Read Termanu YEREMIA 48 Bible Online

YEREMIA 48 - Termanu bible

YEREMIA 48

¹ MANETUALAIN Fo Manakoasa, Fo Israel Manetualain-na nafa'da nae leo ia la'eneu Moab, “Soe ba'eneu laun Nebo, kotan-na bala neu so! Latona-la Kiryataim, ma kota musun-na fo matea-mahelek-ka nanatao nakalulutuk, de nalosa laun-nala da'di manamaek.

²Mopo Moab matua-mademan, musu-a natona-na Hesybon so, ma ala tutu'u basa eno ma soaneu tao lamopo la'iesak leoina Moab-pa nai na. Hala kokolak manai Madmen-na neukose nana kena-ka'ik, nanahu neukose soloda'du la latona-la kota ndia.

³Mamanene! Laun Horonaim-mala nggasi-nggasi, ‘Mamate-momopok! Nakalulutuk!’

⁴Moab nakalulutuk henin so! Sila ni'ianan-nala nggiso-nggison-nala nananamanenek losa Zoar.

⁵Nenene hala kikiim-mala nai enok ndanda'ek leo Luhit neu-a, ma hala kikii-namatanim-mala nai enok loloek leo Horonaim neu-a.

⁶Lafa'da lae, ‘Lai-lai! Fo tao kande emi maso'da! Malaik sama leo keledei fuik-ka nai letelepak-ka!’

⁷Moab! O mamahena ka'da o be'i-balakaim masu'i-beten. Tehu besak ia neukose o nanatao nakalak. Kamos, o lamatua daebafam-ma, basa inam-mala ma basa mauli-malangam-mala neukose nanafoo nenik leo mamana ookak-ka neu.

⁸Neukose kota-la basa-basas lakalulutuk, neukose ta hapu esa fo nae ta fa. Bafak-kala ma dokek-kala neukose basas la'iesak-kasa. Au, MANETUALAIN, nde manakokolak-ka.

⁹Pasak batu nisan soaneu Moab, nana neukose ta dook-ka so'on te nusak ndia nanatao nakalulutuk nan seli. Neukose kotan-nala tu'u leu, de neukose ta hapu hataholi esa boen leo nai na fa.”

¹⁰Soo-supak neu hataholi fo ana ta tao-no'i lau-onok neme MANETUALAIN mai no te'e-te'en-na fa. Soo-supak neu ndia fo ana ta lesu tafan-na fo nado'do fa.

¹¹MANETUALAIN nafa'da nae, “Nai makahulun-na Moab naso'da nenee-lino-linok. Beita hapu nanafoo nenik lo mamana ookak-ka neu fa. Ana sama leo angol oek-ka fo nanapo'ilotak sasi henin ma beita hapu nanadi'ak lo angol mamanak fe'ek fa. Angol ndia bei nabomeni ma mala'dahiik.

¹²Tehu, neukose fain-na nde ia so Au adenu fo ela Moab nanadi'ak sama leo angol-la, fo mamanan-na louk ma nanatao naba'ek.

¹³Neukose Moab dalen-na ba'ihana ba'eneu Kamos, fo sila lamatua daebafan-na, sama leo hataholi Israel-la dalen-nala ba'ihana ba'eneu Betel fo sila lamahenak ndia.

¹⁴Touk Moab-pala lapalani lafa'da lae lo be, ‘Ami matee-matatik, soloda'du palani tati batu fo nanaso'ba-su'di basak nai natee-natatik-ka dalek so?’

¹⁵Moab no basa kota-kota-nala nanatao nakalulutuk so, ma hataholi muli-solu neulaun-nala nanataonisakala. Au nde manakokolak-ka. Au manek MANETUALAIN fo Manakoasa.

¹⁶Mamate momopok soaneu Moab nai lelesua bafana so, tadoka so'on te ana nakalulutuk.

¹⁷Hai emi fo Moab nusa-nusan titia-tatainala lemin, fo manabubuluk la'eneundia hahapu-dadainala, falu soaneu leona! Mafa'das leo: ‘Matua-mademan ma be'i-balakain mopokasa so!’

¹⁸Hai laun Dibon, kona meme emi mamanam fo mahada'da-holomataka; fo mamatuk neu dae-a ma neu afu a. Nanahu manataonalutu Moab fo emi nusam-ma ana losa so, ma neukose ana tao nakalulutuk laiesak emi papala mademamala.

¹⁹Emo fo mana leo manai Aroer ala lemin, mapadeik neu enoka su'un-na fo taoafik neun! Matane neu sila fo manamalaik fo manala deak-kala mae, ‘Beek fo manada'dik ndia?’

²⁰Soona neukose ala lata lae, ‘Moab nakalulutuk so dean-na tada'di neu hata esasoboen, hundia de kii-mamatani soaneun. Po'a benga nai besa le Arnon nanalun-na mae Moab nakalulutuk so.’ ”

²¹“Huhukuka nananatudak neu kota-kota manai letepoikala: foneu Holon, Yahas, Mefaat,

²²Dibon, Nebo, Bet-Diblataim,

²³Kiryataim, Bet-Gamul, Bet-Meon,

²⁴Keriot, ma Bozra. Basa kota Moab fo manai dok ma manadekak-kala nana hukuk so.

²⁵Moab be'i-balakaina nanatao naladik so, ma koasa-na nanatao nakalulutuk so. Au, MANETUALAIN nde manakokolak-ka.”

²⁶MANETUALAIN nafa'da nae, “Tao-ma Moab da'di manamafuk, nanahu ana koao-ndaeao nai Au matang. Neukose ana lololi-oe nai mutan dale ma hataholi-la hika-humen.

²⁷Ade ta makahulun-na hataholi Israel-la ta nanahika-humek neme Moab mai ma nananakamamaek nonokabai sila nanaho'u nak mata-matak lo nakoda-la fa do?

²⁸Emi fo Moab laun-nala lemin, la'oela emi kotam-mala fo leo nai kakalak dalek sama leo manupui kalua ana tao ndunu-na nai felak madema su'un-na.

²⁹Emi madedema aom-manseli! Au amanene emi koao-ndaeaom-ma, ha'da palii mangalaum-ma, ma madedema aom-ma nanseli so!

³⁰Au, MANETUALAIN bubuluk emi koao-ndaeaom-ma. O dede'a kokolam-ma, o tatao-nono'im sosoa ndandan ta.

³¹Hu ndia de Au kii-apane'e neu o ma basa hataholi manai Kir-Heres o kotam-ma

³²Neukose au kii ba'uk-ka neu laun Sibna ma Au kii ka'da fa neu laun Yaezer. Kota Sibma sama leo ai angol-la fo ndanan-na ala losa leo Tasi Mates-sa selik, doon-na losa Yaezer. Tehu besak ia boa hanan-nala ma boa angol-la nanatao nakalulutuk so.

³³Susue lalaik mopo basa neme nusa Moab so. Neukose Au tao oe angol-la ta faa neme mamanak kaka'bin-na mai fa; ta hapu hataholi esa boen tao oe angol so, ma hala hihikak-hahakak ta.

³⁴Hataholi manai Hesybon ma Eleale-la kii ma kikii-makaleleun-nala nananamanenek losa Yahas, boema hataholi-hataholi manai Zoar losa Horonaim ma Eglat-Selisia lamanene. Ala kii hu ka nde oe manai lee anak Nimrim ma'dan so.

³⁵Neukose Au tao-a hataholi Moab-pala late'e, ala ta tunu-hotu neu sila mamanak sosongok-tatangok fa, ma sila late'e fe tutunu-hohotuk neu sila lamatua daebafan-nala. Au, MANETUALAIN de manakokolak-ka.

³⁶Su'i betek Kir-Heres ma basa Moab mopo heni so. Au daleng-nga he'dis neu sila; Au sama leo hataholi manafuu sulik nai fai mamates-sa.

³⁷Basa-basas ngeu heni langa doon-nala ma nggolo mein-nala so, tao lakahina liman-nala ma ala kekeo si'di kalong da'di ta'du tana dale he'dis.

³⁸Nai basa uma punin lain manai dae moo-loak-kala nenenek ka'da kikii-makaleleuk, hu ka nde Moab au tao aba'en sama leo ulek nanasue tak-ka

³⁹Moab nakalulutuk so! Moab mae nanseli! Ana kii hu ka nde nananakadadaek ma ana da'di nanafook neme leoina titia-tatain-nala mai. Au MANETUALAIN nde manakokolak-ka.”

⁴⁰MANETUALAIN nafa'da sama, “Leo manupui kaka'ka la'u menik li'da lalapan-na, sama leo ndiak neukose leoina esa mai ma sapu-na Moab.

⁴¹Kota-kota ma kota musu neukose nanaho'i nak, ma soloda'dun-na ala bii sama leo inak fo ana sanga bongi.

⁴²Neukose Moab nakalulutuk ma ta nalupa leoinak esa boen, hu ka nde ala koao-ndaeao lo Au.

⁴³Ala lasasale lo musu-a ma bolok hihi'ik-ka.

⁴⁴Hataholi manamalaik neme musu-a mai-a neukose ala tu'da leo bolok dale, ma mana kalua neme bolok ndia neukose nanaho'u nak nai hihi'ik-ka.

⁴⁵Hataholi nanausik-kala lalai leu sanga nasulu-nahapa nai Hesybon, te kota ndia nanade'dek ma uma manek Sihon-na ha'i na'an boe. Ha'i na'a na basa mamanak nggolok-ka ma lete pe'dak Moab, fo hataholi manatao musu-la nggolon-na

⁴⁶Susa-soe ba'eneu Moab! Hataholi mana sene-do'ok neu lamatuak daebafak Kamos mate-mopo so ma fua leni ana-nala da'di nanafok.

⁴⁷Te nai fai makabuin-na neukose Au tao atalolole nggolok Moab. Au, MANETUALAIN nde manakokolak-ka!” Neukose MANETUALAIN tao leondia neu Moab.