Read Termanu YEREMIA 46 Bible Online

YEREMIA 46 - Termanu bible

YEREMIA 46

¹MANETUALAIN kokolak neu au la'eneu leoina-la,

² mulai la'eneu Masir. Ana nafa'da neu au la'eneu soloda'du Nekho-la, manek Masir-ra, fo nanatao nakalak neme Nebukadnezar fo manek Babel-la nai Karkemis fo dekak no Lee Efrat-ta nai teuk ka haan-na Yoyakim fo manek Yehuda ana paleta. MANETUALAIN hala kokolan nde ia la'eneu dede'ak ndia.

³“Soloda'du Masir-rala eeki lapane'e neu sila soloda'du matee-matatin-nala lahehele aon-nala, ‘Tao matane tee-la! Pake ba'du besik ma topi bai! Siap ba'du baba fanak fo mu lo balisan dale mu! Emi, soloda'du matee-matatik manasa'e ndala-la, makak lapa neu ndala-la bafan-nala! Sa'e emi ndala-mala, tutulu matak fo matee-matati!’

⁵Tehu Au, MANETUALAIN, Au itas ala bii de lakadedeak. Ala lalai no bibiik-ka de ala ta lipa lo dea neu fa.

⁶Sila fo balakai ina-la ta lalaik labe'i fa, ma sila fo palani tati batu-la ta lala musu-a deak fa. Ala lakatunu ma ala tu'u leu nai lee Efrat-ta su'un kii.

⁷See-ka nde ia fo namaloa sama leo lee Nil-la, ma oen-na napoponu sama leo lee-la?

⁸Ndia nde Masir fo namaloa sama leo lee Nil-la, ma oen-na napoponu sama leo lee-la. Ana nafa'da nae; ‘Au nau amaloa fo tatana ketu daebafak-ka, tao amopo-amate kotan-na no lun-nala.

⁹Malaik leon-na hai ndala-la lemin! Makababalek ao leon-na hai kaleta-la lemin! Tutulu matak leon-na hai palani tati batu fo mananeni ba'du baba fanak fo maneme Sudan ma Libia-la lemin. Boema emi fo manakou malelak maneme nusak Lidia-la lemin!’ ”

¹⁰Tehu au, Yeremia afa'da ae, ia soona MANETUALAIN Fo Mademaina ma Manakoasa fain ia; neu faik nde te, ana tao babalak neu basa musunom-mala lala'en-na. Neukose tafan-na na'as losa lakabete, ma ninu daan-nala losa ana doak. Faik ia MANETUALAIN Fo Manakoasa do'do tutunu-hohotun-nala nai ki, nai lee Efrat ndia su'un-na.

¹¹Hai laun Masir-rala lemin, meu lo Gilead meu fo sanga mo'do-aidok! Tehu leomae leondiak boeo ta hapu mo'do-aidok so'on hapu nahai emi fa.

¹²Emi heheo-hihilum fo maneni mamaek-ka nanabubuluk basak neme leoina-la mai. Emi hala nalom-ma nananamanenek nai basa daebafak lala'en-na. Soloda'du-la esa sa'en-na esa; de basa-basas tu'u latatama ao leo dae lain.

¹³ Nai lelek Nebukadnezar fo manek Babel-la mai sapun-na Masir, boema MANETUALAIN kokolak neu au nae,

¹⁴“Yeremia, po'a-benga halak-ka nde ia nai kota-kota Masir-ra, fo nde nai Memfis, Migdol ma Tahpanhes-sa mae, maneneak soaneu makatatakak aoinam-mala, nana basa hata fo emi manuuk-kala neukose nanatao nakalulutuk nai natee-natatik-ka dalek!

¹⁵Tao le'e Apis, de o lamatua daebafam fo mabe'i balakai ia-na ndia nalai heni aoinan-na? Nanahu MANETUALAIN nde tao nakalan-nana.

¹⁶O soloda'dum beuk-ka lakatunu de ala tu'u leu dae lain. Sila esa nafa'da esa, ‘Nae mai fo ata te'ut-tala lo ita nusa-namom teu, fo ela ita tala deak neme tafa musu-a mai.’

¹⁷Foi na'de beuk neu manek Masir-ra: ‘Manatao tasi'bu fo maneseli fai loak-ka.’

¹⁸Au, MANETUALAIN Fo Maso'dak, Au Manek, MANETUALAIN Fo Manakoasa. Sama leo letek Tabor-ra poin-na to'de nai letek-kala tala'da ma sama leo letek Karmel-la poin-na to'de nai tasi-a bafan-na, ndia fo manasapun-na o-a be'i-balakaim leondiak.

¹⁹Mahehele aom laun Masir-rala lemin, soaneu nanafook ma nananook fo la'o! Neukose Memfis da'di ai-batu madodouk, mamanak fo nene-lino-linok nanahu nana leo taak.

²⁰Masir sama leo sapi ana maao, tehu pena matuainan-nala leme kii mai da ala sapu-lan.

²¹Nakalenak seluk bai sila soloda'du nanase'ba-baen-nala ta bisa so'uk sama leo sapi ana fo aon mota-mota nan seli-a fa. Ala ta hapu lakatatakak fa. Basa-basas fali deak de lalai beno'u fo ela laso'da. Fai huhukuk ba'eneu sila ana losa ndia so; fain-na losa soaneu susa-soe-a tuni-na sila.

²²Masir lalai ma lalo'do-lalaek sama leo menge-a, nanahu soloda'du musun-nala boe tai ka'da dedekak-ka. Ala sapu-lan nenik taka sama leo hataholi lo'o ai-a,

²³ma ala tao balisi nula ina fo ta bisa tola mala dalek fa. Ta leke-mala soloda'du musu-la fa, mafandik nan leme dea mai. Au MANETUALAIN nde manakokolak-ka.

²⁴Neukose Masir laun-nala nanatao nakamamaek, nanahu nanatao nakalak neme leoina maneme kii mai-a. Au MANETUALAIN nde manakokolak-ka.”

²⁵MANETUALAIN Fo Manakoasa, fo Israel Manetualain-na, nafa'da nae, “Neukose Au huku-doki Amon, lamatua daebafak manai Tebe-a ma basa Masir no lamatua daebafan-nala ma manen-nala. Manek Masir-ra ma basa hataholi ta lamahena neun nana

²⁶neukose Au fen neu Nebukadnezar fo manek Babel-la no basa soloda'dun-nala fo mana nau tao nisas-sala. Tehu neu makabuin-na te, neukose Masir nanaleo nasafalik sama leo makahulun-na. Au MANETUALAIN nde manakokolak-ka.”

²⁷ “Au anang Israel-lala lemin, boso bii-mamata'u! Au atang Yakob, boso nggenge boik! Neukose emi ma emi tititi-nonosim-mala neukose Au soi po'is neme nusa dook, nai mamanak fo emi nanafoo nenik-ka. Neukose emi me'um-ma fo leo nai emi nusa namom-ma no nenee-lino-linok. Neukose emi maso'da no ta nggenge-boik fa; ta palu emi bii hata esa boen.

²⁸Da'di boso bii-mamata'u, hai Au anang-ngala lemin: neukose Au mai soaneu soi po'i emi. Mamanak fo Au tao tapasasala emi nai leoina-la, neukose Au tao amate-amopo la'i esak-kasa, tehu Au ta tao emi tao leondiak fa. Memak emi ta maladeak neme huku-doki-ka mai fa, tehu Au huhuku-dodoking neu emi-a ndebeen-na ndos ma matetuk nanda no makeketun-na.” Au MANETUALAIN nde manakokolak-ka.