MANETUALAIN-na soanau emi, ma em helu soaneu tao-no'i basa hata fo nananafa'dak neme MANETUALAIN mai ndia.

²¹Hundia de, besak ia au anduku-alosak ita Aman MANETUALAIN hala-haituan-na neu emi so. Tehu em ta nau tunga hala-haituak ndia fa.

²²Hundia de, mafandendelek leona te: nai nusak fo emi mahiik leo mahele ndia, neukose emi mate nai natee-natatik-ka dalek, ado hukande la'a-ndoes-sa do he'di-laus matuaina.”