Read Termanu YEREMIA 43 Bible Online

YEREMIA 43 - Termanu bible

YEREMIA 43

¹MANETUALAIN fo Israel Manetualain-na hala haituan-na fo au muse anduku-alosak-kana neu laun-nala ndia, au anduku-alosak la'iesak-kana so.

²Boema Azarya fo Hosaya anan-na, ma Yohanan fo Kareah anan-na no basa hataholi fe'ek fo manakoao-ndaeaok sila-la lafa'da neu au lae, “O masapepeko-masandandali. Ami Amam MANETUALAIM-ma ta nadenu o kena-ka'i ami soaneu meu lo Masir fa.

³Barukh fo Neria anan ndia nde nafa'da o soaneu fufu'di-oo'dok ami fo ela hataholi Babel-lala koasa ami, ma ala tao lisa ami, do foo leni ami lo Babel.”

⁴Leomae Yohanan no basa soloda'dun-nala, ma laun-nala ta nau tunga MANETUALAIN palen-na soaneu leo nai Yehuda fa.

⁵ Yohanan, ma basa soloda'dun sila-la loo la'iesak hataholi fo bei hapuk manai Yehuda boema basa hataholi manafali ma'ik neme nusak fe'ek fo mamanak ala tapa sasalak lo Masir neu.

⁶Touk, inak, ni'iana, ma manek-ka ana fe'on-nala fo Nebuzaradan fen neu Gedalya paleta-koasa-la, fonde au ma Barukh, basa-basas nananok lo Masir neu.

⁷Ala lena-la'ban MANETUALAIN paletan-na, de ala leu lo Masir losa dodoon-na kota Tahpanhes.

⁸MANETUALAIN nafa'da neu au nai na nae,

⁹“Ho'im-ma batu matuaina-la, fo seles lo dae dale neu nai lelesu-a uluk fo masok lo manapaletak manai kota ndia uma matuainan-na. Tao matalolole fo ela hataholi Yehuda-la lia o tao hata ndia.

¹⁰Boema mafa'da neus mae Au, MANETUALAIN Fo Manakoasa, fo Israel Manetualain-na, neukose no Au atang Nebukadnezar fo manek Babel-la lo mamanak ndia neu. Ma neukose ana napadedeik kandela menen-na nataba lala-tema manapaletan-na nai batu fo o selek lo dae dale sila lain.

¹¹Neukose Nebukadnezar mai fo ana tao nakala Masir. Ma hataholi fo manaketu basa taak soaneu maten nanahu he'di-laus matuaina. Sila fo nananaketu basak soaneu nananok da'dileo nanafoo nenik soona, neukose nananok da'di leo nanafoo nenik, ma sila nananaketu basak soaneu mates nai natee-natatik-ka dalek soona, neukose mates nai atee-natatik-ka dalek.

¹²Neukose Au tao ha'i neu Masir lamatua daebafan-nala uma sosongo-tatangon-nala, ma neukose manek Babel-la hotuheni patong sosongo-tatangok manai uma sosongo-tatangok-ka ado ana ho'i nenis lo nusa-namon neu. Sama leo hataholi nanafoo sa tao balisi bua-lo'an neme utu-tuma, leondiak boe neukose manek Babel-la sasapu balisi Masir boema ana la'o seluk no ta hapu esa nanggengek-kana boen.

¹³Batu-lutu sosongo-tatangok manai Heliopolis nai Masir, neukose nanatao nakalulutuk, ma Masir lamatua daebafan-nala uma sosongo-tatangon-nala neukose nanahotu-heni la'iesak-kasa.”